#TravellingJournal

အင်းလေးကန်အတွင်း ရေဘေးသင့်ပြည်သူများအတွက် အင်းလေးအခြေစိုက်ဟိုတယ်တစ်ခုဖြစ်သည့် Amata Garden Resort မှ စားစရာနှင့် အခြေခံလိုအပ်ချက်များကို လှူဒါန်းပေးနေ ကြောင်း Amata ဟိုတယ်ပိုင်ရှင် က Travelling သို့ ပြောသည်။

ထို့ပြင် Amata Garden Resort, Inle Lake မှ
အင်းလေး ရေဘေးကူညီဆောင်ရွက်ပေးနေသည့် လူမှု့ကူညီကယ်ဆယ်ရေးအသင်းအဖွဲ့များဖြင့် ပူးပေါင်း၍သော်လည်းကောင်း တတ်စွမ်းသမျှ ကူညီဆောင်ရွက်သွားမည်ဖြစ်ကြောင်းသိရသည်။

” အလှူရှင်/ပရဟိတအသင်း လာလှူတဲ့လူတွေအတွက် ဟိုတယ်ကနေ လှေတွေ၊ကားတွေ ၊တည်းခိုဖို့ အခမဲ့စီစဉ်ပေးပါမယ်။ ကိုယ်နိုင်သလောက်က အရင်စပါမယ်။ အခုလက်ရှိကတော့ အဓိကစားစရာ၊ ရေ၊မုန့် အခြေခံချက်ချင်းလိုတာတွေကို ဟိုတယ်ကနေ ရေမြုပ်နေတဲ့ရွာတွေကို နေ့စဉ်ပေးပို့လှူဒါန်းနေပါတယ်။အခြားလှူချင်တဲ့သူရှိလာရင် ဟိုတယ်ဝန်ထမ်းတွေကတဆင့် လှူဒါန်းပေးသွားပါမယ် “ဟု Amata ဟိုတယ်ပိုင်ရှင် က Travelling သို့ ပြောသည်။

” ဦးဇင်းတို့ အင်းလေး ဟဲယာရွာမဘက်
ရေကြီးနေပါတယ်။လိုင်းလည်းမရပါဘူး။
လိုအပ်တာက သောက်ရေ နဲ့ ထင်း တွေ ကလည်းရေမြုပ်ကုန်တာကြောင့် ထင်းအစားထိုးလောင်စာနဲ့ ဆန်/ဆီ/ ကြက်ဥ တွေကို လိုအပ်နေပါတယ်။ အဆက်အသွယ်ခက်ခဲမှုတွေကြောင့် ဦးဇင်းက အခုသာသနပါလကဓမ္မဗိမာန်တော် မှာ အမြဲရှိနေပါတယ် “ဟု Travelling သို့ မိန့်ကြားသည်။

လက်ရှိအနေအထားတွင် အင်းလေးရေဘေးအတွက် အဓိကထားပြီးလုပ်ဆောင်ပေးနေကြောင်း ပုန်းအင်းဒေသဘက်သို့ ဖုန်းအဆက် အသွယ်များရရှိပါက ကူညီဆောင်ရွက်ရန် လွယ်ကူသွားမည်ဖြစ်ကြောင်း သိရသည်။

ယခုလက်ရှိတွင် ကေလာ၊ ငါးဖယ်ချောင်း၊ လင်းကင်းစသည့် ကျေးရွာအုပ်စုများအပြင်
အင်းလေးဒေသရှိ ကျေးရွာအုပ်စု (၃၅) စုထဲမှ
ရွာပေါင်း (၁၇၀) ကျော်ရေနစ်မြုပ်နေကြောင်းသိရသည်။

Inle

Photo အရှင်ကုသလ ရွာမ ပထမ

ပုံ-စာ /ယနေ့ အင်းလေးကန်၏ အခြေအနေကို တွေ့ရစဥ်။

#TravellingJournal

ရှမ်းပြည်နယ်တောင်ပိုင်း တောင်ကြီးမြို့၊ ဟိုပုံးမြို့နှင့် ဆီဆိုင်မြို့အကြား ပုန်းအင်းဒေသရှိ ရွာပေါင်း(၂၅) ရွာကျော် နှင့် အိမ်​ခြေ (၁၂၀၀ ) ကျော် ရေနစ်မြုပ်နေသဖြင့် စားနပ်ရိက္ခာများ အရေးပေါ်လိုအပ်နေကြောင်း ပအိုဝ်းဒေသ သဘာဝဘေးအန္တရာယ်ကာကွယ်ရေးအဖွဲ့နှင့် ချိတ်ဆက်ဆောင်ရွက်နေသည့် ဦးခွန်ထွန်းဦးက Travelling သို့ ပြောသည်။

” အဲဒီဘက်တွေကို အဆက်အသွယ်မရဘူး။
အင်းရေပြင်လိုဖြစ်သွားတာပါ။ အဓိကနောင်မွန်ရှမ်းဆန်စပါး အဓိကထွက်တဲ့ဒေသတွေပါ။ ပင်လွန်ရွာက ဒေသခံဆီ အဆက်အသွယ်ရတော့လှမ်းမေးတာအစားအသောက် အခက်အခဲ ရှိနေပါတယ်။ အိမ်တွေကတော့ မြုပ်ကုန်လို့ အမြင့်ပိုင်းနေရာတွေကို ပြောင်းရွှေ့နေထိုင်နေကြပါတယ် “လို့ ဦးခွန်ထွန်းဦးက Travelling သို့ ပြောသည်။

ရှမ်းတိုင်းရင်းများနေထိုင်ကြသည့် ပင်လွန်ရွာသည် အိမ်​ခြေပေါင်း (၁၀၀) ကျော် ရေနစ်မြုပ်နေပြီး နန့်တံဘက်ချောင်းကို အလယ်မှ ခြားကာ ချောင်း၏ အရှေ့ဘက်ခြမ်းဆိုပါက ဆီဆိုင်မြို့နယ်ထဲတွင် ပါ၀င်ပြီး ချောင်းအနောက်ဘက်ခြမ်းဆိုပါကတောင်ကြီးမြို့နယ် နယ်နိ မိတ်အဖြစ် သတ်မှတ်ခံထားရထားသည့် ရှမ်းတိုင်းရင်းသားများ အများဆုံး နေထိုင်ကြသည့် ရွာများဖြစ်ကြောင်း သိရသည်။

ပုန်းအင်းဒေသသည် ကုန်း ၆လ ရေ ၆ လနေထိုင်ကြသည့် အေးချမ်းသာယာလှပသည့် ဒေသဖြစ်ပြီး “နောင်မွန်ရှမ်းဆန်” ထွက်ရှိရာဒေသအဖြစ်နာမည်ကျော်ကြားသည့် ဒေသဖြစ်ကြောင်းသိရသည်။

Photo- မူရင်းပိုင်ရှင် Crd

#TravellingJournal

ရှမ်းပြည်နယ်တောင်ပိုင်း အောင်ပန်းအခြေ စိုက် ဟိုတယ်နှင်းရွှေရည်မှ ကလောရေဘေးရှောင် ပြည်သူများအတွက် ထမင်းနှင့်ဟင်းများချက်ပြုတ်ပြီး စက်တင်ဘာ ၁၅ ရက် နံနက်ပိုင်း
က သွားရောက် လှူဒါန်းခဲ့ကြောင်း သိရသည်။

ထို့ပြင် ဖုံးအားသွင်းရန် အဆင်ပြေရန်အတွက် အောင်ပန်းမြို့ဘက်မှ ကလောမြို့အဝင်တွင် ဆိုလာဖြင့် ဖုန်းအားသွင်းရန်နေရာတစ်နေရာနှင့် ကလောမြို့တွင်း တစ်နေရာတို့၌ ဖုန်းအားသွင်းရန် စီစဥ်ထားရှိပေးထားကြောင်း သိရသည်။

” ဒီ စက်တင်ဘာ ၁၅ ရက် မနက်ပိုင်းက ဆန် ၇ ပြည်ချက်ပြီး သွားလှူတယ်။ ကြက်သားကြော်သွားတယ်။ ကယ်ဆယ်ရေးစခန်းက သူတွေက ထမင်းချက်စားလို့မရသေးဘူး။ ကျွန်တော်တို့ချက်ပြီး သွားလှူပေးတာ။ မစားရသေးတဲ့သူတွေရှိလို့ အခုထပ်ပြီးချက်နေပါတယ်။ ညနေသွားထပ်လှူမှာပါ။ ကလောက အန်တီလီလီ ဆီ လည်း ဆန် (၁၀ )အိတ် လှူပြီး လိုတဲ့နေရာတွေချက်​လှူ နေပါတယ်။ အဝတ်အစားတွေနဲ့စားစရာကိုတော့အဓိက လှူနေပါတယ်”ဟု ကိုမင်းကိုကိုက Travelling သို့ပြောသည်။

စက်တင်ဘာ ၁၂ ရက်မှ စတင်ကာ ထမင်းနှင့် ဟင်းများကိုချက်ပြုတ်ပြီး လှူဒါန်းနေကြောင်း သိရသည်။

Donation

Photo Min ko

ပုံ-စာ ရေပြန်ကျပြီး​​​နောက်ပိုင်းကလောမြို့တစ်နေရာကိုတွေ့ရစဥ်။

#TravellingJournal

ခရီးသွားမြို့တော်ဟု တင်စားထားသည့် ကလောမြို့သည် ရေဘေးကြောင့် အိမ်ခြေ (၄၀၀)ကျော် ပျက်စီးဆုံးရှုံးခဲ့ပြီး လူဦးရေ (၁၄) ဦး သေဆုံးခဲ့ကြောင်း ကလောမြို့စည်ပင် သာယာရေးဌာနမှ တာဝန်ရှိသူက Travelling သို့ ပြောသည်။

” လက်ရှိစာရင်းအရဆိုရင် အိမ်အပျက်အစီး
(၄၄၀ )ကျော် နဲ့ လူ (၁၄)ဦး သေဆုံးခဲ့ပါတယ်”ဟု ၄င်းက Travelling ကို ဖုန်းမက်ဆေ့ဖြင့် ပြန်လည်ဖြေကြားခဲ့သည်။

လက်ရှိတွင် ကလောမြို့ပေါ် ၌ ရေပြန်ကျသွားပြီးနောက် မြို့ပေါ်လမ်းများကို သန့်ရှင်းရေး များဆောင်ရွက်ခြင်းနှင့် ရေပေးဝေရေးလုပ်ငန်းများကို အဓိကထား ဆောင်ရွက်နေကြောင်း ကလောမြို့စည်ပင်သာယာရေးဌာနမှ တာဝန်ရှိသူက Travelling သို့ ပြောသည်။

” စည်ပင်ဌာနကတော့ မြို့သန်းရှင်းရေးနဲ့ ရေပေးဝေရေးလုပ်ငန်းတွေကို အဓိကထား လုပ်ဆောင်နေပါတယ်။ လုပ်နေတုံးပါပဲ။ အမြန်ဆုံးဆောင်ရွက်လျက်ရှိနေပါတယ်။ ခန့်မှန်းအားဖြင့် တစ်လခန့်ကြာမြှင့်ပါမယ် “ဟု ၄င်းက ပြောသည်။

လက်ရှိတွင် ကလောမြို့၌ ကယ်ဆယ်ရေးစခန်း
(၇) ခု ဖွင့်လှစ်ထားပြီး မြို့မဘုန်းကြီးကျောင်း၌ ကယ်ဆယ် ကွပ်ကဲရေးရုံးကို ဖွင့်လှစ်ထားကြောင်း အလှူရှင်များအနေဖြင့် မြို့မဘုန်းကြီးကျောင်းသို့ လှူဒါန်းပေးနိုင်ကြောင်း သိရသည်။

ကလောရေဘေးကြောင့် ရေဘေးရှောင် ဒေသခံလူဦးရေ ခန့်မှန်း ၂၀၀၀ ဝန်းကျင်ရှိပြီး သေဆုံးသူ ဦးရေမှာ (၁၄) ဦး ရှိကြောင်း စည်ပင်သာယာရေးဌာန ၏ လက်ရှိ စာရင်းအရ သိရသည်။

Photo July Angel

ပုံ-စာ စက်တင်ဘာ ၁၃ ရက်နှင့် ၁၄ ရက်နေ့က မြင်တွေ့ရသည့် ကလော မြို့ပေါ် မြင်ကွင်းကို တွေ့ရစဥ်။

#TravellingJournal

မြန်မာ့ခရီးသွားဘဏ်မှ နေပြည်တော် ပတ်ဝန်း ကျင်ရှိ ရေဘေးရှောင် ပြည်သူ (၁၀၀၀၀)ကျော်ကို စားစရာများ လှူဒါန်းခဲ့ကြောင်း သိရသည်။

ရန်ကုန်၊ မန္တလေး နှင့် နေပြည်တော်ရှိ မြန်မာ့ခရီးသွားဘဏ် – MTB Bank ၏ ရုံးချုပ်၊ ဘဏ်ခွဲနှင့် ဌာနအသီးသီးမှ Volunteer ဝန်ထမ်း (၃၆) ဦးပါဝင်သော စေတနာ့ဝန်ထမ်းအဖွဲ့များမှ စက်တင်ဘာလ (၁၄)ရက် နံနက်ပိုင်းမှ ရန်ကုန်မြို့မှ နေပြည်တော်သို့ သွားရောက်ပြီး လှူဒါန်းခဲ့ကြောင်း သိရသည်။

မြန်မာ့ခရီးသွားဘဏ်မိသားစုမှ စုပေါင်း လှူဒါန်းသည့် ငွေကျပ် (၂၀၀ ) သိန်းကျော်တန်ဖိုးရှိ အစားအသောက်၊ ဆေးဝါး နှင့် အသုံးအဆောင်ပစ္စည်းများအား ရေဘေးသင့်ပြည်သူများအတွက်နေပြည်တော်ပတ်ဝန်းကျင်ရှိ ရေ​ဘေးရှောင်ကြသည့် တပ်ကုန်း အထက် ၁ မှ လူ ဦး ရေ (၄၀၀၀) ကျော် ၊ လှေကွင်တောင်ခြေဘက်မှ လူ (၅၀၀၀) ကျော်နှင့် သာသနာ့ဗိမာန် မှ လူ ဦးရေ (၂၆၀၀) ကျော်အတွက် လှူဒါန်းပေးခဲ့ကြောင်းသိရသည်။

Donation

Photo MTB Bank

ပုံ-စာ စက်တင်ဘာ ၁၅ ရက်က နေပြည်တော် တစ်ဝိုက်ရှိ ရေဘေးရှောင်ပြည်သူများကို မြန်မာ့ခရီးသွားဘဏ် မှ သွားရောက်လှူဒါန်းနေသည့်မြင်ကွင်းကိုတွေ့ရစဥ်။

#TravellingJournal

ပြည်တွင်းယာဥ်လိုင်းတစ်ခုဖြစ်သည့် JJ Express မှ ‌ရေဘေးအလှူအဖြစ် ထမင်းဘူး (၅၀၀၀) ကို လှူဒါန်းသွားမည်ဖြစ်ကြောင်း ၄င်း၏ ဖေ့ဘုတ်စ်စာမျက်နှာတွင် ယနေ့ ညနေ ပိုင်းက ရေးသားဖော်ပြထားကြောင်းသိရသည်။

“ပရဟိတအသင်းနာမည်၊ လိပ်စာ၊ ဥက္ကဋ္ဌနံမည် ၊ဆက်သွယ် ရမယ့်ဖုံးနံပတ်၊ လှူမယ့်နေရာ၊ လှူမယ့်လူဦးရေ ၊ ကူညီ ပေးမယ့်ဒေသနဲ့ ဘယ်လိုသွားရောက်ကူညီပေးမလဲဆိုတာ​လေးကို ပြောပြပေးရင်ရပါပြီ” လို့ JJ Express မှ တာဝန်ရှိသူတစ်ဦးက Travelling သို့ပြောသည်။

လက်ရှိတွင် ပရဟိတအသင်းများမှ ဆက်သွယ်လာခြင်းမရှိသေးကြောင်း ရေဘေးသင့် ပြည်သူများကို ကူညီပေးနေသော ပရဟိတအဖွဲ့များ မှ JJ Express ဖုံးနံပတ် – 09 772 82 3000 သို့ ဆက်သွယ်ပြီး ထမင်း ဗူးများကို ရယူနိုင်ပြီဖြစ်ကြောင်း သိရသည်။

JJ Express

Donation

#TravellingJournal

ခရီးသွားမြို့တော်ဖြစ်သည့် ကလောမြို့သည် တောင်ကျချောင်းရေများစွာစီးဆင်းလာခြင်း
ကြောင့် ရေကြီးရေလျှံခြင်းနှင့်အတူ မြေပြိုမှုများဖြစ်ပွားခဲ့သဖြင့် လက်ရှိတွင် ကယ်ဆယ်ရေးစခန်းများ၌ ဒေသခံလူဦးရေ( ၇၀၀၀) ကျော်အတွက် အစားအစာနှင့်သောက်ရေများလိုအပ်နေ ကြောင်း ကလောအခြေစိုက် မြယာပင်ဟိုတယ်ပိုင်ရှင် ဦးသောင်းစိန် က Travelling သို့ ပြောသည်။

လက်ရှိတွင် ဟိုတယ်၌လူဦးရေ (၅၀၀ )ဦးစာကို ချက်ပြုတ်ပြီး လှူဒါန်းပေးနေကြောင်း သိရသည်။

” ကလောရေကြီးမှုအခြေအနေကတော့ မတွေးဝံ့စရာပါပဲ ၊အသေအပျောက်ကလဲများပါတယ် ။ကယ်ဆယ်ရေစခန်းမှာ အစာရေစာနည်းပါးနေပါတယ်။ ဟိုတယ်ကနေ နေ့စဥ်ထမင်းဘူး၊
ရေသန့်ဗူး (၁၀၀ )ပို့နေပါတယ်။ လှူချင်တဲ့လူ တွေရှိရင်အသား၊ကြက်ဥကြော်၊ရေသန့်တဗူးနဲ့တစ်ရက်ကို ကျပ်တစ်သိန်းလောက်ကျပါမယ်။ဒုက္ခရောက်နေတဲ့ လူတွေဆီကို အရောက်သွားပြီး ဝန်ထမ်းတွေချက်ပြုတ်ပြီး လုပ်အားဒါနပြုနေပါတယ်။ လှူချင်တဲ့သူတွေ လှူလို့ရပါတယ် “ဟု မြယာပင် ဟိုတယ်ပိုင်ရှင်က သူ၏ လူမှုစာမျက်နှာမှာရေးသားဖော်ပြထားသည်။

စက်တင်ဘာ (၁၂) ကတည်းတောင်ကျချောင်းရေများစွာ တက်လာခြင်းကြောင့် သေဆုံးမှုများရှိခဲ့ပြီး လက်ရှိတွင် ကလောမြို့၌ ကယ်ဆယ်ရေစခန်း ငါးခု ဖွင့်လှစ်ထားရှိပြီး ဘုန်းကြီးကျောင်းများ၌ နေထိုင်လျက်ရှိနေကြောင်း သိရသည်။

“အခုလက်ရှိက ဘာဖြစ်နေလဲဆိုတော့ ပရဟိသမားတွေရဲ့အိမ်တွေပါ ပါသွားကြတာ။ နံပတ် ၁ ရေသန့်မရှိဘူး။ အခုလောလောဆယ်တော့ KBZ ကရေသန့်ကားတွေနဲ့လာချပေးတယ်။ မီးမရတာကငါးရက်ရှိပြီ။ ဒါကြောင့်ဖယောင်းတိုင်တွေ ဝယ်သွားမယ်။ ရှေ့တပတ်ထဲသွားမယ်။ အခုလောလောဆယ်တော့ ကျွန်တော်တို့ ၄၆ သိန်းလှူဒါန်းထားပေးထားတယ်။ တစ်ပတ်စာ လောက် အစားအသောက် ကျွေးမွေးဖို့အတွက် အရင်ဆုံးလှူဒါန်းထားပါတယ်။ ဆေးဝါး တွေ နဲ့အစားအသောက်တွေသယ်သွားပါမယ်။ မြေပြင်ရောက်ရင်တော့ပိုပြီးသေချာသိရပါမယ် “ဟု Kleemann Elevator & Escalator Myanmar မှ ကိုကြီးနိုင်က Travelling သို့ ပြောသည်။

လက်ရှိတွင် မြယာပင်ဟိုတယ်နှင့်ပူးပေါင်းပြီး လူဦးရေ ၁၀၀၀ စာ အတွက် လှူဒါန်းထားရှိထားကြောင်းသိရသည်။

“မမ တို့ ၉ ရပ်ကွက်ကတော့ ဘာမှမဖြစ်ခဲ့ပါဘူး။ လိုအပ်တဲ့နေရာတွေလိုက်ကြည့်ပြီး လှူနေပါတယ်။စာရင်းတွေလိုက်ကောက်နေပါတယ် “ဟု ကလောမြို့၉ ရပ်ကွက် နေ ထိုင်သူ တစ်ဦး​က Travelling သို့ပြောသည်။

ရေကြီးပြီးမြေပြိုသည့် ဒဏ်ကို ရပ်ကွက် (၂)၊ (၃)နှင့် (၄) ရပ်ကွက် တို့က ဆိုးဆိုးဝါးဝါး ခံစားခဲ့ရပြီး လက်ရှိ တွင် ကလောမြို့ပေါ် ၌ရေပြန်ကျသွားပြီးမြို့ပေါ်လမ်းများကို ရှင်းလင်းခြင်းများကို ဆောင်ရွက်နေကြောင်း သိရသည်။

Photo Kalaw travelling

စက်တင်ဘာ (၁၁)ရက်က ကလောရေကြီးနေသည့်မြင်ကွင်းတစ်ချို့ကိုတွေ့ရစဥ်။