Author: Admin

Travelling Journal

မြန်မာနိုင်ငံ၏ခရီးသွားဒေသတစ်ခုဖြစ်သော ကချင်ပြည်နယ် ပူတာအိုမြို့ရှိ မလိခဟိုတယ်တွင် ယနေ့ နံနက်ပိုင်းက အသေးစားမီးလောင်မှုဖြစ်ပွားပြီး ဟိုတယ်၏ စားသောက်ခန်းအသေး ၊ မီးဖိုချောင်နှင့် ၎င်းနှင့်ဆက်စပ်လျှက်ရှိသည့်
ဘန်ဂလိုတစ်ခု၏ ခေါင်မိုးတို့ကို မီးလောင်ကျွမ်းမှု ဖြစ်ခဲ့ကြောင်း မလိခဟိုတယ်၏ လူမှုကွန်ယက်စာမျက်နှာ(Facebook) ၌ ဖော်ပြထားချက် အရ သိရသည်။

ယင်းဖြစ်စဥ်ကြောင့်ဟိုတယ်၏လုပ်ငန်းလည်ပတ်မှုအလုံးစုံကို မထိခိုက်ခဲ့ကြောင်း ထုတ်ပြန်ထားသည်။

“ဟိုတယ်အခန်းတွေ က ဘာမှမဖြစ်ပါဘူး။ ကျွန်တော် တို့ထုတ်ပြန်ထားတဲ့အတိုင်းပါပဲ” ဟု
ထူးဟိုတယ်အုပ်စု၏ တာဝန်ရှိသူတစ်ဦးက Travelling သို့ ပြောသည်။

လက်ရှိ Malikha lodge 1 တွင် ဘန်ဂလို (၁၂) လုံးရှိပြီး Malikha lodge 2 တွင် သုံးခန်းတွဲပါ အဆောက်အအုံ ငါးလုံး၌ (၁၅) ခန်း
စုစုပေါင်း အခန်းပေါင်း (၂၇) ခန်းရှိကြောင်း ၎င်းက ပြောသည်။

မလိခမြစ်ဖျားရှိ မူလာရှီးဒီရွာတွင် တည်ရှိသည့် ယင်းဟိုတယ်ကို ပြည်တွင်းခရီးသွားဧည့်သည်အများစုသွားရောက်လည်ပတ်ကြပြီး ခရီးသွားဧည့်သည်များ၏ ဓာတ်ပုံ ဝင်ရိုက်ကူးရာ ​ဟိုတယ်တစ်ခုအဖြစ် ပေါ်ပြူလာ ဖြစ်သည့် ဟိုတယ်ဖြစ်​ကြောင်း သိရသည်။

“ဧည့်သည်ကတော့ အနည်းနဲ့အများဆိုသလို
ရှိပေမယ့် ကျွန်တော်တို့က ခရီးစဥ် အားကောင်းတဲ့ဒေသ​​​​တွေမှာ ရှိတဲ့ဟိုတယ်တွေကိုပဲ အဓိကဦးစားပေးရောင်းပါတယ်။ကျွန်တော်က ဟိုတယ်(၁၁)လုံးလောက်ကို ကိုင်ရတာမို့ ကျွန်တော်တို့ ထုတ်ပြန်ချက်မှာဖော်ပြထားတဲ့အတိုင်းပါပဲခင်ဗျာ။ မီးလောင်ရတဲ့အကြောင်းရင်းကိုတော့ဆက်လက်စုံစမ်းနေဆဲပါ “လို့ ထူးဟိုတယ်အုပ်စု၏ တာ​ဝန်ရှိသူတစ်ဦးက Travelling သို့ပြောသည်။

ပုံ/စာ မလိခ ဟိုတယ်၏ မီးလောင်သည့်ပုံနှင့် မလောင်ခင်ပုံမ​ျားကိုတွေ့ရစဥ်

Photo မူရင်းcredit

Travelling Journal

ပြည်တွင်း ပြည်ပ ခရီးသွားဧည့်သည်အများစုသွားရောက်လည်ပတ်ကြသည့် ရှမ်းပြည်နယ် တောင်ပိုင်း ထင်းရှူးမြို့တော် (သို့) ကလောမြို့တွင် Normal ပုံစံ နှင့် ဘတ်ဂျတ်ပုံစံ နှစ်မျိုးစလုံး တည်းခိုနိုင်သည့် ဟိုတယ်အသစ်တစ်လုံးကို ဧပြီလ ၁ ရက်(ယနေ့) မှ စတင်ကာ ဖွင့်လှစ်
​ြပီဖြစ်ကြောင်း အဆိုပါဟိုတယ်မှ Operation Manager ဖြစ်သူ ဦးရဲလင်းထွဋ်က Travelling သို့ပြောသည်။

Kalawအိိ်မ် ဟု အမည်ပေးထားသည့်အဆိုပါဟိုတယ်ကို ကလောမြို့၏ အထင်ကရနေရာတစ်ခုဖြစ်ပြီးခရီးသွားဧည့်သည်များ မဖြစ်မနေသွားရောက်လည်ပတ်ဖူးမြှော်သည့် နှီးဘုရားသို့ သွားရာလမ်းမပေါ်ရှိ ပေ ၁၀၀ ပတ်လည် အကျယ် အဝန်းရှိသည့်မြေ​​ပေါ်တွင် အဆောက်အဦး နှစ်လုံးကို တည်ဆောက်ထားကြောင်း သိရသည်။

“အရင်ကရှိတဲ့ အဆောက်အအုံံကိုတော့ Renovation ပြန်ပြုပြင်ပြီးတော့ နောက်ထပ်အဆောက်အအုံအသစ်တစ်လုံးကို ထပ်ဆောက်ပါတယ်။ အခုတော့အကုန်လုံး ပြီးစီးပြီမို့ ဧပြီတစ်ရက် မှာစတင်ဖွင့်လှစ်မှာဖြစ်ပါတယ်” ဟု ဦးရဲလင်းထွဋ်က Travelling သို့ပြောသည်။

အဆုိပါဟိုတယ်ကို အေးအေးဆေးဆေး အနားယူပြီး သဘာဝအလှတရားကို ခံစားချင်သူများအတွက် ကုန်းမြင့်ပေါ် တွင် Private ဆန်ဆန် တည်ဆောက်ထားပြီး လက်ရှိတွင် အခန်း ပေါင်း ၁၉ ခန်းရှိကာ Superior Mountain view နှစ်ယောက် အိပ်ခန်း ကို တစ်ညလျှင် ကျပ် ခြောက်သောင်းငါးထောင်နှင့် Superior Japanese Style တစ်ခန်းကို တစ်ညလျှင် ကျပ် ခြောက်သောင်း၊ Family Room သုံးယောက် တစ်ခန်းကို တစ်ညလျှင် ကျပ်တစ်သိန်း သတ်မှတ် ထားကြောင်း သိရသည်။

ထို့ပြင် ဘတ်ဂျက်ပုံစံဖြင့် တည်းခိုလိုပါကအပေါ်ထပ်ကုတင် အောက်ထပ်ကုတင်ပါသည့်
နှစ်ယောက်ခန်း တစ်ခန်းကို တစ်ညလျှင် ကျပ်ငါးသောင်း ၊ သုံးယောက်ခန်းကို ကျပ် ကိုးသောင်းမှ တစ်သိန်း၊ လေး​ယောက်အခန်းဆိုပါက ကျပ် တစ်သိန်းတစ်သောင်း မှ တစ်သိန်းနှစ်သောင်းဖြင့် တည်းခိုနိုင်မည်ဖြစ်ကာ အခန်းအားလုံးအတွက် နံနက်စာ ပါဝင်ကြောင်းသိရသည်။

ကလောမြို့၏ ပတ်ဝန်းကျင် တောတောင်သဘာဝရှုခင်းများမှာ လှပလွန်းပြီး အေးမြသည့် တောင်ပေါ် မြို့လေးဖြစ်သည့်အတွက် လုပ်ငန်းရှင်များ၏ စိတ်ဝင်စားခြင်းခံရသည့် မြို့တော်တစ်ခုဖြစ်သည်။

ကလောမြို့၏ အထင်ကရ လည်ပတ်စရာများစွာထဲမှ ရှန်ဘာလာ View Point ၊City View၊
သိမ်တောင် ၊ ရေယောင်းမ View Piont များ ၊
Hill top Villa၊မနောလှ၊ Kalaw View point၊Kalaw Cafeyard၊အိုးစည်တောင်၊ဗျိုက်တောင်၊ပင်းဒယ၊ရွာငံအသွားလမ်း၊မြင်းမူကုန်းနှင့် အလွမ်းတောင် စသည့် နေရာများကို ပြည်တွင်းခရီးသွားဧည့်သည်များ အများဆုံးသွားရောက်လည်ပတ်ကြကြောင်း သိရသည်။

Photo Kalaw Eain

Travelling Journal

စွန့်စားမှုခရီးစဥ်များကို ကြိုက်နှစ်သက်သည့်ခရီးသွားများအတွက် ကျိုက်ထီးရိုးဘေးမဲ့သစ်တောကြိုးဝိုင်းအတွင်းရှိ Forest House Camping Site သို့ ဘတ်ဂျတ် ခရီးစဥ်ဖြင့် လာရောက်လည်ပတ်နိုင်ပြီ ဖြစ်ကြောင်း Forest House Camp ကို တည်ထောင်သူ တစ်ဦးဖြစ်သည့် ဦးအောင်ပြည့်စုံက Travelling သို့ ပြောသည်။

ယခုလနှင့် ဧပြီလအတွင်း လာရောက်လည်ပတ်
မည့် ခရီးသွားများအတွက် တစ်ဦးလျှင် ကျပ်
ခြောက် သောင်း ဖြင့် အထူးဝန်ဆောင်မှု ပေးသွားမည်ဖြစ်ကြောင်း သိရသည်။

” ရန်ကုန်ကနေလာရင် နေ့လည် (၁) နာရီလောက်ကင်ပွန်းစခန်းကိုရောက်ပါတယ်။ ကျွန်တော်တို့ဘက်ကနေပြီးတော့ ကင်ပွန်းစခန်းစုရပ်ထိ လာကြိုပေးပါတယ်။ ကင်ပွန်းစခန်းကနေ ကျောက်ဖြူတောင် Camp ကိုအရင်သွားပြီး၊ တောင်ပေါ်မှာတစ်ညအိပ်ရပါမယ်။မနက်ပိုင်း breakfast ကျွေးပါမယ်။ ကျောက်ဖြူတောင်ပေါ်မှာက နေ၀င်တာရယ် နေထွက်တာရယ်ကြည့်ပြီးရင် နောက်နေ့ breakfast စားပြီးတာနဲ့ Forest camp ကို ဆက်သွားပါမယ်။ Forest camp ကနေပြီး အခြားရေတံခွန်တွေနဲ့ အနားယူရမယ့်နေရာတွေလိုက်ပို့ပေးပါမယ်။ညစာ လည်း ပါပါတယ်။ ကိုယ်ကြိုက်နှစ်သက်ရာတွေကိုလည်း ယူဆောင်လာလို့ရပေမယ့် အမဲသား၊အရက် သေစာ၊ဆေးလိပ် တို့ကို တော့ ယူဆောင်လာခွင့်မပြုပါဘူး” ဟု ဦးအောင်ပြည့်စုံက Travelling သို့ ပြောသည်။

အဆိုပါ ဝန်ဆောင်မှုများအတွက် တစ်ဦးလျှင် ကျပ်ခြောက်သောင်းကျသင့်မည်ဖြစ်သော်လည်း ရန်ကုန်-ကင်ပွန်းစခန်းကားခ(အသွားအပြန်) မပါဝင်ကြောင်းသိရသည်။

တောတွင်းစခန်းချရမည့်နေရာတွင် Sleeping bags၊ Tents၊ Hammock တို့ဖြင့် ညအိပ်ရမည်ဖြစ်ပြီး Adventure ဆန်ဆန်ခရီးသွားချင်သူတွေအတွက် အကြိုက်တွေ့စေရမည့်နေရာတစ်ခုဖြစ်သည့်အပြင် hiking နှင့် Climbing train ရနိုင်သလို Camping feel ကို အပြည့်အ၀ခံစားရစေနိုင်သည့် Budget trip တစ်ခုဖြစ်အောင်ဖော်ဆောင်ပေးထားခြင်းဖြစ်ကြောင်း ဦးအောင်ပြည့်စုံက Travelling သို့ပြောသည်။

ထို့်အပြင် ဘုံခုနစ်ဆင့်တသွင်သွင်စီးဆင်းနေသည့် နတ်သမီး ရေတံခွန် ၌ Diving ကစားခြင်းကို
ပြုလုပ်နိုင်ကြောင်း သိရသည်။

” ကျွန်တော်တို့ ရဲ့ Camp က ကျိုက်ထီးရိုးဘေးမဲ့သစ်တောကြိုးဝိုင်းအတွင်းမှာ တည်ရှိတာပါ။ ဒီတောထဲမှာ သစ်ခုတ် ဝါးခုတ်တဲ့ ဒေသခံတွေ ရဲ့သစ်လုံးအိမ်တွေရှိပါတယ်။ အရင်ကတော့ဒေသခံတွေက ဘုရားဖူးတွေလာကြတော့စျေးရောင်းကြတယ်။ အခုကျတော့ ဘုရားဖူးဧည့်သည် နည်းပါးသွားတော့ တောထဲမှာ သစ်ခုတ်ဝါးခုတ်ကြများတယ်။ ကျွန်တော်က ခရီးသွားရတာဝါသနာပါတော့ ဒီဘက်မှာ တောတွင်းအခြေပြု ခရီးစဥ်လေးတွေဖော်ဆောင်ပေးချင်စိတ်ဖြစ်လာတယ်။နောက်ပြီး ဒေသခံတွေကို လည်း ဝင်ငွေရစေမယ်။ တောကို မှီခိုပြီး သစ်တောကို ရေရှည်ပြန်ထိန်းသိမ်းချင်တယ်။ အဲဒီလိုလေးနဲ့ အခုလို Forest House ကို ဖော်ဆောင်ခဲ့တာပါ လို့ Founder တစ်ဦးဖြစ်သူ ဦး အောင်ပြည့်စုံ က Travelling သို့ ပြောသည်။

ထို့အပွငျ တောတွင်း Camping Site နှစ်နေရာကို ဆက်လက် ပြုလုပ်သွားမှာဖြစ်ပြီးအဆိုပါ Camping Site တွေကို ကျောက်ဖြူတောင်ပေါ်၌ ဆက်လက်ဖော်ဆောင်သွားမည်ဖြစ်ကြောင်းသိရသည်။

အဆိုပါ ကျောက်ဖြူတောင်ပေါ် မှ နေဝင်နေထွက်တာ ကို တစ်နေရာတည်းကနေ ကြည့်လို့ရနိုင်သလို ကျိုက်ထိုမြို့နှင့် စစ်တောင်းမြစ်ကိုလည်း မြင်တွေ့နိုင်ကြောင်း သိရသည်။

Photo Aung Pyae Sone

Travelling Journal

မြန်မာနိုင်ငံဆိုင်ရာထိုင်းသံရုံးမှ ဗီဇာလျှောက်ထားခြင်းနှင့်ပတ်သက်၍ ယနေ့ ဖေဖော်ဝါရီ ၁၆ ရက်မှစတင်ကာ ဖေဖော်ဝါရီ ၁၉ ၊ ဖေဖော်ဝါရီ ၂၀ နှင့် ဖေဖော်ဝါရီ ၂၁ ရက်နေ့ထိ ဗီဇာလျှောက်ထားခြင်းအတွက် တိုကင်နံပတ်များကို ကြိုတင်လာရောက်ယူနိုင်မည်​ဖြစ်ပြီး တစ်ရက်လျှင် ဗီဇာလျှောက်ထားသူအရေအတွက် လူဦးရေ ၄၀၀ သာလက်ခံမည်ဖြစ်ကြောင်း သံရုံးမှထုတ်ပြန်ထားသည်။

ဗီဇာလျှောက်ထားလိုသူသည်မိမိကိုယ်ပိုင်ပတ်စပို့စ်ကို ထုတ်ပြရမည်ဖြစ်ပြီး လူတစ်ဦးကို တိုကင်နံပတ်တစ်ခုသာထုတ်ဝေပေးမည်​​ ​ဖြစ်ကာ ယင်းတိုကင်နံပတ်ကိုတခြားသူထံလွှဲပြောင်းပေး၍ မရကြောင်းနှင့်တိုကင်နံပတ်အတုလုပ်ခြင်းနှင့် တခြားသူထံလွှဲပြောင်းခြင်းကိုစစ်ဆေးတွေ့ရှိပါက အမည်ပျက်စာရင်းသွင်းမည်​​ဖြစ်ကြောင်း သံရုံးထုတ်ပြန်ချက်အရ သိရသည်။

ဖေဖော်ဝါရီ ၂၁ ရက်နောက်ပိုင်း ဗီဇာ လျှောက်ထားခြင်းများနှင့်ပတ်သက်၍လက်ခံ​ဆောင်ရွက်မည့်နည်းလမ်းများကိုထုတ်ပြန်ပေးသွားမည်​​ ဖြစ်ပြီး မြန်မာနိုင်ငံသား ပတ်စပို့စ်ကိုင်ဆောင်ထားသူများသည် ထိုင်းနိုင်ငံသို့လည်ပတ်ရာတွင် ၁၄ ရက်ထက်မကျော်ပါက ဗီဇာလျှောက်ထားရန်မလိုပဲ ဝင်ရောက်လည်ပတ်နိုင်ကြောင်းသံရုံးမှထုတ်ပြန်ထားသည်။

ထို့ပြင် ထိုင်းဗီဇာဝန်ဆောင်မှု လုပ်ကိုင်ရန်အတွက် ရန်ကုန်အ​​ခြေစိုက် မြန်မာခရီးသွားကုမ္ပဏီ ၂၀ ကျော် ကိုလည်း ထိုင်းသံရုံးမှ ကိုယ်စားပြု လုပ်ကိုင်ခွင့်ကိုလည်း ပေးထားပြီး ဖြစ်ကြောင်း Travelling တွင်ဖော်ပြထားပြီး ​ဖြစ်သည်။

“အစ်မတို့ တင်ပေးပြီး အစ်မတို့ပဲ သံရုံးမှာ ပြန်ယူပေးရတာပါ”။Visa fees က တော့ Tourist visa ဆိုရင် USD 40 ပါ ။ကိုယ်တိုင်သွားဖို့ အခက်အခဲ ရှိတဲ့ ခရီးသည်တွေ အစ်မတို့ဆီက တဆင့် တင်မယ်ဆိုရင် လူလိုက်စရာ မလိုဘူးပေါ့နော်။ တကယ်လို့ ခရီးသည်က ကိုယ်တိုင်တင်ချင်ရင်လည်း တင်လို့ရပါတယ်။ မနက် ၈ နာရီ တန်းစီပြီး ဝင်ရတယ်။
Passport က ပြန်ရတာ working days 3 ရက် ပြီးမှ ပြန်ရတာပါ ။ အစ်မတို့ဆီဆိုရင်တော့ အဲဒါတွေ လုပ်စရာ မလိုပါဘူး “ဟု Htoo Travels မှ တာဝန်ရှိသူ က Travelling သို့ပြောသည် ။

Travelling Journal

ယခင်က နေ့ချင်းပြန်လှည်ပတ်ခွင့်သာ ခွင့်ပြုပေးထားသည့် ဆေးတံကျွန်းတွင် ညအိပ်အပန်း ဖြေတည်းခိုခြင်းကို တရားဝင်ခွင့်ပြုပေးလိုက်ပြီ ဖြစ်ကြောင်း တနင်္သာရီတိုင်းဒေသကြီး ဟိုတယ်နှင့်ခရီးသွားညွန်ကြားမှုဦးစီးဌာနမှ ဒုတိယညွှန်ကြားရေးမှူးဖြစ်သူ ဦးလွှမ်းမိုးကTravelling သို့ပြောသည်။

“လိုင်စင်ရလို့ ညအိပ်အပန်းဖြေခွင့်ကိုခွင့်ပြုပေးလိုက်ပါပြီ ” ဒုတိယညွှန်ကြားရေးမှူးဦးလွှမ်းမိုးက Travelling သို့ပြောသည်။

လက်ရှိ ဆေးတံကျွန်းပေါ်တွင် Good Shan Brothers ကုမ္ပဏီမှ Saytan Island Hotel အမည်ရှိသည့် ဟိုတယ်ကို တည်ဆောက်ထားပြီး လက်ရှိတွင် အခန်းပေါင်း(၃၀ ) ရှိကြောင်း သိရသည်။

ကော့သောင်းမြို့၏ ကျွန်းများစွာထဲ၌ သဲအနူးညံ့ဆုံး နှင့်သဲအဖြူဆုံးကျွန်းထဲတွင် တစ်ခုပါဝင်ပြီး ကော့သောင်း နေ့ချင်းပြန် လှည်ပတ်ခရီးစဥ်များထဲ၌ လူအသိများဆုံး ကျွန်းဖြစ်ကြောင်း ကော့သောင်း အခြေစိုက်ခရီးသွားကုမ္ပဏီများမှ တာဝန်ရှိသူ များက Travelling သို့ပြောသည်။

“၂၀၁၅ မှာ နေ့ချင်းပြန် ခရီးစဥ်တွေ ခွင့်ပြုပေးတုန်းက အသည်းပုံကျွန်းနဲ့ ဇာဒက်အော်ကို လည်ပတ်တယ်။ နေ့လည်စာကို ဆေးတံကျွန်း မှာ စားသောက်ရတယ်။ အဲလိုပုံစံနဲ့နေ့ချင်းပြန်စတင်ကတည်းက ဆေးတံကျွန်း က လူအသိအများဆုံးကျွန်း ဖြစ်ခဲ့ရတာပါ “ဟု ဒုတိယညွှန်ကြားရေးမှူးဖြစ်သူ ဦးလွှမ်းမိုးက Travelling သို့ပြောသည်။

ဆေးတံကျွန်း၏ ၂မိုင် အကွာတွင် Snorkeling
ပြုလုပ်ရန် အလွန်ကောင်းမွန် သည့် ငါးမျိုးစုံမျိုးကွဲများ၊ nemo ငါးများ၊ ဂျယ်လီငါးများနှင့် အခြားသော ရေနေသတ္တဝါမျိုးစုံကိုလည်း တွေ့ရနိုင်ကြောင်း သိရသည်။

အဆိုပါ ဆေးတံကျွန်း ကို CB ဘဏ် အုပ်စုလက်အောက်ရှိ Good Shan Brothers ကုမ္ပဏီမှဟိုတယ် စီမံကိန်း ကို အကောင်အထည်ဖော်
ဆောင်ရွက်နေကြောင်း သိရသည်။

News

Saytan Island

Photo-UHlwanMoe

Travelling journal

ပန်းမြို့တော်ဟု တင်စားခေါ်ဝေါ်ကြသည့် ပြင်ဦးလွင်မြို့တွင် ဂျပန်ရိုးရာစတိုင် ဂျပန်အငွေ့အသက်များဖြင့် ခြုံလွှမ်းထားသည့် Japanese Style Recreation Center ကို ပထမဆုံး ဖွင့်လှစ်သွားမည်​ ​ ဖြစ်ကြောင်း သိရသည်။

ဂျပန်ရိုးရာ စတိုင် ရိုက်ကူးနိုင်မည့် Japanese Style Recreation Center ၏ Soft Opening ဖွင့်ပွဲကို လာမည့်ဖေဖော်ဝါရီ ၉ ရက်တွင် ဖွင့်လှစ် သွားမည်ဖြစ်ကြောင်း သိရသည်။

Japanese Style Recreation Center သို့ဝင်ကြေးအနေဖြင့် တစ်ဦးလျှင် ကျပ် ၅၀၀၀ သတ်မှတ်ထားပြီး ငါးနှစ်အောက် ကလေးများကို ဝင်ကြေးအခမဲ့သတ်မှတ်ထားကာ Prewedding Camera ရိုက် ကူးမည်ဆိုပါက တစ်နာရီကို ကျပ်(၅)သိန်း၊ ကင်မရာ တစ်လုံးလျှင် ကျပ်ငါးသောင်းပေးဆောင်ရမည်ဖြစ်ကြောင်း Japanese Style Recreation Center ၏ ဖေ့ဘုတ် စာမျက်နှာ တွင် ဖော်ပြထားသည်။

Japanese Style Recreation Center ကို ပြင်ဦးလွင် မြို့ နှင့် ၁၀ မိုင်ကျော် ကွာဝေးသည့် ပိတ်ချင်းမြောင် လမ်းမကြီးဘေးတွင် အကောင်အထည်ဖော်ဆောင်ရွက်နေပြီး လက်ရှိတွင် အဆိုပါစင်တာကို အလည်အပတ်နှင့် ဓာတ်ပုံံရိုက်သီးသန့်ကိုသာဝန်ဆောင်မှု ပေးထားပြီး ညအိပ် တည်းခိုခွင့်ကို ခွင့်မပြုထားသေးကြောင်း သိရသည် ။

“ကျွန်မတို့မြို့မှာ အခုလို လည်စရာပတ်စရာနေရာတစ်ခုကို ဖန်တီးပေးလာတော့ အရမ်းဝမ်းသာပါတယ်။ စိတ် ကူးလည်းကောင်းတယ်။ ဂျပန်ကနေပြန်လာပြီး သူငယ်ချင်းတွေစုပြီး အခုလိုမျိုး အကောင်အထည်ဖော်ဖြစ်သွားတာလို့သိရပါတယ်။
ချယ်ရီပင်ကိုတောင် နိုင်ငံခြားကနေ သိန်းတစ်ထောင်ကျော်ဖိုးမှာပြီး စိုက်ပျိုးထားတယ်လို့
Japanese Style Recreation Center ကိုအကောင်အထည်ဖော်သည့် ဒေသခံများနှင့်
နီးစပ်သည့် ပြင်ဦးလွင် ဒေသခံ လုပ်ငန်း ရှင်တစ်ဦးက Travelling သို့ ပြောသည်။

အဆိုပါ Centerကို ဂျပန်ပြည်သို့ ရောက်ရှိသွားသည့် ခံစားမှုမျိုးဖြစ်အောင် ဖန်တီးဆောင်ရွက်ထားကြောင်းသိရသည်။

“ကျွန်တော်ကတော့ ဒီလ၂ ရက်နေ့က သွားလည်ဖြစ်ခဲ့တာပါ။ ဖွင့်ပွဲကတော့ ၉ ရက်နေ့မှလို့ပြောပါတယ်။ ဓာတ်ပုံ ရိုက်ကူးဖို့လုပ်ပေးထားတဲ့နေရာ လေးတွေလုပ်ထားတာတော့ကောင်းပါတယ်။ မြန်မြန်လည်ပတ်ခဲ့ရတော့ သိပ်မပြောတတ်ဘူးဗျှ “လို့ မန္တလေး ဒေသခံ ဦးပြည့်ဖြိုးကျော်က Travelling သို့ပြောသည်။

ပြင်ဦးလွင်မြို့သည် ကြည့်စရာ၊ လေ့လာစရာ၊ လည်ပတ်စရာနေရာတွေများပြားလှသည့် Destination ဒေသတစ်ခုဖြစ်ပြီး ထင်ရှားသည့် နေရာများမှာ အမျိုးသား ကန်တော်ကြီး ဥယျာဥ်၊ ဘုရင်ခံအိမ် (ခေါ်) Governors House ၊ ဓါတ်တော်ချိုင့်ရေတံခွန်၊ Fame Organic Project ၊ ပိတ်ချင်းမြောင်၊ ဒီဇင်ဘာခြံ ၊ ဘန့်ဘွေးကျင်းရေတံခွန် ၊ ဒိုင်နိုဆောဥယျာဥ် ၊ ပွဲကောက်ရေတံခွန် တို့ကို ပြည်တွင်း ခရီးသွား ဧည့်သည် များ အများဆုံး သွားရောက်လည်ပတ် ကြကြောင်းသိရသည်။

Travelling journal

News

ပုံ-စာ ပြင်ဦးလွင် မြို့က Japanese Style Recreation Center ကို ဖေဖော်ဝါရီ ၂ ရက်နေ့က သွားရောက်လည်ပတ် ခဲ့သည့် မြင်ကွင်းကို တွေ့ရစဥ်။
ဓာတ်ပုံ ကိုပြည့်ဖြိုးကျော်

Travelling journal

ကချင်ပြည်နယ်၊ ပူတာအိုခရိုင်၊ ခေါင်လန်ဖူးမြို့နယ်အတွင်းမှ ရေခဲပြင်ရွာကလေးဖြစ်သည့် ရှိန်းခေါင်ကျေးရွာသည် နိုဝင်ဘာ ၆ ရက် ညသန်းခေါင်ဝန်းကျင်မှစတင်ပြီး ယနေ့ နံနက်ပိုင်းထိ တစ်ရွာလုံးနီးပါး မီးလောင်ခဲ့ကြောင်း ဒေသခံများက Travelling Journal သို့ ပြောသည်။

“မနေ့က ညသန်းခေါင်လောက်ကတည်းကမီးလောင်တယ်လို့ပြောလာတယ်။ အေးတဲ့ဒေသမို့အိမ်တိုင်းမှာ ဂွမ်းစောင်တွေ တော်တော်များများရှိကြတယ်။မီးငြိမ်းသတ်ဖို့သွားမယ့်သူတွေလည်းမရောက်နိုင်တဲ့နေရာမို့ တစ်ညလုံး တမြည့်မြည့်နဲ့လောင်ကျွမ်းကုန်တာပါ။ အဓိက တော့ ဒီဒေသရဲ့အဓိက ထွက်ကုန်ရှောက်ကော ဂိုဒေါင်တွေမီးထဲပါကုန်တယ်။ စာသင်ကျောင်းရောစျေးရောအကုန်ပါကုန်တယ်။လက်ရှိအခြေအနေအထိ မီးလောင်တဲ့အိမ်စာရင်းကောက်တာ (၆၃) အိမ်ပါသွားတယ် ။ ထပ်မံပြီးကောက်နေတုန်းပဲ”ဟု ပူတာအိုဒေသခံ တစ်ဦးက Travelling သို့ပြောသည်။

ရှိန်းခေါင်ရွာ ၏အလှပဆုံးအချိန်မှာဆောင်းရာသီအလယ်မှ နွေဦးပေါက်အထိ ရေခဲနေပြီး လှပသည့်မြင်ကွင်းကို မြင်တွေ့ရနိုင်သော်လည်းလက်ရှိတွင် တစ်ရွာလုံးမီးလောင်ပြာကျခဲ့သဖြင့်စိတ်ထိခိုက်ရပြီး ဒေသခံများကိုသွားရောက်ကူညီပေးဖို့တောင်အခက်အခဲများရှိနေကြောင်းမြစ်ကြီးနား​ အခြေစိုက် ခရီးသွား ကုမ္ပဏီ တစ်ခုမှ တာဝန်ရှိသူ က ပြောသည်။

ရှိန်းခေါင်ကျေးရွာမှာ အရမ်းလှပသည့် ရေခဲပြင် ရွာကလေးဖြစ်ပြီး တောင်ပတ်လည်ဝန်းရံထားသောကျေးရွာဖြစ်ကာလမ်းပန်း ဆက်သွယ်ရေး ခက်ခဲသဖြင့်လက်ရှိအနေအထားအထိ ခရီးသွားလာမှုမှာ အနည်းအကျဥ်းလောက်သာရှိသေးသည့် ကျေးရွာဖြစ်သည်။

“အခုကျွန်မတို့ စားနပ်ရိက္ခာတွေပို့ပေးဖို့ပြင်ဆင်နေတယ်။ ပူတာအို ခေါင်လန်ဖူး ရှိန်းခေါင်ရွာကိုသွားမယ်ဆိုရင် အနည်းဆုံး၁၀ ရက်လောက်ကြာမယ်။ ဆိုင်ကယ်လမ်းကြောင်းကနေသွားဖို့တော့လုပ်နေပါတယ်။ တရုတ်ဘက်ကလမ်းကြောင်းဆိုပိုမြန်တော့ တရုတ် ဘက်ကိုလည်းအကူညီပေးဖို့လှမ်းအကြောင်းကြားထားပါတယ်”ဟု မြစ်ကြီးနား ဒေသ ခံ ဒေါ်ရွှေရွေမြင့်က Travelling သို့ပြောသည်။

Photo-ဒေသခံ

Travelling journal

ထင်းရှုးမြို့တော်အဖြစ် နာမည်ကျော်ကြားသည့် ကလောမြို့၏ မြို့ရှုခင်းအလှနှင့်ပနံသင့်မည့် Sightseen Photo ပြုလုပ်နိုင်သည့် ဥယျာဥ် တစ်ခုပေါ်ထွက်လာတော့မည် ဖြစ်ကြောင်း အဖေခြံနှင့်ပန်းပျိုးဥယျာဥ်ကို တည်ထောင်သူ ဦးအောင်လှိုင်ထူး က Travelling သို့ ပြောသည်။

အဖေခြံနှင့်ပန်းပျိုးဥယျာဥ်ကို သစ်တောမြေဧက ၃၀ ပေါ်တွင် ဖော်ဆောင်ထားပြီး ကော်ဖီ စိုက်ခင်းနှင့် စားသောက်ဆိုင်အပြင် ပြည်တွင်းပြည်ပပန်းမျိုးစိတ်ပေါင်း( ၁၀၀) ကျော်ကို စိုက်ပျိုးထားရှိကြောင်းသိရသည်။

” အများစုက အမေ့အိမ်တို့ အဲလိုမျိုးပေးကြတာရှိတယ်။အဖေခြံလို့ပေးတာသိပ်မရှိလို့ ဒီနာမည်လေးပေးဖြစ်ခဲ့ပါတယ် “ဟု အဖေခြံနှင့်ပန်းပျိုးဥယျာဥ်ကို တည်ထောင်သူ ဦးအောင်လှိုင်ထူး က Travelling သို့ ပြောသည်။

အဆိုပါ အဖေခြံနှင့်ပန်းပျိုးဥယျာဥ်ကို သုမောင်ထမင်းဆိုင်ဘေးနားရှိ သိမ်တောင်ဘုန်းကြီးကျောင်းမှတဆင့် လာရောက်နိုင်သလို အိုးစည်တောင် အနောက်ဘက်ကားလမ်းကြောင်းမှတဆင့် လာရောက်နိုင်ကြောင်း သိရသည်။

အဆိုပါဥယျာဥ်ကို မနောလှဘုရားနှင့် မနီးမဝေးတွင်ကပ်လျက် ဖော်ဆောင်ထားကြောင်း သိရသည်။

“ပျိုးဥယျာဥ်ကတော့ နှစ်ဧကပဲ လက်ရှိစိုက်ထားပါတယ်။ ခြောက်လခံပန်းနဲ့ရွှေဒဂ်ါး ယပန်းကတော့များပါတယ်။ ကျွန်တော်တို့ပျိုးဥယျာဥ်ကိုလာရောက်ပြီးပန်းပျိုးပင်တွေကို လာရောက်ဝယ်နိုင်ပါတယ်”ဟု ဦးအောင်လှိုင်ထူး က Travelling သို့ ပြောသည်။

အဆိုပါ အဖေခြံနှင့်ပန်းပျိုးဥယျာဥ်ကို လာမည့် အောက်တိုဘာ၂၅ ရက်အမှီ ဖွင့်လှစ်မည် ဖြစ်ပြီး ဝင်ကြေးအနေဖြင့် လူတစ်ဦးကို ကျပ်တစ်ထောင် ကောက်ခံမည်ဖြစ်ကာ ပန်းခင်းဖြင့် ဓာတ်ပုံအလှရိုက်ကူးနိုင်ခြင်းနှင့် အေးအေး လူလူအနားယူပြီးစားသောက်နေနိင်ရန်စားသောက်ဆိုင်ကိုပါ တွဲဖက် ဖွင့်လှစ်ထားကြောင်းသိရသည်။

“ကလောမှာဆိုရင် မနောလှတောင်ကနာမည်ကြီးပြီးသား။ မသိတဲ့သူ မရှိသလောက်ပါပဲ။ဒီနေရာလေးက သွားလာရတာအချက်အချာလည်းကျတယ်။ အိုးစည်တောင် အနောက်ဘက်လမ်းကနေလာရင် အဖေခြံကိုရောက်တယ်။ အိုးစည်တောင်ပေါ်ကနေလည်းကြည့်လို့မြင်ရတယ်။ အားသာချက်က ကလောမြို့မှာ စတော်ဘယ်ရီခြံ မရှိဘူး။ ဒီထဲမှာ စတော်ဘယ်ရီစိုက်ခင်းအများကြီး။ ပြီးတော့အသီးအနှံအကုန်လုံးက အော်ဂဲနစ်တွေ။ ဆောင်းတွင်းနဲ့နွေရာသီဆို အဖေ့ခြံက ပိုပြီးလှတယ်။ ကားကြီးကားသေးကောလာလို့ရတာမို့ အားသာချက်တွေများတယ် “လို့ ကလောဒေသခံ ဦးတင်စိုးအောင်က Travelling သို့ သူ၏ အမြင်ကိုပြောသည်။

လက်ရှိတွင် ကလောမြို့တွင် Sun rise နှင့် Sunset ကြည့်လို့ရသည့် ဓာတ်ပုံရှုခင်းအသားပေးနေရာများကိုဖော်ဆောင်ထားသည့် နေရာ (၂၀ )နီးပါးရှိလာပြီဖြစ်ကြောင်းသိရသည်။

Photo Tin Soe Aung

Travelling Journal

နာမည်ကျော်ကမ်းခြေ တစ်ခုဖြစ်သည့် ငပလီကမ်းခြေ၏ အဘဲရွာတွင် တောင်ပေါ်ရှုခင်းကြည့်သည့် ပထမဆုံး Camping Site အသစ်တစ်ခုကို ဖော်ဆောင်နေကြောင်း ဖော်ဆောင်သူ ဦးဝေယံက Travelling သို့ ပြောသည်။

အဆိုပါ Camping Site ကို Mini Camping ပုံစံမျိုးဖော်ဆောင်ထားပြီး လင့်စင် ၊ ရွက်ဖျင်တဲ ၊ ဒါန်း ၊ဝါးထိုင်ခုံများပါ ထည့်သွင်းထားကြောင်းသိရသည်။

” ကျွန်တော်တို့ အခု Tent လေးလုံးနဲ့ စထားပါတယ်။ နေ့ချင်းပြန် ခရီးစဥ် အတွက် ကြို/ပို့ အပါအဝင် နေ့လည်စာအပါ ငါးယောက်တစ်ဖွဲ့ ကို ကျပ်တစ်သိန်းဝန်းကျင် သတ်မှတ်ထားပါတယ် “ဟု ဦးဝေယံက Travelling သို့ ပြောသည်။

အဆိုပါ နေ့ချင်းပြန်ခရီးစဥ်တွင် အဘဲရွာကို Sightseen ကြည့်ရှုခြင်းနှင့် ငါးမျှားခြင်းစသည့် Activity များလည်း ပါဝင်ကြောင်း သိရသည်။

အဘဲရွာသည် အိမ်ခြေ ၅၀ ပတ်ဝန်းကျင်ရှိပြီး ဒေသခံများ၏ အဓိကအသက် မွေးဝမ်းကျောင်း လုပ်ငန်းမှာ လယ်ယာစိုက်ပျိုးရေး နှင့် မိရိုးဖလာ တံငါလုပ်ငန်းကိုလုပ်ကိုင်ကြောင်းဖော်ဆောင်သူ ဒေသခံ ဦးဝေယံက ပြောသည်။

လက်ရှိတွင် ငပလီကမ်းခြေကို အမှီပြုပြီး ရင်းနှီးမြုပ်နှံထားသည့် ဟိုတယ်/တည်းခိုခန်းအလုံးရေ ၅၀ ဝန်းကျင်ရှိပြီး ဧည့်သည် အများစုမှာ Blue Lagoon, Safari beach (snorkeling place), Floating bridge, Paradise beach Fisherman village, White sand island, Light house, Pearl island တို့ကို အများဆုံး သွားရောက်လည်ပတ်ကြကြောင်း သိရသည်။

Photo Ko Wai Yan

Travelling Journal

ပြည်တွင်းကုမ္ပဏီတစ်ခု​ဖြစ်သည့် Moken Capital ကုမ္ပဏီ လက်အောက်ရှိ အပျော်စီးဇိမ်ခံသင်္ဘော Moken Cruise မှ ရန်ကုန် -ချောင်းသာ ခရီးစဥ်ကို ပထမဆုံး ပြေးဆွဲပေးသွားမည်ဖြစ်ကြောင်း Moken Cruise ၏ တာဝန်ရှိသူ တစ်ဦးက Travelling သို့ ပြောသည်။

“လက်ရှိက ရာသီဥတုအနေအထားကို ခန့်မှန်းထားနေတာမို့ ထွက်မဲ့ရက်အတိအကျကို သေချာမပြောနိုင်ဖြစ်နေတာပါ။ သေချာတာကတော့ သီတင်းကျွတ်အမှီတော့ ပြေးဆွဲမှာပါ “ဟု Moken Cruise ၏ တာဝန်ရှိသူ တစ်ဦးက Travelling သို့ ပြောသည်။

ပြည်တွင်းခရီးသွားစျေးကွက် ဝေစုရရှိထားသည့်ချောင်းသာကမ်းခြေသို့ ပထမဆုံးပြေးဆွဲပေးခြင်းဖြစ်ပြီး ချောင်းသာကမ်းခြေ အခြေစိုက်ကာ ကျွန်းပတ်ခရီးစဥ်များကို ဧပြီလအထိ ​ပြေးဆွဲသွားမည်ဖြစ်ကြောင်း သိရသည်။

အထူးခရီးစဥ် အနေဖြင့် ရန်ကုန်-ချောင်းသာ (၂) ညအိပ် (၃) ရက် ခရီးစဥ်အတွက် Suite Cabin with Private Bathroom နှစ်ယောက်အိပ်ခန်းကို တည်းခိုမည်ဆိုပါက ကျပ် (၁၅) သိန်း ကျသင့်မည်ဖြစ်ပြီး သုံးယောက်အိပ်ခန်း ကို တည်းခိုမည်ဆိုပါက ကျပ် (၁၄)သိန်း ကျသင့်မည်ဖြစ်ကြောင်း သိရသည်။

အဆိုပါ သင်္ဘောပေါ်တွင် စုစုပေါင်း အိပ်ခန်း(၅) ခန်းပါဝင်ပြီး လူဦးရေ( ၁၃ )ဦးသာ တည်းခိုနိုင်ကြောင်း သိရသည်။

ယင်းခရီးစဥ်အတွက် နံနက်စာ ၊ နေ့လည်စာ ၊
ညစာ အခမဲ့ သုံးဆောင်နိုင်ရန် စီစဉ်ထားပေးခြင်းနှင့် ကာရာအိုကေ အခမဲ့ သီဆိုနိုင်ခြင်း၊ Onboard Kitchen နှင့် Onboard Bar လည်း ပါဝင်ကြောင်းသိရသည်။

အဆိုပါ ရေကြောင်းခရီးစဉ်အတွင်း တွံတေးမြို နှင့် တွံတေးတူးမြောင်းရှိ သဘာဝရှုခင်းများကြည့်ရှုနိုင်ခြင်း ၊ ဧရာဝတီ ၏ (Delta Region) သဘာဝ အလှတရားများနှင့် နေဝင်ချိန်ကို cruise ပေါ်မှ ခံစားကြည်ရှုခြင်း ၊မော်တင်စွန်း တန်ခိုးကြီးဘုရားအား သွားရောက်ဖူးမြော်ခြင်း၊ ဟိုင်းကြီးကျွန်းသို့ သွားရောက်လည်ပတ်ခြင်း ၊ ဂေါ်ရင်ဂျီကမ်းခြေသို့ သွားရောက် ကြည့်ရှုခြင်းနှင့် ချောင်းသာကမ်းခြေ လည်ပတ်ခြင်းတို့ကို ထည့်သွင်းထားကြောင်း သိရသည်။

“ချောင်းသာ ကျွန်းပတ်ခရီးစဥ်ကတော့ စျေးနှုန်း ကိုမတွက်ချက်ရသေးပါဘူး။ အဲဒီမှာပြေးဆွဲပေးနေတဲ့ Speed Boat တွေရဲ့စျေးနှုန်းတွေနဲ့လည်း ချိန်ကြည့်ရအုံးမှာပါ” ဟု Moken Cruise ၏ တာဝန်ရှိသူ တစ်ဦးက Travelling သို့ ပြောသည်။

အဆိုပါ အပျော်စီးဇိမ်ခံသင်္ဘော Moken Cruise သည်ချောင်းသာတွင် အ​ ​ခြေစိုက်ပြီး ဂေါ်ရန်ဂျီကျွန်း ၊ လိပ်ကျွန်း ၊ ငှက်ကျွန်း စသည့် ကျွန်းပတ်ခရီးစဥ်များကို ပြေးဆွဲပေးသွားမည်ဖြစ်ကြောင်းသိရသည်။

Photo-MokenCruise

Travelling Journal

ပုဂ္ဂလိကခရီးသွားလုပ်ငန်းကဏ္ဍကို ကိုယ်စားပြုပြီးဖွဲ့စည်းထားသည့် မြန်မာနိုင်ငံခရီးသွား လုပ်ငန်းအဖွဲ့ချုပ်၏ ၂၀၂၃ -၂၀၂၆ ခုနှစ်သက်တမ်းအတွက် အလုပ်အမှုဆောင် ပြန်လည် ရွေးချယ်တင်မြှောက်ခဲ့ရာ ဥက္ကဋ္ဌ အဖြစ် ဦးရန်ဝင်း ပြန်လည်ရွေးချယ်ခံခဲ့ရသည်။

ယင်းနောက်တွင် ညီနောင်အသင်းသားအစုအဖွဲ့​များမှ အလုပ်အမှုဆောင်များကို Opa Vote ဖြင့် ဆန္ဒမဲထည့်ကြပြီးနောက် ဦးမျိုးဝင်းသန်း ဒု-ဥက္ကဋ္ဌ (၁) ၊ ဦးလူမွန် ဒု-ဥက္ကဋ္ဌ (၂) ၊ ဦးကျော်မင်းထင် ဒု-ဥက္ကဋ္ဌ (၃) ၊ ဦးနောင်းနောင်းဟန် ဒု-ဥက္ကဋ္ဌ (၄) ၊ ဦးမျိုးသွင် ဒု-ဥက္ကဋ္ဌ (၅) ၊ ဦးအောင်မျိုးမင်းဒင် ဒု-ဥက္ကဋ္ဌ (၆) ၊ ဦးသန်းထွဋ် အထွေထွေအတွင်းရေးမှုူး ၊ ဦးကျော်မင်းလှိုင် တွဲဖက်အထွေထွေအတွင်းရေးမှူး (၁) ၊
ဦးကျော်ကျော်ဆင့် တွဲဖက်အထွေထွေ အတွင်းရေးမှူး(၂) ၊ ဦးကောင်းမင်းခန့် တွဲဖက်အထွေထွေ အတွင်းရေးမှူး (၃) ၊ ဦးလင်းထိန် တွဲဖက်အထွေထွေ အတွင်းရေးမှူး (၄) ၊ ဦးကျော် ဇေယျ တွဲဖက်အထွေထွေ အတွင်းရေးမှူး (၅) ၊ ဒေါ်နေရည်အောင်​တွဲဖက် အထွေထွေ အတွင်းရေးမှူး (၆) တို့ကိုရွေးချယ်ခဲ့ကြသည်။

ထို့​​နောက် ဘဏ္ဍာရေးမှူးအဖြစ်​ ဦးသန်းရွှေ ၊ ဒေါ်ခင်သိဂိီလှမောင် တွဲဖက် ဘဏ္ဍာရေးမှူး (၁) ၊ ဦးကျော်မင်းထိုက် တွဲဖက် ဘဏ္ဍာရေးမှူး (၂) ၊ ဦးမင်းသိန်း စာရင်း စစ် ၊ ဒေါ်မေသက်လွင် တွဲဖက်စာရင်းစစ် (၁) ၊ ဒေါ်အေးသီတာမိုး တွဲဖက်စာရင်းစစ်(၂) နှင့် ဗဟိုအလုပ်အမှုဆောင်များအဖြစ် ဒေါ်တင်မာမြင့် ၊ ဦးဖြိုးဇော်ဝေ ၊ ဒေါ်နှင်းသက်ကျော်နိုင် တို့ အား အသီးသီး ရွေးချယ်တင်မြှောက်ခဲ့ကြသည်။

အလုပ်အမှုဆောင်များအဖြစ် ဦးကျော်ဇေယျ (မန္တလေး) ၊ ဦးကျော်ဝင်း၊ ဒေါ်ခိုင်နွယ်သိန်း၊ဒေါ်စံမေခင်၊ဒေါ်စုမြတ်စန္ဒီဦး၊ ဦးဇာနည်တင်မြင့်၊ ဦးတင်မြင့် ၊ဦးတူးခေါင်၊ ဦးထွန်းလင်းသောင်း၊ဒေါ်နှင်းယိမ်းအောင် ၊ ဦးနေအောင်ကို ၊ဒေါ်ဖြူဖြူတင် ၊ ဦးမင်းအောင်မော်၊ ဦးမျိုးမင်းဇော် ၊ဦးမျိုးလွင် (ခ) ဦးမျိုးကြီး ၊ ဦးမျိုးသိန်းကျော်၊ ဦးမြင့်ဇော် ၊ ဦးမြင့်ထွေး( ခ) ဦးသာဓု ၊ဒေါ်မြတ်စုခိုင် ၊ ဦးမောင်မောင်အေး ၊ ဦးရဲဝင်း ၊ ဦးလှမြင့် ၊ ဦးဝင်းနိုင်ဦး ၊ ဦးသက်ထူးအောင်၊ ဦးသက်လွင်တိုး ၊ ဦးသန်းဌေး( ဒု ဥက္ကဋ္ဌ) ၊ ဦးသန်းဌေး( ဥက္ကဋ္ဌ) တို့ဖြင့် အသီးသီးပြန်လည် ဖွဲ့စည်းခဲ့သည်။

အဆိုပါ အလုပ်အမှုဆောင်များရေွးချယ်ပွဲကို အောက်တိုဘာ ၁၄ ရက် က အင်းယားလိတ် ဟိုတယ် ၊ Mingalar Ball Room ၌ ကျင်းပခဲ့
ခြင်းဖြစ်သည်။

မြန်မာနိုင်ငံခရီးသွားလုပ်ငန်းအဖွဲ့ချုပ်သည် မြန်မာနိုင်ငံခရီးသွားလုပ်ငန်းဖွံ့ဖြိုးတိုးတက်ရေးနှင့် ခရီးသွားလုပ်ငန်းဆက်စပ်ညီနောင်အသင်းများနှင့် ပူးပေါင်းဆောင်ရွက်ထားသည့် အဖွဲ့ချုပ် တစ်ခုဖြစ်ကြောင်းသိရသည်။

Travelling Journal

ရှမ်းပြည်နယ် မြောက်ပိုင်း၊ နောင်ချိုမြို့၊ မဲပုတ်ကျေးရွာ အနီးတွင် ရောင်စုံဘန်ဂလိုများ ပါဝင်သည့်ဒုဋ္ဌဝတီ တိမ်ပင်လယ် အပန်းဖြေစခန်းကို မကြာခင်ဖွင့်လှစ်သွားမည်ဖြစ်ကြောင်း အပန်း ဖြေစခန်းပိုင်ရှင် ဦးဖြိုးဝေလင်းက Travelling သို့ ပြောသည်။

ဒုဋ္ဌဝတီတိမ်ပင်လယ် အပန်းဖြေ စခန်းသစ် နှင့်ဟိုတယ်ကို မြေဧက ၅ ဧက နီး ပေါ်တွင် တည်ဆောက် ထားတာဖြစ်ပြီး မြင်းစီးကွင်း ၊ စက်ဘီးစီးကွင်း ၊ပန်းခြံအပြင် နာနတ်သီးစိုက်ခင်းကိုပါ ထည့်သွင်းစိုက်ပျိုးထားကြောင်း အပန်းဖြေစခန်းသစ်တွင် ပူးတွဲရင်းနှီးမြုပ်နှံသူ ဦးသိန်းလွင်ဦး က Travelling သို့ ပြောသည်။

” မဲပုတ်ကျေးရွာမှာ ဖွင့်ထားတဲ့ ဒုဋ္ဌဝတီတိမ်ပင်လယ် အပန်းဖြေစခန်းကတော့ Luxury Type ပုံစံဘက် သွားတယ်လို့မြင်မိပါတယ်။ ပန်းပင်တွေကိုလည်းသပ်သပ်ရပ်ရပ်လေးနဲ့လှအောင်လုပ်ထားတယ်။ မေမြို့ View ကိုခံစားရနိုင်တဲ့ခံစားမှုမျိုးလေးရတယ်။ နောင်ချိုကြီးက တိမ်ပင်လယ်တွေ နဲ့မတူညီတဲ့ ရသတစ်မျိုးကို ရရှိစေတယ်လို့ စိတ်မှာခံစားစေရပါတယ်။ တိမ်ပင်လယ် ကိုသွားတဲ့လမ်းကတော့မြေနီလမ်းဆိုပေမယ့် အရမ်းကြီးတော့လမ်း သိပ်မကောင်းသေးပါဘူးလို့ စက်တင်ဘာ ၁၇ ရက်က သွားရောက်လည်ပတ်ခဲ့တဲ့ နောင်ချိုမြို့က ဒေသခံ တစ်ဦးဖြစ်သူ ခရီးသွားအမျိုးသမီး တစ်ဦးက သူ၏ အတွေ့အကြုံ ကို Travelling သို့ ပြောသည်။

လက်ရှိတွင် ရွက်ဖျင်တဲ အလုံး (၁၁)နှင့် ရောင်စုံ
ဘန်ဂလို လုံးချင်းအိမ်(၁၄) ​လုံးကို ဖွင့် လှစ်ထားပြီးစုစုပေါင်း( ၂၅) လုံးရှိ ကြောင်း သိရသည်။

လေးယောက် နေထိုင်နိုင်သည့် ဘန်ဂလို တွင် ငှားရမ်းခ စျေးနှုန်း မှာ တစ်ညလျှင် ကျပ် နှစ်သိန်းနှင့် ရှစ်ယောက်နေထိုင်နိုင်သည့် ဘန်ဂလို စျေးနှုန်း မှာ ကျပ် သုံးသိန်းနှစ်သောင်း ၊ နှစ်ယောက်အိပ် Tent ​ဖြင့် ငှားရမ်းမည်ဆိုပါက ကျပ် ရှစ်သောင်း ကျသင့်မည် ဖြစ်ကြောင်း သိရသည်။

လက်ရှိတွင် နောင်ချိုကြီး ကျေးရွာ တွင် တိမ်ပင်လယ် ကြည့်လို့ရသည့် တိမ်ပင်လယ်စခန်းများမှာတိမ်ပင်လယ် ဦးထွန်းရွှေ ၊သတ္တမမြောက် ကောင်းကင်ဘုံ ၊ Cherry Hill Resort ၊ Sky Resort ၊ Cotton Hill ၊ ထင်ရှားမောင် တိမ်ပင်လယ် စခန်း၊Win Villa နှင့် Naykyar Villa စသည့် တိမ်ပင်လယ်စခန်း များကို ဖွင့်လှစ် ထားပြီးဖြစ်သော်လည်း မဲပုတ်ကျေးရွာ တွင် ဒုဋ္ဌဝတီ တိမ်ပင်လယ်စခန်းကို ပထမဆုံး ဖွင့်လှစ် ခြင်းဖြစ်ကြောင်း သိရသည်။

“တစ်ဧက နီးပါးပေါ်မှာ နာနတ်သီးစိုက်ခင်းကိုစိုက်ထားတာ အခုဆိုအသီးတွေသီးနေပါပြီ။ လာရောက်လည်ပတ်တဲ့ ဧည့်သည်တွေလည်းကိုယ်တိုင်ခူးပြီး ဖျော်ရည်လည်းသောက် သုံးနိုင်တဲ့အပြင် နာနတ်သီးစိုက်ခင်းနဲ့လည်းဓာတ်ပုံ တွဲရိုက်နိုင်လို့လည်းရတယ် “လို့ ပူးတွဲ ရင်းနှီးမြုပ်နှံသူ ဦးသိန်းလွင်ဦး က Travelling သို့ ပြောသည်။

နောင်ချိုကြီးတိမ်ပင်လယ်နားတွင်အစောပိုင်းက ဖွင့်လှစ် ရန် ရည်ရွယ်ခဲ့သော်လည်း ဓနုတိုင်းရင်းသားများနေထိုင်ကြသည့် မဲပုတ်ကျေးရွာတွင် တစ်ည ညအိပ်ခဲ့ပြီး တိမ်ပင်လယ်အလှကိုမြင်တွေ့ပြီးနောက် ယင်းနေရာတွင် ဖွင့် လှစ်ရန် အကောင်အထည် ဖော်ခဲ့ခြင်းဖြစ်ကြောင်း နောင်ချိုဒေသခံ လည်းဖြစ်သူ ဦးသိန်းလွင်ဦး က Travelling သို့ ပြောသည်။

ထို့ပြင်ဒေသ၏ခရီးသွားလုပ်ငန်းဖွံဖြိုးရေး၊ ကျေးလက်နေ ဒေသခံများအားအလုပ်အကိုင်ရရှိရေး ၊ တိမ်မြုတ်နေသည့် သဘာဝအလှပများကို နိုင်ငံတကာကို ပြသခွင့်နိုင်ရန်ရည်ရွယ် ချက်ဖြင့် ယင်းအပန်းဖြေစခန်းကို အကောင် အထည်ဖော် ဖွင့်လှစ် ရခြင်းဖြစ်ကြောင်း သိရသည်။

အပန်းဖြေ စခန်းသို့ လာရောက် လည်ပတ်ကြသည့် ခရီးသွားများအတွက် ထူးထူးခြားခြား အနေဖြင့်ကိန္ဒရီကိန္ဒာရာ အကအလှများ ၊ ရှမ်းအိုးစည် နှင့်ဓနုအကအလှများကို နေ့စဥ် ည၇ နာရီမှ ည၉ နာရီထိ ဖျော် ဖြေပေးသွားမည်ဖြစ်ကြောင်းသိရသည်။

ပေးရသည့် စျေးထက် လာရောက်တည်းခိုကြမည့်ခရီးသွားများအတွက် မတူညီတဲ့ခံစားမှုကိုရရှိစေရန်အပြင် ဧည့်သည် စိတ်ချမ်းမြေ့စေရေးကိုပါ အဓိက ထားပေးသွားမည်ဖြစ်ကြောင်း သိရသည်။

တိမ်ပင်လယ်အလှများကို အကောင်းဆုံး ကြည့်ရှုနိုင်သည့် ကာလမှာ နိုဝင်ဘာ၊ ဒီဇင်ဘာ၊ ဇန်နဝါရီလ စသည့်ဆောင်းရာသီတွင်သာ တိမ်ပင်လယ်ကို မြင်တွေ့နိုင်ပြီး တိမ်ပင်လယ်ကို မနက် ၅ နာရီကျော်မှစတင် ပြီး ၉ နာရီလောက်အထိ တိမ်ပင်လယ်အလှကို တွေ့မြင်နိုင်ကြောင်း သိရသည်။

Photo ဒုဋ္ဌဝတီ တိမ်ပင်လယ် အပန်းဖြေ စခန်း