Tag: travellingmm

#Travelling Journal

ပြည်တွင်းဘုရားဖူးနှင့်ခရီးသွားဝန်ဆောင်မှုအသင်း (DPTOA )မှ ဒုတိယအကြိမ် ဘုရားဖူးနှင့်လေ့လာရေး ခရီးစဥ်ကို ကျပ်လေးသောင်းဖြင့် ရောင်းချပေးနေကြောင်း အဆိုပါအသင်းမှ တာဝန် ရှိသူတစ်ဦးက Travelling သို့ ပြောသည်။

အဆိုပါခရီးစဥ်တွင် ဧရာဝတီတိုင်းဒေသကြီးအတွင်းရှိ အထင်ကရမုနိလေးဆူထဲတွင် ပါဝင်သည့် ဇလွန်ပြည်တော်ပြန်ဘုရား​​ကြီး၊မာန်​အောင်မြင်မုနိရုပ်ပွား တော်၊ရဟန္တာ ဦးသီလဓာတ်တော်တို့ကို ဖူးမြှော်ကြမည် ဖြစ်ကြောင်းသိရသည်။

ထို့ပြင် ဓနုဖြူမြို့ရှိ အထင်ကရနေရာများဖြစ်သော ကျိုက္ကလွန်ပွန်းစေတီတော်၊ စစ်သူကြီးမဟာဗန္ဓုလအုတ်ဂူ တို့ကိုလည်းလည်ပတ်ကြမည့်အပြင် ဟင်္သာတမြို့ရှိ နတ်မှော်ရွှေသာလျှောင်းဘုရားကြီး၊ ကျောက်တော်ကြီး၊ ဦးပါရဲဘုရား၊ ငါးမျက်နှာဘုရားကြီးတို့ပါ သွားရောက်လည်ပတ်ရန် စီစဥ်ထားကြောင်း သိရသည်။

အဆိုပါ နေ့ချင်းပြန်ခရီးစဥ်​ကို (၃၃)ယောက်စီး နှင့် (၄၅) ယောက်စီး Aircon Express ကားများဖြင့် ပြေးဆွဲမည်ဖြစ်ပြီး ကားခအသွားအပြန် တစ်ဦးလျှင် ကျပ်လေးသောင်းဖြင့်ရောင်းချပေးသွားမည်ဖြစ်ကာ ဝန်ဆောင်မှုများအနေဖြင့် ရေသန့် ၊ဒေသန္တရဗဟုသုတများ ရှင်းပြပေးမည့် ခရီးသွားလမ်းညွှန် (Guide)၊ခရီးသွားအာမခံ ( Insurance)၊ ခရီးစဉ်တစ်လျောက်လိုက်လံဝန်ဆောင်မူ့ပေးမည့် ( Tour leader ) များပါဝင်ကြောင်းသိရသည်။

ယင်းခရီးစဥ်ကို ပြည်တွင်းဘုရားဖူးနှင့်ခရီးသွားဝန်ဆောင်မှုအသင်း( DPTOA )အသင်းရုံးမှ
ဇူလိုင်လ(၂၇) ရက်တွင်ထွက်ခွာမည်ဖြစ်ပြီး လက်မှတ်များဝယ်ယူလိုပါက အသင်းရုံးသို့ ဆက်သွယ်ဝယ်ယူနိုင်ကြောင်း သိရသည်။

“ကျွန်တော်တို့အသင်းကနေ ဒါက ဒုတိယအကြိမ် လေ့လာရေးခရီးစဥ်လို့ပြောလို့ရပါမယ်။ ပထမအကြိမ် တုန်းကတော့ ခရီးသည်ပေါင်း(၂၀၀)နီးပါးလိုက်ပါခဲ့ပါတယ်။ ဒီလိုမျိုးခရီးစဥ်တွေကိုထပ်ပြီး ဖော်ဆောင်သွားဖို့ရှိပါတယ် “ဟု ပြည်တွင်းဘုရားဖူးနှင့်ခရီးသွားဝန်ဆောင်မှုအသင်း(DPTOA)မှ တွဲဖက်အထွေအထွေအတွင်းရေးမှူး ဦးမျိုးသိန်းကျော်က Travelling ကိုပြောသည်။

#Travelling Journal

#News

#Photo Travelling Journal

ပုံ-စာ DPTOA မှ စီစဥ်သည့် ပထမကြိမ်မြို့လေးမြို့ခရီးစဥ်မှခရီးသွားပုံံရိပ်တစ်ချို့ကိုတွေ့ရစဥ်။

#Travelling Journal

ငလျင်ဒဏ်ထိခဲ့သည့် မန္တလေးရှိ Ritz Grand Hotel ကို အင်ဂျင်နီယာလေးဖွဲ့ မှ လာရောက်စစ်ဆေးခဲ့ပြီး ဟိုတယ်ကို ငလျင်ဒဏ်ခံနိုင်သည့် Special Moment Resisting Frame ဖြင့် တည်ဆောက်ထားသည့်အတွက် အဓိက Structural members မထိခိုက်ပဲအလှအုတ်နံရံများသာ ထိခိုက်ခဲ့ကြောင်း ဟိုတယ်၏တာဝန်ရှိသူက Travelling သို့ပြောသည်။

လက်ရှိစစ်ဆေးချက်များအရ ငလျင်ဒဏ်ထိခဲ့သည့် အဆိုပါဟိုတယ်၏ ဒုတိယထပ် မှ ခြောက်ထပ်အလွှာများရှိ အလှဆင်ကာရံထားသော အုတ်ဖောင်းလိုင်းအစိတ်အပိုင်းအချို့ကွဲအက်ကွာကျခြင်းများနှင့်ရေပိုက်လိုင်းအချို့ပြုတ်ထွက်ခဲ့​ခြင်းသာဖြစ်ခဲ့သည်ဟု အဆိုပါ ဟိုတယ်ကိုငလျင်ဒဏ်ခံနိုင်သည့် အဆောက်အဦဒီဇိုင်းပုံစံထုတ်လုပ်ပေးခဲ့သည့် PE အင်ဂျင်နီယာဦးခင်မောင်ဇော် က Travelling သို့ပြောသည်။

” အဆောက်အဦမှာ Structural members နဲ့ Non Structural members ဆိုပြီး နှစ်ခုခွဲထားပါတယ်။ S.M မှာက အဓိက foundation၊ အဓိကပင်မထုတ်များ၊ စလက်ပြင် တို့က အဓိကကျတဲ့ members တွေပါ။ အဲဒါတွေမဖြစ်ရင် အဆောက်အဦက ပြိုစရာမရှိဘူး။ လူအသက်အန္တရယ်ထိခိုက်တာမရှိဘူး။ စစ်ဆေးခဲ့တော့ Non Structural members တွေဖြစ်တဲ့ အုတ်ရိုးတွေ အလှထုတ်တာတွေကတော့ကွဲတာပဲ့ကျိုးတာအပြင်နံရံတွေထိတာတွေ့ရတယ်။ အခုမြင်တွေ့ရတာတွေက အပြင်ဘက်အလှထုတ်ထားတဲ့ နံရံတွေက ကွဲအက်ပြုတ်ကျတာဖြစ်ပါတယ်။ ပင်မအဆောက်အဦက တိမ်းစောင်းခြင်း ၊
နိမ့်ကျခြင်း မရှိခဲ့ပါဘူး။အဆောက်အဦက မတ်မတ်ပဲရှိတယ် “ဟု ဟိုတယ်အားစစ်ဆေးခဲ့သည့် အင်ဂျင်နီယာ ဦးခင်မောင်ဇော်က Travelling သို့ ပြောသည်။

အဆိုပါဟိုတယ်သို့ PE အင်ဂျင်နီယာဦးခင်မောင်ဇော်အဖွဲ့ ၊ PE အင်ဂျင်နီယာဒေါက်တာလှမျိုးအောင်အဖွဲ့နှင့် ဟိုတယ်ခရီးမှ အင်ဂျင်နီယာအဖွဲ့များအပြင် ဟိုတယ်၏ သက်ဆိုင်ရာအင်ဂျင်နီယာအဖွဲဲ့များမှ လာရောက်စစ်ဆေးခဲ့ပြီး ယင်းအဖွဲ့များ၏ သဘောထားမှတ်ချက်များမှာ အဓိကပင်မတိုင်များ၊ အဓိကပင်မထုတ်များ၊ စလက်ပြင်များထိခိုက်မှုမရှိပဲ Non Structural members ဖြစ်သည့် အလှထုတ်ထားသည့် အုတ်နံရံ အများစုပျက်စီးသာ ပျက်စီးခဲ့ပြီး အလတ်စားပြင်ဆင်မှုပြုလုပ်ပြီးမှ သာ ဆက်လက် အသုံးပြုရန် မှတ်ချက်များ ပေးထားခဲ့ကြောင်း သိရသည်။

ယင်းဟိုတယ်ကို ၂၀၁၅ ခုနှစ်တွင် စတင်ဆောက်လုပ်ခဲ့ပြီး ၂၀၁၉ ခုနှစ်တွင် ဖွင့်လှစ် ခဲ့ပြီးငလျင်ဒဏ် ခံနိုင်အောင် အဆောက်အဦကို တည်ဆောက်ခဲ့ကြောင်း သိရသည်။

#Travelling Journal

#News

ပုံ-စာ ဇွန်လဆန်းပိုင်းက မြင်တွေ့ရသည့် Ritz Grand Hotel Mandalay ဟိုတယ်၏ မြင်ကွင်းကိုတွေ့ရစဥ်။

#Travelling Journal

လိုင်စင်ရခရီးသွားကုမ္ပဏီများမှ Tour Package
ဖြင့်လည်ပတ်သည့် ကမ္ဘာလှည့်ခရီးသည်များ၏ ခရီးစဥ် အစအဆုံးမှတ်တမ်းများကို ဟိုတယ်နှင့်ခရီးသွားလာရေးဝန်ကြီးဌာနသို့ ပေးပို့ရမည်ဖြစ်ကြောင်းသိရသည်။

အဆိုပါဝန်ကြီးဌာနမှ မေလ(၁၆)ရက် ရက်စွဲဖြင့် ထုတ်ပြန်ကြေညာထားပြီး ထုတ်ပြန်ချက်တွင် မတ်လ(၂၈) ရက် မန္တလေးငလျင်ကြီးဖြစ်ပွားပြီးနောက် လိုင်စင်ရခရီးသွားကုမ္ပဏီများ၏အစီအစဥ်ဖြင့် ခရီးစဥ် ဒေသများသို့ လာရောက်လည်ပတ်ခဲ့သော ကမ္ဘာလှည့်ခရီးသည်များနှင့် မြိတ်ကျွန်းစုသို့စက်တပ်ရွက်လှေများဖြင့် လာရောက်လည်ပတ်ခဲ့သော ကမ္ဘာလှည့်ခရီးသည်များ၏ ခရီးစဥ်များကိုတင်ပြခဲ့ရာ ခရီးသွားကုမ္ပဏီများ၏ အစီအစဥ်ဖြင့်လာရောက်သော ခရီးစဥ်များတွင် ခရီးသည်များ၏ ဓာတ်ပုံ၊ဗွီဒီယိုများရိုက်ကူးထားရှိပြီး ဌာနသို့ ပေးပို့ရန်နှင့် ဌာန၏ Website နှင့် Social Media များတွင်ဖော်ပြရန်ဟု ထုတ်ပြန်ချက်တွင်ဖော်ပြထားကြောင်းသိရသည်။

“အခု မြိတ်ကျွန်းစုဘက်က ဒီရာသီက ခရီးသွားရာသီနားထားတယ်။ နိုဝင်ဘာကျမှ မြိတ်ကျွန်းစုခရီးသွားကာလက ပြန်လည်ဖွင့်တာ။ တခါတလေတော့ခရီးသွားလာတာမျိုးရှိပါတယ်။ အဲဒီအချိန်ကျရင်တော့တင်ပြရမှာပေါ့ “ဟု ဟိုတယ်နှင့်ခရီးသွားလာရေးညွန်ကြားမှု ဦးစီးဌာန ( ကော့သောင်းရုံးခွဲ) မှ တာဝန်ရှိသူက Travelling သို့ပြောသည်။

လိုင်စင်ရခရီးသွားကုမ္ပဏီများအနေဖြင့် ဝန်ဆောင်မှူပေးခဲ့သော ခရီးစဥ်များတွင် ပါရှိသည့်ခရီးသွားများ စတင်ရောက်ရှိလာရာမှစတင်ပြီး ခရီးစဥ်လည်ပတ်ကြည့်ရှုနေမှုများနှင့် လမ်းခရီးတစ်လျှောက်လှုပ်ရှားမှုများကို ဓာတ်ပုံ ဗွီဒီယိုများဖြင့် မှတ်တမ်းတင်ရိုက်ကူးပြီး ခရီးစဥ် ပြီးဆုံးသည့်နေ့မှ (၁၀) ရက်အတွင်း ဟိုတယ် နှင့်ခရီးသွားညွှန်ကြားမှုဦးစီးဌာန ဟို တယ်နှင့်ခရီးသွားလုပ်ငန်းဆိုင်ရာကြီးကြပ်ရေးဌာနခွဲ Email (trd.trd2021@gmail. com) သို့လိပ်မူ၍ မပျက်မကွက်ပေးပို့ရန် ယင်းထုတ်ပြန်ချက်တွင် ဖော်ပြထားကြောင်းသိရသည်။

#Travelling Journal

#News

#Photo Tourism Tanintharyi

#Travelling Journal

ထင်းရှုးမြို့တော်ဖြစ်သည့် ကလောမြို့မှ အောင်ပန်းမြို့သို့ ပြေးဆွဲလျက်ရှိသည့် ကားရထားကို ဧပြီလအတွင်း ခေါက်ရေ (၃၀) ကျော်ပြေးဆွဲနိုင်ခဲ့ပြီး စီးနင်းသူခရီးသွားအများစုမှာ အလှဓာတ်ပုံံရိုက်ကူးရန်ဖြစ်ကြောင်း ကလောမီးရထားဘူတာရုံံပိုင်ကြီးမှ Travelling သို့ပြောသည်။

” ကလောကနေ အောင်ပန်းအထိ စင်းလုံးဌား တစ်ခေါက်ကို တစ်သိန်းနှစ်သောင်း ယူပါတယ်။(၁၅)ယောက် စီးလို့ရတယ်။ တကယ်လို့လူနည်းနည်းပဲစီးချင်လည်း ဒီနှုန်းထားပါပဲ။ ကြိုငှားလို့လည်းရသလို တကယ်လို့ ချက်ချင်းစီးချင်ရင်တော့ အချိန်တော့စောင့်ဆိုင်းပေးရမှာပါ။ အသွားအပြန်ကို တစ်နာရီခွဲလောက်ကြာပါတယ်။ ဧပြီလအတွင်းမှာတော့ခေါက်ရေ (၃၀)ကျော်ပြေးဆွဲနိုင်ခဲ့တယ်။ဒီလကတော့ အနည်းဆုံးပုံမှန်တစ်ခေါက်ပြေးဆွဲပေးနေရတယ်” ကလောမီးရထားဘူတာ ရုံံပိုင်ကြီး မှ Travelling သို့ ပြောသည်။

လက်ရှိတွင် ကားရထားတွဲဆိုင်းတစ်တွဲဖြင့် ဝန်ဆောင်မှုပေးလျက်ရှိပြီး ဧည့်သည် (၁၅) ဦးလိုက်ပါစီးနင်းနိုင်ကာလူတစ်ဦးလျှင် ကျပ် (၈၀၀၀) ဝန်းကျင်ခန့် ကျသင့်ကြောင်းသိရသည်။

ကားရထားစီးသူအများစုသည် ကလောမြို့သို့
လာရောက်ကြသည့်ခရီးသွားများအပြင် တောင်ကြီး -အောင်ပန်း -ကလောမှ ဒေသခံတစ်ချို့လည်း စီးနင်းမှုများလည်းရှိကြောင်းသိရသည်။

“စီးတဲ့ခရီးသွားတွေကတော့ အများစုက ဓာတ်ပုံရိုက်ကြတာ။ရှုခင်းအရမ်းလှတယ်လေ။ ဗျိုက်တောင်နားမှာ ဓာတ်ပုံရိုက်လို့ရအောင်( ၁၅ )မိနစ်ခန့် ရပ်ပေးတယ်။ ပြီးတော့ မြင်းဒိုက်နားက ကျောက်ဂူလေးမှာလည်းရပ်ပေးပါတယ် “ဟု ကလောရုံံပိုင်ကြီးက Travelling သို့ ပြောသည်။

ထို့ပြင် ကလောမြို့သို့ လာရောက်လည်ပတ်သည့် ဧည့်သည်များအတွက် ရထားစီးလည်ပတ်နိုင်ရန် ရေနွေးငွေ့ စက်ခေါင်းနှင့်တွဲဆိုင်းများ ကလောဘူတာသို့ ထပ်မံရောက်ရှိလာပြီး လက်ရှိ၌အောင်ပန်းတွင်ထားရှိကာ အဆင့်မြှင့်ပြင်ဆင်နေကြောင်း သိရသည်။

Travelling Journal

News

Photo Tin Soe Aung (Kalaw)

#Travelling Journal

Page အတုများဖြင့် လိမ်လည်ရောင်းချမှုများရှိနေခြင်းကြောင့် Online မှ လေယာဥ်လက်မှတ်ဝယ်မည့် ခရီးသွားများအနေဖြင့် အထူးဂရုပြုသင့်ဟု ခရီးသွားကုမ္ပဏီတချို့က တိုက်တွန်းပြောကြားထားကြောင်းသိရသည်။

” လူလိမ် Page တွေ အရမ်းများနေလို့ ။ကျွန်တော်တို့ဆီကို လာလာပြီး ပြောတာ သုံးလေးကြိမ်ရှိတယ်။
အထူးသတိထားစေချင်ပါတယ်။ ပေါက်စျေးထက်ငါးသောင်းကျော် ခြောက်သောင်းကွာရင် သတိ
ပြုသင့်ပါတယ်”ဟု ရန်ကုန်အခြေစိုက် ပြည်တွင်းပြည်ပ လေယာဥ်လက်မှတ်ရောင်းချပေးသည့် Than Than Travel မှ တာဝန်ရှိသူက Travelling သို့ပြောသည်။

လက်ရှိတွင် အွန်လိုင်းပေါ်၌ အလွယ်တကူပေ့ချ်(Page)များ ဖွင့်လှစ်ပြီး လေယာဥ်လက်မှတ်များ နှင့်ခရီးစဥ်များကို ပုံမှန်စျေးထက်စျေးသက်သာပြီး ရောင်းချနေခြင်းကြောင့် ယခုလိုမျိုး ဖြစ်စဥ်များ များပြားလာခဲ့ကြောင်း လက်မှတ်ဝယ်ယူခဲ့ဖူးသည့်ခရီးသွားပြည်သူတစ်ဦးကလည်း Travelling သို့ပြောသည်။

“ကျွန်တော် AirTicket ဝယ်မယ်ပေါ့။ အမြဲအားပေးနေတဲ့ Agent က စျေးများတယ်လို့ ခံစားမိလို့ ဒါနဲ့ လွန်ခဲ့တဲ့ ၁၀ နှစ်ကျော်က ဆက်ဆံဖူးတဲ့ (ရွှေလူငယ်)ကို ခေါ်တော့ Return Ticket( ၅)သိန်းခွဲတဲ့။ ခုနက Agent ထက် (၁၄၀၀၀၀) ပိုသက်သာတယ်။ ပျော်သွားတယ် ဝယ်မယ်ပေါ့။ လိပ်စာက အရင်အောင်မဂ်လာ အဝေးပြေးဂိတ်မှာ မဟုတ်တော့ဘဲ International Airport Terminal အပေါ်ထပ်မှာတဲ့။ အိမ်နဲ့မဝေးတော့ ပိုက်ဆံပေးပြီး လက်မှတ်တခါတည်း လာယူမယ်ပြောတော့
အထဲကို ဝင်မရဘူးလို့ ပြောတယ်။ အမျိုးသမီးက ငွေလွှဲဖို့ အကုန်ပြင်ပြီးသား။ ဒါဆိုလည်း လေဆိပ်မှာ သူငယ်ချင်း Chief Engineer ရှိတယ်။ မင်းတို့
ရုံးကို လွှတ်လိုက်မယ်။ သူနဲ့ရှင်းလိုက် ပြောတော့ ရုံးပိတ်ခါနီး လာလို့မရဘူးတဲ့။ ငွေတဝက်လွှဲရင် Return Ticket ထုတ်ပေးမယ်။ ကျန်တာနောက်မှ လွှဲပါတဲ့။ ကိုယ်လည်း မနက်ဖြန်မှ ဆက်လုပ်မယ် ပြောလိုက်တယ်။ ၅ သောင်းဘဲ လွှဲပေးပါ။ ကျန်တာ အဆင်ပြေအောင် လုပ်ပေးထားမယ်။ မနက်ဖြန် လက်မှတ်ယူပြီး လက်ကျန်ငွေရှင်းပါတဲ့။ သံသယက တ​ဖြည်းဖြည်း မြင့်လာပြီ။ ပို့ထားတဲ့ ကိုယ့် PP Photo ကိုလည်း Delete ပြန်လုပ်လိုက်တယ်။ အိမ်မှာ ရွှေလူငယ် Visiting Card ပြန်ရှာတယ်… စနစ်တကျ သိမ်းထားတော့ ချက်ခြင်းတွေ့တယ်။ Page ထဲက ဖုန်းနဲ့မတူဘူး။ လိပ်စာလည်း အောင်မဂ်လာမှာပဲ။ ရွှေလူငယ်ကို ရောက်တော့
သူတို့နာမည်တင်မက၊တခြား Tour Agent နာမည််တူတွေနဲ့ဗြောင်ပတ်လိမ်စားနေတဲ့သူ တပုံကြီးတဲ့ဗျာ” ဟု လတ်မှတ်ဝယ်ယူခဲ့ဖူးသည့် ခရီးသွားပြည်သူတစ်ဦးက Travelling သို့ ပြောသည်။

ပုံမှန်စျေးထက်ပိုသက်သာနေပါက သတိပြုရမည်ဖြစ်ပြီး စိတ်ချယုံကြည်ရသည့်ခရီးသွားကုမ္ပဏီများထံမှ ဝယ်ယူသင့်ကြောင်း Than Than Travel မှ သူ၏ လူမှုကွန်ရက်စာမျက်နှာတွင်လည်း ရေးသားဖော်ပြထားသည်။

ထို့ပြင် ခရီးသွားများအနေဖြင့် မိမိနှင့်ဆက်သွယ်ပြောသည့် ပေ့ချ်ကိုလေ့လာပြီး အသုံးပြုထားသည့် လိပ်စာ၊ဖုန်းနံပါတ်များကို သေချာစစ်ဆေးရန်လိုကြောင်းနှင့် ချက်ချင်းငွေလွှဲပြီး အယုံမလွယ်ရန် ဂရုပြုဆောင်ရွက်သင့်ကြောင်း ခရီးသွားကုမ္ပဏီတစ်ချို့က အကြံပြုပြောကြားထားကြောင်းသိရသည်။

#TravellingJournal

#News

ပုံ-စာ Pageအတုတစ်ခုနှင့်လက်မှတ်ဝယ်သူကြားဆက်သွယ်ထားတဲ့ Chat list တစ်ခုကိုတွေရစဥ်