Author: Admin

ရန်ကုန်တိုင်းအတွင်းရှိ Tourist Spot များဖော်ဆောင်ရန် ခရီးသွားလုပ်ငန်းဖွံ့ဖြိုးတိုးတက်ရေးဖိုရမ်ကို ကျင်းပ

Posted on by Admin

Travelling Journal

ရန်ကုန်တိုင်းဒေသကြီးအတွင်း ခရီးစဥ်ဒေသများရေရှည်ဖွံ့ဖြိုးတိုးတက်ရေးနှင့်ဆွဲဆောင်မှုနေရာအသစ်များ ဖော်ထုတ်ရေးအတွက်ရန်ကုန်တိုင်းဒေသကြီး ခရီးသွားလုပ်ငန်းဖွံ့ဖြိုးတိုးတက်ရေးဖိုရမ်ကို ကျင်းပခဲ့​ကြောင်းသိရသည်။

အဆုိပါခရီးသွားဖိုရမ်ကို ယနေ့(ဇူလိုင်လ ၁၅ ရက်) နံနက်ပိုင်းက Wyndham Grand Hotel၌ ကျင်းပခဲ့ကြောင်းသိရသည်။

“ရှိပြီးသားခရီးစဥ်တွေကို ထိန်းသိမ်းပြီးအသစ်အသစ်တွေကို ဖော်ထုတ်ပေးနိုင်ရင်ပိုပြီးကောင်းပါတယ် “ဟု မြန်မာနိုင်ငံ ခရီးသွား လုပ်ငန်း အဖွဲ့ချုပ် မှ တွဲဖက်အထွေထွေ အတွင်းရေးမှူး ဦးကျော်မင်းလှိုင် က Travelling ကို ပြောသည်။

အဆိုပါဖိုရမ်တွင် ရန်ကုန်တိုင်းဒေသကြီးအတွင်းရှိ လည်ပတ်စရာနေရာများဖြစ်သည့် တိုင်းရင်းသားကျေးရွာ နှင့် ဗိုလ်တထောင် ဘုရားညစျေးတန်းတို့ကို ရေရှည်ဖွံ့ဖြိုးတိုးတက်စေရေးနှင့်ပတ်သက်၍အကြုံပြုတင်ပြကြခဲ့ကြောင်းသိရသည်။

ထို့ပြင် အင်းလျားကန်နှင့်ကန်တော်ကြီးတွင် လှေလှော်ပြိုင်ပွဲများကျင်းပနိုင်ရန်နှင့် မြင်းစီးပြိုင်ပွဲများကိုလည်းကျင်းပခြင်း၊ ငမိုးရိပ် ချောင်းအတွင်း ခရီးစဥ်ဖော်ဆောင်ခြင်း၊ Golt Tour နှင့် လှည်းကူး စိန်တောင်ခရီးစဥ်များကို Acivity များအနေဖြင့်ဆောင်ရွက်နိုင်ရန် နှင့် Tourist Spot များကို ဖော်ဆောင်သွားရန်
ဖိုရမ်တက်ရောက်လာသူများက ဆွေးနွေးတင်ပြခဲ့ကြကြောင်း သိရသည်။

ခရီးသွားလုပ်ငန်းဖွံ့ဖြိုးတိုးတက်ရေးဖိုရမ်တွင် လှည်းကူး ၊ သန်လျင် ၊တွံတေး မြို့ဟောင်းများကိုလည်း ခရီးစဥ်အဖြစ် ဖော်ထုတ်ရန် တင်ပြဆွေးနွေးမှုများရှိခဲ့ပြီး ယင်းကဲ့သို့ခရီးသွားဖိုရမ်များကို ပြည်နယ်နှင့်တိုင်းဒေသကြီးများတွင်
ကျင်းပခဲ့ပြီးဖြစ်ကြောင်း သိရသည်။

Activity
Photo – ရန်ကုန်တိုင်းဒေသကြီး ခရီးသွားလုပ်ငန်းဖွံ့ဖြိုးတိုးတက်ရေးဖိုရမ်သို့ တက်ရောက်လာသူများကို တွေ့ရစဥ်။

ထိုင်းနိုင်ငံ ဘန်ကောက်တွင် ထွေးဦးမြန်မာ ရုပ်သေးအဖွဲ့မှ မြန်မာရုပ်သေးပွဲ ကပြမည်

Posted on by Admin

Travelling Journal

ထိုင်းနိုင်ငံအခြေစိုက် Semathai Marionette Foundation နှင့် ထွေးဦးမြန်မာ ရုပ်သေးအဖွဲ့ တို့ ပူးပေါင်းပြီး မြန်မာ့ရိုးရာ ရုပ်သေးအကမျိုးစုံကို ဖျော်ဖြေပြသသွားမည်ဖြစ်ကြောင်း ထွေးဦးမြန်မာရုပ်သေးအဖွဲ့ တည်ထောင်သူနှင့် အနုပညာဒါရိုက်တာဖြစ်သူ ဦးခင်မောင်ထွေး က Travelling ကို ပြောသည်။

အဆိုပါ ပြပွဲကို ထိုင်းနိုင်ငံအခြေစိုက် Sema Thai ရုပ်သေးရုံ ၌ ယခုလ ၂၀ ရက် နေ့လယ် ၂ နာရီတွင် Semathai Foundation, 16/225 Soi Vibhavadi 58, Talad Bang Khen, Laksi ၌ ပြသ သွားမည်ဖြစ်ပြီး လူဦးရေ ၃၀ ဦးကိုသာ ပြသသွားမည်ဖြစ်ကြောင်း သိရသည်။

Semathai Marionette Foundation မှ၂၀၁၃ တွင် ပြည်တွင်းပွဲတော်များကို စတင်ခဲ့ပြီး ၂၀၁၄မှ စ၍ နှစ်နှစ်တစ်ကြိမ် အပြည်ပြည်ဆိုင်ရာရုပ်သေးပွဲတော်ကို ကျင်းပခဲ့ကြောင်းသိရသည်။

၂၀၁၄ ခုနှစ်တွင် ဟာမိုနီကမ္ဘာ့ရုပ်သေးပွဲတော်ကို ကျင်းပခဲ့ ရာ ယင်းပွဲတော်တွင် ထွေးဦးမြန်မာ ရုပ်သေးအဖွဲ့မှ တက်ရောက်ခဲ့ပြီး အကောင်းဆုံး သက်ဝင်လှုပ်ရှားမှုဆုကို မြန်မာပြည်ကိုယ်စားပြုရရှိခဲ့ကြောင်း ထွေးဦးမြန်မာရုပ်သေးအဖွဲ့ တည်ထောင်သူနှင့် အနုပညာဒါရိုက်တာဖြစ်သူ ဦးခင်မောင်ထွေး က Travelling ကို ပြောသည်။

” ဦးထွေးတို့ ဘန်ကောက်မှာ ဘာတွေပြမလဲဆိုတော့မြန်မာ့ရုပ်သေးသမိုင်းကြောင်းကို ရှင်းပြမယ်။ ညလုံးပေါက်ရုပ်သေးပွဲမှာပြတဲ့အတိုင်း ပြသပေးမယ်။ ကောက်နှုတ်ချက်မျိုးသဘောမျိုး ကပြမှာပါ။ ၃၇ မင်းနတ် နဲ့ ဇတ်တော်ကြီးတွေကိုအရှည်ကပြလို့ မရတော့ မြန်မာ့ရုပ်သေးဆိုတာဘယ်လိုရှိတယ်ဆိုတာကို တစ်နာရီအတွင်းမှာ ကပြပေးသွားမှာဖြစ်ပါတယ်”ဟု ထွေးဦးမြန်မာရုပ်သေးအဖွဲ့ တည်ထောင်သူနှင့် အနုပညာဒါရိုက်တာဖြစ်သူ ဦးခင်မောင်ထွေး က Travelling ကို ပြောသည်။

ထိုင်းနိုင်ငံ၏ ကမ္ဘာ့ရုပ်သေးအဖွဲ့ချုပ် Unima သည် The Puppet in Education Design Lab Residency Program 2024 ပရောဂျက်တွင်
Sai Sema Puppet Foundation for Society နှင့် ပူးပေါင်းထားပြီး ရက်တိုပွဲတော်ပရောဂျက်မဟုတ်ဘဲ ရက်ရှည်ပွဲတော်ကို ကျင်းပသွားရန်စီစဥ်ထားပြီး ယင်းအစီအစဥ်တွင် မြန်မာနိုင်ငံမှ ထွေးဦးမြန်မာ ရုပ်သေးအဖွဲ့ကို ပါဝင်ရန် ဖိတ်ခေါ်ထားသောကြောင့် ယခုကဲ့သို့ ပါဝင်ခဲ့ကြောင်းသိရသည်။

“ဦးထွေးတို့ ကိုရတ်မြို့ကိုသွားခဲ့တယ်။ တစ်ယောက် နဲ့တစ်ယောက် ရုပ်သေးနဲ့ပတ်သက်တဲ့ပညာတွေ ဖလှယ်ကြတယ်။ ပညာရှင် တွေ တွေ့ဆုံခဲ့ကြတယ်”ဟု ဦးခင်မောင်ထွေး က Travelling ကို ပြောသည်။

ထွေးဦးမြန်မာရုပ်သေးအဖွဲ့ ကို ၂၀၀၆ ခုနှစ်တွင် စတင်တည်ထောင်ပြီး ၂၀၀၈ မှ၂၀၂၀ ခုနှစ်အတွင်းပြည်ပနိုင်ငံများ ဖြစ်သည့် အမေရိကန်၊ ပြင်သစ် ၊နယ်သာလန်၊ဂျာမနီ ၊သြစတြီးယား ၊ဆွီဒင်၊UAE ၊ဒူဘိုင်း နှင့် အာဆီယံနိုင်ငံ များသို့ အခေါက်ပေါင်း ၅၀ ကျော် သွားရော​က်ကပြခဲ့ပြီး ဖြစ်ကြောင်းသိရသည်။

Myanmar Traditional Puppet Show
Photo khin maung htwe

၂၀၁၄ ခုနှစ်တွင် ဟာမိုနီကမ္ဘာ့ရုပ်သေးပွဲတော်ကို ကျင်းပခဲ့ ရာ ယင်းပွဲတော်တွင် ထွေးဦးမြန်မာ ရုပ်သေးအဖွဲ့မှ တက်ရောက်ခဲ့ပြီး အကောင်းဆုံး သက်ဝင်လှုပ်ရှားမှုဆုကို ရရှိခဲ့သည့်မြင်ကွင်း။

ပြည်တွင်းပြည်ပခရီးစဥ်များကို သုံးလအရစ်ကျစနစ်ဖြင့် ခရီးသွားနိုင်ရန် Tour ကုမ္ပဏီတစ်ခုစီစဥ်

Posted on by Admin

Travelling Journal

ပြည်တွင်းပြည်ပ ခရီးစဥ်များကို သုံးလ အရစ်ကျစနစ်ဖြင့် ခရီးသွားရောက်လည်ပတ်နိုင်ရန် ခရီးသွားကုမ္ပဏီတစ်ခုမှစီစဥ်နေကြောင်း ယင်း ကုမ္ပဏီ ၏ တာဝန်ရှိသူ က Travelling သို့ ပြောသည်။

ကနဦးအနေဖြင့် ရှမ်းပြည်နယ် ကလောခရီးစဥ်နှင့်ပုဂံခရီးစဥ် နှစ်ခုကို စတင်အကောင်အထည် ဖော်နေပြီဖြစ်ကြောင်း သိရသည်။

ပထမဦးဆုံး ပြည်တွင်းခရီးစဥ်ကို ဇူလိုင်လ (၁၈) ရက်တွင်စတင်မည်​ဖြစ်ပြီး ဇူလိုင်လမှ စတင်ကာ စက်တင်ဘာကာလအတွင်း မိုးရာသီ ကာလအတွင်း အရစ်ကျစနစ်ဖြင့် သွားရောက်လည်ပတ်ရန် စီစဥ်ပေးထားကြောင်း သိရသည်။

“အခုကတော့ ပုဂံ-ညောင်ဦး-ပြည့် (၉) ပြည့် ခရီးစဥ်ရယ် ။ ကလော -အင်းလေး ခရီးစဥ်ကို ခရီးသွားချင်သူတွေအတွက် အရစ်ကျ စနစ်နဲ့ပေးလို့ရအောင်အကောင်အထည်ဖော်ပေးခဲ့ပါတယ်။ ပြည်ပ ခရီးစဥ်ကိုတော့ အောက်တိုဘာ လမှစတင်ပါမယ်။ ဒီလိုကာလမှာခရီးသွားချင်တဲ့သူတွေအတွက်ဝန်ထုတ်ဝန်ပိုးလည်းမဖြစ်အောင် ခရီးလည်း လည်ပတ်နိုင်စေဖို့ ရည်ရွယ်ပြီး စီစဥ်ပေးဖြစ်ခဲ့တာပါ။ အရစ်ကျ ခွဲပေးရတော့ သူတို့အတွက်လည်း အဆင်ပြေ စေပါတယ် “ဟု Let´sTravelEasilyTour ခရီးသွား ကုမ္ပဏီ မှ တာဝန် ရှိသူက Travelling ကို ပြောသည်။

ပုဂံ – ညောင်ဦးခရီးစဥ် သုံးညအိပ်လေးရက်အတွက် စားရိတ်ငြိမ်းအပြီးအစီးကို လူတစ်ဦးလျှင် ကျပ်နှစ်သိန်း ကျသင့်မည် ဖြစ်ကာ ပထမဆုံးလကို ကျပ်တစ်သိန်း ပေးသွင်းရမည်ဖြစ်ပြီး ကျန်ငွေအား ဒုတိယအရစ်တွင် ကျပ် (၅၅၀၀၀) ကျပ် နှင့် တတိယအရစ် တွင် ကျပ် (၅၅၀၀၀) ကို ပေးသွင်းရမည်ဖြ​​စ်ကြောင်း သိရသည်။

အရစ်ကျ စနစ်ဖြင့် ခရီးသွားချင်သူများအတွက် လိုအပ်ချက်အနေဖြင့် မှတ်ပုံတင် မိတ္တူ၊သန်းခေါင်စာရင်းမိတ္တူ ၊ ရပ်ကွက် (သို့) မြို့နယ်နေထိုင်ကြောင်း မူရင်း၊ HR ၏ အလုပ်လုပ်ကြောင်းထောက်ခံစာမူရင်း နှင့် LTE Tour က သတ်မှတ်ထားသည့် Form တွင် ဖြည့်ပေးရမည်ဖြစ်ကြောင်း သိရသည်။

ထို့ပြင် ကလော -အင်းလေး သုံးညအိပ် လေးရက် ခရီးစဥ်ကိုအရစ်ကျ စနစ် ဖြင့် ခရီးသွားချင်သူများအတွက် ပထမအရစ် တွင် ကျပ် ၁၂၅၀၀၀ ကို ကနဦးပေးသွင်းရမည်ဖြစ်ပြီး ကျန်ငွေအား ဒုတိယအရစ် တွင် ကျပ် ၆၅၀၀၀ နှင့် တတိယ အရစ်တွင် ကျပ် ၆၅၀၀၀ ကို ပေးသွင်းရမည်ဖြစ်ကြောင်းသိရသည်။

ထို့ပြင်လက်ရှိတွင် မြန်မာ့ခရီးသွားဘဏ်မှဝိုင်းကြီးချုပ်စနစ်ဖြင့် အာမခံပြီး Travel Loan များကို ဆောင်ရွက် ပေးနေသည့် အပြင်
Corporate travel loan များနှင့် Travel Agent များ၏ Packge ခရီးစဥ်အလိုက် ခရီးသွားရောက်မည့်သူများအတွက် Travel Loan များကို ဆောင်ရွက်ပေးနေကြောင်း မြန်မာ့ခရီးသွားဘဏ်မှ တာဝန်ရှိသူက Travelling သို့ပြောသည်။

Credit Travel Loan
Photo LTETour

ကလောအခြေစိုက်ဖွင့်လှစ်ထားသည့်လုံးချင်းအိမ် (Home Stay) များကို တရားဝင်လုပ်ငန်းအဖြစ် လိုင်စင် စတင် ထုတ်ပေး

Posted on by Admin

Travelling Journal

ကလောအခြေစိုက် ဖွင့်လှစ်ထားသည့် လုံးချင်းအိမ် (Home stay )များကို တရားဝင်လုပ်ငန်းအဖြစ် လိုင်စင်ထုတ်ပေးနေပြီဖြစ်ကြောင်း ကလောမြို့နယ်စည်ပင်သာယာရေးဌာနမှ အမှုဆောင်အရာရှိ ဒုတိယညွှန်ကြားရေးမှူး ဦးကျော်မိုးထွန်း က Travelling သို့ ပြောသည်။

” နိုင်ငံခြားသားတည်းခွင့်မရဘူး။နိုင်ငံခြားသား တည်းခွင့်ရတာက ဟိုတယ်ခရီးလက်အောက်ကနေလိုင်စင်ယူထားတဲ့ ဟိုတယ်၊မိုတယ်တွေမှာပဲနိုင်ငံခြားသားတည်းလို့ရပါတယ်။စည်ပင်သာယာကနေ လိုင်စင်ကြီးကြပ်နေတဲ့Home Stay တွေမှာတော့ ပြည်တွင်းခရီးသွားတွေ အတွက်ပဲရည်ရွယ်တယ်”ဟု ကလောမြို့နယ် စည်ပင်သာယာရေးဌာနမှ အမှုဆောင်အရာရှိ ဒုတိယညွှန်ကြားရေးမှူး ဦးကျော်မိုးထွန်း က Travelling သို့ ပြောသည်။

လက်ရှိတွင် ကလောအခြေစိုက် Home Stay လုပ်ကိုင်နေသော စာရင်းကောက်ယူထားသည့် စာရင်းအရ ၂၂ လုံးရှိပြီး လက်ရှိအချိန်ထိအခွန် စည်းကြပ် ပြီးစီးထားသည့် Home Stay ၁၂ လုံးသာရှိသေးကြောင်းသိရသည်။

ထို့ပြင် ကျန်ရှိနေသေးသည့် အခွန်မစည်းကြပ်ရသေးသည့် Home Stay များကို ကောက်ယူနေပြီး ဆက်လက်ဆောင်ရွက်နေကြောင်းသိရသည်။

” ဌာနတစ်ခုကနေ လုပ်ငန်းလိုင်စင် လုပ်ပေးနိုင်ရင်လုပ်ငန်းရှင်အတွက်လည်း လုပ်ငန်းလုပ်ရတာကောင်းတယ်။နိုင်ငံတော်အခွန်အခလည်းရမယ်။ဘယ်ဌာနမှလိုင်စင်မပေးဘူးဆိုရင် လုပ်ငန်းရှင်တွေဘက်ကလည်း တရားမဝင်လုပ်သလိုဖြစ်နေမယ်။နိုင်ငံတော်အခွန်အခလည်းစည်းကြပ်လို့မရဘူး။ဒါ့ပြင် ခရီးသွားအရေ အတွက် ကောက်တဲ့အခါမှာလည်း လွတ်နေတယ်။Home Stay တွေမှာဝင်သွားတဲ့ ဧည့်သည်ကမနည်းဘူး။စည်ပင်က နေပေးလာရင် ဧည့်စာရင်းတိုင်ကြားလာတဲ့အခါခရီးသွားအရေ အတွက်တစ်ခုတော့ ထပ်ပိုလာမယ့်သဘောရှိပါတယ်”ဟု ရှမ်းပြည်နယ် ဟိုတယ်နှင့်ခရီးသွားလာရေးဦးစီးဌာနမှ ညွှန်ကြားရေးမှူး ဦးထင် အောင်နိုင် က Travelling Journal သို​့ပြောသည်။

ထို့ပြင် ကလောအခြေစိုက်နှင့် အောင်ပန်း ၊ဟဲဟိုး မြို့တွင် ဟိုတယ်နှင့်ခရီးသွားလုပ်ငန်းလိုင်စင်ဖြင့် လုပ်ငန်းလုပ်ကိုင်သည့် ဟိုတယ် အလုံးရေ ၈၀ ကျော်ရှိကြောင်း သိရသည်။

” ဟိုတယ်နဲ့မတူပဲ ကိုယ့်အိမ်လိုမျိုး ခံစားရစေတဲ့ရည်ရွယ်ချက်ရယ်။ မိသားစုလိုက်အေးအေး ဆေးဆေးနားချင်တဲ့သူတွေအတွက်ရည်ရွယ်ပြီး အခုလိုမျိုး Treasure Htoo ကို ဖွင့်ခဲ့တာဖြစ်ပါတယ်” ဟု ပိုင်ရှင်ဖြစ်သူက Travelling သို့ ပြောသည်။

ပုံ-စာ ကလောမြို့နယ်အခြေစိုက်ဖွင့်လှစ်ထားသည့်Treasure Htoo အမည်ရှိ လုံးချင်းအိမ်ကိုတွေ့ရစဥ်။

Kalaw Home Stay
Photo kalaw nice dream Motel

ပုဂံဒေသရှိ အထင်ကရ ဟိုတယ် တစ်ခုဖြစ်သော ဘောဂသိဒ္ဓိဟိုတယ်မှ မိုးရာသီကာလ အခန်းခနှုန်းထားကို ၃၀ ရာခိုင်နှုန်း လျှော့ချ

Posted on by Admin

Travelling Journal

မြန်မာခရီးသွားဘုရားဖူးများ အများဆုံးသွားရောက် လည်ပတ်ကြသည့် ပုဂံရှေးဟောင်း ယဥ်ကျေးမှုဒေသရှိ အထင်ကရဟိုတယ်တစ်ခုဖြစ်သော ဘောဂသိဒ္ဓိဟိုတယ်မှ မိုးရာသီကာလတွင် ဟိုတယ်အခန်းခနှုန်းထားများကို ၃၀ ရာခိုင်နှုန်း လျှော့ချပေးထားကြောင်း ယင်းဟိုတယ်၏ တာဝန်ရှိသူ က Travelling ကို ပြောသည်။

ပုဂံ​ဒေသရှိ ဘောဂသိဒ္ဓိဟိုတယ်သည် 3 Star အဆင့်ရှိ​ပြီး မြေ ၅ ဧက ဝန်းကျင်ပေါ်တွင် Resort Type Hotel ပုံစံ တည်ဆောက်ထားကာ အခန်းပေါင်း (၆၀) ရှိသည့် ဟိုတယ်တစ်ခုဖြစ်သည်။

” ဟိုတယ်အနေနဲ့ ဓာတ်ပုံရိုက်ကူးလို့ ကောင်းတဲ့နေရာတွေ များစွာ ရှိပါတယ်။ အစ်မတို့ ဟိုတယ်က ဟိုတယ်ဇုန်ထဲလည်းဖြစ်တယ်။ မြေဧက ကျယ်တော့ ဥယျာဥ်ကို စိတ်သက်သောင့်သက်သာဖြစ်အောင် တည်​ဆောက်ထားတာ ဖြစ်ပါတယ်။ အေးအေးဆေးဆေး အနားယူလို့ ကောင်းပါတယ်။ ရေကူးကန်က တခြားထက် ပိုပြီးကြီးပါ​ေတာ ့ရေကူးကန် ကျယ်ကျယ်ကြိုက်တဲ့သူတွေအတွက် အကောင်းဆုံးပါ”ဟု ယင်းဟိုတယ်၏ တာဝန်ရှိသူ က Travelling ကို ပြောသည်။

ပုဂံ ဒေသ၏ မိုးဦးကာလတွင် မြေသင်းရံနံ့များ
ဖြင့် ထုံမွမ်းနေပြီး ယင်းကာလ၌ ဘုရားဖူးဧည့်သည် အများစုမှာ ပုဂံဒေသသို့ လာရောက်လည်ပတ်ကြသည့်အတွက် ထိုကာလများတွင် မိုးရာသီအထူးအစီအစဥ်များအနေဖြင့် ဟိုတယ်များမှ အခန်းခနှုန်းထားများကို ​ေလျှာ့ချပေးကြောင်း သိရသည်။

ပုဂံဒေသရှိ ဘောဂသိဒ္ဓိ ဟိုတယ်၏ Superior အခန်း တစ်ညလျှင် (၆၅၀၀၀) ကျပ် ကို ကျပ် (၄၅၀၀၀) ဖြင့် လည်ကောင်း၊ ဘန်ဂလိုလုံးချင်းတည်းခိုပါက တစ်ညလျှင် ကျပ် (၈၅၀၀၀) ကို ကျပ် (၇၅၀၀၀) ထိ လျှော့ချပေးထားကြောင်း သိရသည်။

လက်ရှိတွင် ဘောဂသိဒ္ဓိကုမ္ပဏီလိမိတက်လက်အောက် ၌ ဟိုတယ် ၃ လုံးရှိပြီး ငပလီ နှင့် ကျိုက်ထီးရိုးတို့တွင် ဟိုတယ် တစ်လုံးစီ ရှိကာ နေပြည်တော်တွင် ဘောဂသိဒ္ဓိ အမည်ရှိ ဆေးရုံ
တို့ကို လုပ်ကိုင်ဆောင်ရွက်ကြောင်း သိရသည်။

BawgaTheiddhiHotel

ငွေဆောင်တွင် မုတ်သုန်မုန်တိုင်းရေလွှာ လျှောစီးပြိုင်ပွဲ စတင်

Posted on by Admin

Travelling Journal

အစိမ်းရောင်ကမ်းခြေ (Green Ngwe Saung)
ဟု တင်စားခံထားရသည့် ငွေဆောင်ကမ်းခြေ
တွင် မုတ်သုန်မုန်တိုင်းရေလွှာလျှောစီး ပြိုင်ပွဲ ကို ယနေ့ [မေလ(၂၉)]စတင် ယှဥ်ပြိုင်နေကြောင်း Surf Association of Myanmar မှ ဦးအောင်ဇော်လင်း (ခ)ပင်ကီ က Travelling ကို ပြောသည်။

” ဒီနေ့မှာတော့ အမြင့်ပေ ၈ ပေကျော်တဲ့ လှိုင်းလုံးကြီးတွေပေါ်မှာ​ ရေလွှာလျှောစီးပြိုင်ပွဲ​ ကျင်းပနေပါတယ်။ ပြိုင်ပွဲ ဝင် (၁၆) ဦး ပြိုင်နေပါတယ်။ဒီနေ့တစ်ရက်ထဲကျင်းပတာပါ။ အဲဒီထဲမှာ မိန်းကလေးနှစ်ဦး ပါပါတယ်။ကျွန်တော်တို့ ငွေဆောင်ရွက်ကလပ်ရှေ့က ပင်လယ်ပြင်ထဲမှာလှိုင်းစီးမှာပါ “ဟု ဦးအောင်ဇော်လင်း (ခ)ပင်ကီ က Travelling ကို ပြောသည်။

မြန်မာနိုင်ငံတွင် ပထမဆုံးရေလွှာလျှောစီးအဖွဲ့ကိုတည်ထောင်ထားသည့်အသင်းဖြစ်ပြီး အဆိုပါ အသင်းကို ၂၀၁၇ ၌ စတင်ဖွဲ့စည်းခဲ့ကာ ၂၀၁၈ တွင် ပြိုင်ပွဲကို စတင်ကျင်းပခဲ့သော်လည်း ကြားကာလနှစ်များတွင် ရပ်နားခဲ့ပြီး၂၀၂၂ မှ ပြန်လည် စတင်ကာပြိုင်ပွဲ များကို ကျင်းပခဲဲ့ကြောင်းသိရသည်။

လက်ရှိတွင် ရေလွှာလျှောစီးသူ အသင်းဝင် ၃၀ ဦးဝန်းကျင်ရှိပြီး လှိုင်းလုံးအသေးများနှင့် လေ့ကျင့်လိုပါက At The Sea ဟိုတယ်နှင့် ချစ်သူများကျွန်းတို့ ၌ သွားရောက်လေ့ကျင့်လေ့ရှိကြောင်းသိရသည်။

Surfing စီးမည့် သူကိုယ်တိုင်သည် မိမိစီးမည့် ဘုတ်၏ အစိတ်အပိုင်း‌များကို သိရမည်ဖြစ်ပြီး မိမိစီးမည့်ဘုတ်ကို Handle လုပ်နိုင်ရမည်ဖြစ်သလို လှိုင်းလာပါက ဖမ်းရမည့်သင်ကြားနည်းစနစ်များနှင့်ဘုတ်ပေါ်၌နေရမည့်ပုံစံများကို သင်ကြားပြသပေး​ကြောင်းသိရသည်။

ယနေ့ မေလ ၂၉ ရက် ၌ ကျင်းပသည့်
မုတ်သုန်မုန်တိုင်းရေလွှာလျှောစီး ပြိုင်ပွဲတွင်
ပထမဆုကို ဦးအောင်မင်းပိုင် ၊ ဒုတိယဆုကို
ဦးအောင်မင်းနိုင် အမြွှာညီအစ်ကို တို့မှ ရရှိခဲ့ပြီး တတိယဆုကို ဦးအောင်ဇော်လင်း မှ ရရှိခဲ့​ကြောင်းသိရသည်။

Ngwe saung beach
Photo-Surf Association of Myanmar

အာဆီယံ အသန့်ရှင်းဆုံးခရီးသွားမြို့တော်ဆု မြန်မာနိုင်ငံမှ ကျိုင်းတုံမြို့ ရရှိ

Posted on by Admin

Travelling Journal

အာဆီယံခရီးသွားလုပ်ငန်းစံနှုန်းဆုများ ပေးအပ်ရာတွင် မြန်မာနိုင်ငံမှ ခေါင်းစဥ်အလိုက် ဝင်ရောက်ယှဥ်ပြိုင်ရာ ကျိုင်းတုံမြို့မှ အာဆီယံအသန့်ရှင်းဆုံးခရီးသွားမြို့တော်ဆုကို ရရှိခဲ့ကြောင်း ကျိုင်းတုံ ဟိုတယ်နှင့်ခရီးသွားလာရေးညွန်ကြားမှုဦးစီးဌာနမှ တာဝန်ရှိသူ ကTravelling ကို ပြောသည်။

“လာအိုမှာ ပေးတာပါ။ ဆုကတော့ တောင်ကြီး ကိုရောက်နေပြီလို့ ကြားပါတယ်။အခမ်းအနားနဲ့ပေးမယ်လို့သိရပါတယ် ” ဟု ကျိုင်းတုံ ဟိုတယ်နှင့်ခရီးသွားလာရေး ညွန်ကြားမှုဦးစီးဌာနမှ တာဝန်ရှိသူ ကTravelling ကို ပြောသည်။

ပြီးခဲ့သည့် ဇန်နဝါရီလ ၂၂ ရက်နေ့မှ ၂၇ ရက်နေ့အထိ လာအိုပြည်သူ့ဒီမိုကရက်တစ်သမ္မတနိုင်ငံ၊ဗီယင်ကျန်းမြို့ရှိ Landmark Mekong Riverside Hotel တွင် အာဆီယံခရီးသွားလုပ်ငန်းဖိုရမ်- ၂၀၂၄ ကို ကျင်းပခဲ့ပြီး ယင်းဖိုရမ်တွင် မြန်မာ နိုင်ငံအတွက် အာဆီယံခရီးသွားလုပ်ငန်းစံနှုန်းဆုများပေးအပ်ရာတွင် မြန်မာနိုင်ငံမှ ASEAN Green Hotel Award (၅)ဆု၊ ASEAN MICE Venue Standard Award (Category: Meeting Room) (၃)ဆု၊ ASEAN MICE Venue Standard Award(Category: Exhibition Venue) (၂)ဆု၊ ASEAN MICE Venue Standard Award(Category: Event Venue) (၃)ဆု၊ ASEAN Sustainable Tourism Award (၁)ဆု နှင့် ကျိုင်းတုံမြို့နှင့် ပုသိမ်မြို့တို့မှ ASEAN Clean Tourist City Award တို့ကို အသီးသီးရရှိခဲ့ကြောင်း သိရသည်။

” နှစ်နှစ်တစ်ကြိမ် ပေးတာပါ။ ကျွန်တော်တို့ ကျိုင်းတုံမြို့က Clean Tourist City ကို ဝင်ပြိုင်ခဲ့တာပါ။ကျန်းမာရေး ၊ စည်ပင်၊ထွေအုပ်၊ ဟိုတယ်ခရီး ကနေ စံနှုန်းသတ်မှတ်ချက်တွေကို အဖွဲ့လိုက်စစ်ဆေးပြီး ဝင်ရောက် ယှဥ်ပြိုင်ခဲ့တာဖြစ်ပါတယ် “ဟု ကျိုင်းတုံ ဟိုတယ်နှင့်ခရီးသွားလာရေး ညွန်ကြားမှုဦးစီးဌာနမှ တာဝန်ရှိသူ ကTravelling ကို ပြောသည်။

မြန်မာနိုင်ငံမှ ကလောမြို့ နှင့် ပုဂံမြို့မှ အာဆီယံ အသန့်ရှင်းဆုံးခရီးသွားမြို့တော်ဆုကိုရရှိခဲ့ပြီး လက်ရှိတွင်ကျိုင်းတုံမြို့သို့ တာချီလိတ် နယ်စပ်ဝင်ပေါက်မှ ထိုင်းလူမျိုးများ ဝင်ရောက်လည်ပတ်နေကြောင်း သိရသည်။

Photo Ko Kyi Shein

တောင်လှေခါးမြို့တော်ဟု တင်စားသည့်ပြင်ဦးလွင်ရှိ The View Resort တွင်အပျော်တမ်း Zipline Adventure ပြုလုပ်နိုင်တော့မည်

Posted on by Admin

Travelling Journal

တောင်လှေခါးမြို့တော်ဟု တင်စားထားသည့် ပြင်ဦးလွင်မြို့ရှိ The View Resort တွင် စွန့်စားမှုကို အခြေခံထားသည့် အပျော်တမ်း Zipline Adventure ပြုလုပ်နိုင်တော့မည် ဖြစ်ကြောင်း The View Resort မှ တာဝန်ရှိသူက Travelling သို့ပြောသည်။

အဆိုပါ The View Resort သည် ပြင်ဦးလွင်မြို့၏ အထင်ကရရေတံခွန်တစ်ခုဖြစ်သည့် ဓာတ်တော်ချိုင့်ရေတံခွန်ကို မျက်နှာ မူပြီး တည်ဆောက်ထားသည့်အတွက် ဧည့်သည်များအနေဖြင့် ရေတံခွန်၏ အလှအပကို ကြည့်ရှုကာ Zipline ကို စီးနင်းနိုင်မှာ ဖြစ်ကြောင်းသိရသည်။

“ပြင်ဦးလွင်မြို့အဝင် အနီးစခန်းနားမှာရှိပါတယ်။အနီးစခန်းကနေလာမယ်ဆိုရင် မိနစ် ၂၀ လောက်ပဲကြာပါတယ်။ လက်ရှိမှာ တော့ တည်​ဆောက်မှု ကာလက ပြီးပါပြီ။ စမ်းသပ်ပြီးစီးမှုကာလပါ။ သေသေချာချာလေး မဖွင့်ရသေးတာပဲရှိပါတယ် “ဟု The View Resort မှ တာဝန်ရှိသူက Travelling သို့ပြောသည်။

Zipline ကို လာရောက်စီးနင်းမည့် ခရီးသွားများအတွက် Safety အပိုင်းကို အဓိက စီမံထားပြီး တည်ဆောက်ရေးအပိုင်းကို ရန်ကုန်အခြေစိုက် Adventure Centre မှတာဝန်ယူဆောက်လုပ်ပေးထားကာ လက်ရှိတွင် စွန့်စားမှုခရီးစဉ်နယ်ပယ်၌ နှစ်(၃၀)နီးပါး အတွေ့အကြုံရှိသည့် နီပေါလူမျိုး Zipline ပညာရှင်က သင်ကြားပြသပေးလျက်ရှိကာ တွဲဖက်သုံးဦးဖြင့် ဆောင်ရွက်ပေးလျက်ရှိကြောင်းသိရသည်။

အဆိုပါ Zipline ကို The View Resort ၏ စားသောက်ဆိုင်မှ Bamboo အဆောက်အအုံထိ ကို အသွားလိုင်း အနေဖြင့် သတ်မှတ်ထားပြီး အကွာအဝေးအားဖြင့် ပေပေါင်း (၂၆၀) ရှိကာ အမြင့်ပေ ၁၀၀ နှင့် စီးနင်းချိန် ကို ၁၆ စက္ကန့် ​သတ်မှတ်ထားကြောင်းသိရသည်။

ထို့ပြင် အပြန်လိုင်းအနေဖြင့် Bamboo မှ Restaurant အထိ သတ်မှတ်ထားပြီး အကွာအဝေးအားဖြင့် ပေပေါင်း (၃၃၀) အကွာရှိကာ အမြင့်ပေ ၁၂၀ နှင့် စီးနင်းချိန် ကို ၁၄ စက္ကန့် ​သတ်မှတ်ထားကြောင်းသိရသည်။

Zipline စီးနင်းခ အနေဖြင့် တစ်ဦးလျှင် အသွားအပြန် ကျပ်တစ်သောင်းခွဲ သတ်မှတ်ထားပြီး အသွားလိုင်း အပြန်လိုင်းများတွင် ခရီးသည်နှစ်ဦးအထိ တစ်ပြိုင်နက် စီးနင်းနိုင်မည်ဖြစ်ကြောင်း သိရသည်။

The View Resort သည် ဓာတ်တော်ချိုင့်ရေတံခွန်ဗျူးကို မျက်နှာမူ တည်ဆောက်ထားပြီး လက်ရှိတွင် Crest Villa၊ Bungalow နှင့် Bamboo Building အဆောက်အအုံံ သုံးမျိုးရှိကြောင်းသိရသည်။

ဓာတ်တော်ချိုင့် ရေတံခွန်သည် မန္တလေးတိုင်းဒေသကြီး၊ ပြင်ဦးလွင်ခရိုင်၊ ပြင်ဦးလွင်မြို့ ရပ်ကွက်ကြီး ၁၇၊ အနီးစခန်းတွင် တည်ရှိပြီး ပြင်ဦးလွင်-မန္တလေး ကားလမ်းမကြားတွင် တည်ရှိကြောင်းသိရသည်။

Photo The View Resort

ခိုလမ်မြို့၏လည်ပတ်စရာခရီးစဥ်တစ်ခုဖြစ်လာမည့် ခိုလမ်ရေပြာအိုင်

Posted on by Admin

Travelling Journal

ရှမ်းပြည်နယ်တောင်ပိုင်း၊ နမ့်စန်ခရိုင်၊ ခိုလမ်မြို့ရှိ ခိုလမ်ရေပြာအိုင်ကို အထင်ကရ လည်ပတ်စရာ ခရီးစဥ်​ဒေသတစ်ခုဖြစ်အောင် ဆောင်ရွက်သွားမည်ဖြစ်ကြောင်း ခိုလမ်ရေပြာစမ်းကို ဖော်ဆောင်သူ ဦးသားငယ်က Travelling သို့ ပြောသည်။

ခိုလမ် ရေပြာအိုင် နှင့် ဆက်စပ်ပြီး ခိုလမ် ရေပူစမ်း ၊ နမ့်မောင်းချောင်းရေတံခွန် ၊ နမ့်ဟူး ရှေးဟောင်း ဘုရားလှိုဏ်ဂူ တို့ကို ချိတ်ဆက်ကာ ပြည်တွင်းပြည်ပ ခရီးသွားဧည့်သည်များ ပိုမိုလာရောက်လည်ပတ်နိုင်ရန် ဆောင်ရွက်သွားမည်ဟု အဆုိပါ လုပ်ငန်းရှင်က Travelling သို့ ပြောသည်။

“နောင်မှာ ခရီးသွား အလားအလာကောင်းတဲ့အချက်အချာကျတဲ့ မြို့ဖြစ်လာမှာပါ။ ခိုလမ်က လမ်းဆုံံ ဖြစ်သွားတယ်။ ခိုလမ်ကနေ ​မြောက်ဖက်ကို နှစ်နာရီလောက်သွားရင် ဟိုက်ပါရေတံခွန်ကို ရောက်မယ်။ တောင်ဘက်ကိုတစ်နာရီလောက်သွားရင် ကျိုင်းတောင်းရေတံခွန်ကို ရောက်ပါတယ်။ ဒါတင်မကသေး ပါဘူး။ ခိုလမ်ကနေ နာရီဝတ်လောက်သွားရင် နောင်ဖာကန်ကိုလည်းရောက်တာမို့ ခရီးသွား အလားအလာကောင်းတဲ့အချက်အချာ ကျနေရာတစ်ခုဖြစ်လာမှာ “ဟု ရှမ်းပြည်နယ် ဟိုတယ်နှင့်ခရီးသွားလာရေးဦးစီးဌာနမှ ညွှန်ကြားရေးမှုး ဦးထင်အောင်နိုင်က Travelling Journal သို့ ပြောသည်။

အဆိုပါ ရေပြာအိုင်သည် သဘာဝရေထွက်ပေါက်တစ်ခုအနေဖြင့် တည်ရှိနေပြီး အေဒီ ၇၅၄ ခုနှစ်က တည်ထားခဲ့သည့် ရှေးဟောင်းဘုရားရှိရာ​ နမ့်ဟူးလှိုဏ်ဂူ၏ အောက်ခြေက​ေန စီးဆင်းလာသည့် ချောင်းနှစ်ချောင်းမှ အောက်ပိုင်းတွင် တစ်ခုတည်းအဖြစ် ပေါင်းစည်းလာခဲ့သော သဘာဝရေထွက် (ရေပြာအိုင်) အဖြစ် ဖြစ်ပေါ်လာခဲ့ကြောင်း ခိုလမ်းရေပြာစမ်းကိုဖော်ဆောင်သည့် လုပ်ငန်းရှင်က Travelling သို့ ပြောသည်။

“နမ့်ဟူး ရှေးဟောင်းဘုရားကို ဝင်ရောက်ဖူးမြှော်နိုင်ပါတယ်။ ဒီဘုရားရဲ့ထူးခြားချက်က လပြည့်လကွယ်နေ့ဆို လှိုဏ်ဂူထဲကနေ မျောက်မြီးရှည် တွေထွက်လာပြီး အစာရှာထွက်တယ်။ အစာရှာထွက်ပြီးအထဲကိုပြန်ဝင်သွားတယ်။ ကျန်တဲ့ရက်ဆို မထွက်ဘူး။ ဒါကတော့ထူးခြားချက်ပါ။ ဒီ နမ့်ဟူးဘုရားကနေ ၁၅ မိနစ်လောက်ပဲ သွားရတယ်။ ရေပြာအိုင်ကိုရောက်ပါတယ်။ရေချိုး နားနေကစားနိုင်ပါတယ် “ဟု ​​​ေဖာ်ဆောင်သည့််လုပ် ငန်းရှင်တစ်ဦးက Travelling သို့ ပြောသည်။

လက်ရှိတွင် ခိုလမ်ရေပြာအိုင်သို့ လာရောက်လည်ပတ်သည့် ခရီးသွားများ အဆင်ပြေစေရန်အတွက် ယာဥ်ရပ်နားကွင်းများ၊စားသောက်ဆိုင်များနှင့်အများသုံးသန့်စင်ခန်းများကိုဆောင်ရွက်ပေးထားကြောင်းသိရသည်။

” ထိုင်းခရီးသွားတွေဆိုရင် ဟိုက်ပါရေတံခွန် ကိုသွားချင်တာ။ ဟိုက်ပါရေတံခွန် ကိုသွားဖို့ ဆိုရင် ခိုလမ်မှာ ညအိပ်ရမှာဖြစ်ပါတယ်။ ပြီးရင် ပြန်လာ။ ဒါကြောင့်မို့ ခိုလမ်က အချက်အချာကျ လာတဲ့ မြို့ဖြစ်လာပါတယ် “ဟု ရှမ်းပြည်နယ် ဟိုတယ် နှင့်ခရီးသွားလာရေးဦးစီးဌာနမှ ညွှန်ကြားရေးမှုး ဦးထင်အောင်နိုင်က Travelling Journal သို့ ပြောသည်။

ယခင်က ခိုလမ်မြို့သည် ရွာအဆင့်သာဖြစ်ခဲ့သော်လည်း လွန်ခဲ့သည့် ၁၀ နှစ်ကျော်မှ မြို့အဆင့်သတ်မှတ်ခဲ့နောက် ဖွံ့ဖြိုးတိုးတက်လာသည့်မြို့တစ်ခုဖြစ်လာပြီးလက်ရှိတွင်ခိုလမ်မြို့ပေါ်တွင် ညောင်စီးလူမျိုး၊ ရှမ်းလူမျိုးနှင့် လားဟူလူမျိုးများနေထိုင်ကြပြီး ရှမ်းစာ ၊တရုတ်စာ၊မြန်မာစကားကိုသာ အသုံးပြုနေကြောင်း သိရသည်။

တောင်ကြီး- ဟိုပုန်း -မိုင်းပွန်- လွယ်လင်- နမ့်စန် –
ခိုလမ် စသည့်ဖြင့် သွားရောက်နိုင်ပြီး တောင်ကြီးမြို့မှ ကား ဖြင့် ငါးနာရီဝန်းကျင်ခန့် သွားရောက်လည်ပတ်နိုင်ကြောင်းသိရသည်။

photo Thar Nge / Cherry phoo

လေပြင်းတိုက်ခတ်မှုကြောင့် သမိုင်းဝင်မွေတော်ကက္ကူဘုရား အရံစေတီ ငါးဆူ ထီးတော်မြေခခဲ့

Posted on by Admin

Travelling Journal

ရှမ်းပြည်နယ်(တောင်ပိုင်း)၊ တောင်ကြီးခရိုင်၊ ကျောက်တလုံးကြီးမြို့တွင် ရှိသည့် သမိုင်းဝင်မွေတော်ကက္ကူဘုရားဝန်းရှိ အရံစေတီ ငါးဆူ မှာလေပြင်းတိုက်ခတ်မှုကြောင့် ထီးတော်​ မြေခ ခဲ့ကြောင်း မွေတော်ကက္ကူ ဘုရားဂေါပကအဖွဲ့ အတွင်းရေးမှူး ဦးကျော်ဆန်း က Travelling သို့ပြောသည်။

ပြီးခဲ့သည့် မေလ (၂) ရက် ညပိုင်းတွင်လေပြင်း တိုက်ခတ်၍ မိုးသည်းထန်စွာရွာသွန်းမှုကြောင့် အဆိုပါအရံစေတီငါးဆူ၏ ထီးတော်မြေခခဲ့ရကြောင်း သိရသည်။

“မေလ ၂ ရက် ည၇ နာရီ ခွဲခန့်က ဖြစ်ခဲ့တာပါ။ စေတီတစ်ဆူလုံးမဟုတ်ပါဘူး။ အရံစေတီ ငါးဆူ ရဲ့ထီးတော်ပဲ ​မြေခ ခဲ့တာ “ဟု ဦးကျော်ဆန်း က Travelling သို့ ပြောသည်။

ယင်းကဲ့သို့ ဖြစ်စဥ်မျိုးလည်း ၂၀၁၆ ခုနှစ် ဧပြီလ ၂၂ ရက်နေ့ကလည်း မွေတော်ကက္ကူဘုရားဝန်းအတွင်း တည်ထားကိုးကွယ်လျက်ရှိသည့် အရံစေတီ( ၁၀၃၈ )ဆူ မှာ ပျက်စီးခဲ့ရကြောင်းသိရသည်။

“ပြီးခဲ့တဲ့ ရှစ်နှစ်တုန်းက အရံစေတီ တစ်ထောင်ကျော်ပျက်စီးခဲ့ပါတယ်။ အခုကတော့ ငါးဆူ ဆိုတော့မကြာခင် ပြန်လည်ပြုပြင်သွားဖို့စီစဥ်နေပါပြီ”ဟု အတွင်းရေးမှူးဦးကျော်ဆန်း က Travelling သို့ ပြောသည်။

ထို့ပြင် လေပြင်းတိုက်ခတ်၍မိုးသည်းထန်စွာရွာသွန်းမှုကြောင့် ကက္ကူကျေးရွာရှိ လူနေအိမ်တစ်ချို့လည်းခေါင်မိုးသွပ်များပျက်စီးမှုများရှိခဲ့ကြောင်းသိရသည်။

Photo နွိုး ဟွမ်

စီးပွားရေးမြို့တော်ဖြစ်သည့် မန္တလေးမြို့တွင် ကြယ်လေးပွင့်အဆင့် ဟိုတယ်ကို တည်ဆောက်နေ

Posted on by Admin

Travelling Journal

စီးပွားရေးမြို့တော်ဖြစ်သည့် မန္တလေးမြို့တွင် ကြယ်လေးပွင့်အဆင့် ဟိုတယ်ကိုတည်ဆောက် နေကြောင်း Y Mandalay Hotel အုပ်စု၏ တာဝန်ရှိသူက Travelling သို့ပြောသည်။

ယင်းဟိုတယ်ကို ၂၀၂၃ ခုနှစ်မှ စတင်ကာ 4 Stars အဆင့်မီ ဆောက်လုပ်နေပြီး မြေဧက အကျယ် ၁.၆၅ ဧက ပေါ်တွင် ဆောက်လုပ်နေကြောင်းသိရသည်။

“အဆောက်အအုံကတော့ ၇ ထပ် ပါ။ လောလောဆယ် တစ်လွှာပဲ ပြီးပါသေးတယ်”ဟု ယင်းဟိုတယ်၏ တာဝန်ရှိသူက Travelling သို့ပြောသည်။

လက်ရှိတွင် ပထမထပ်ရှိအခန်း၂၀ ကို သာ စတင်ဖွင့်လှစ်ထားပြီး ဟိုတယ်၏ စုစုပေါင်း အခန်းအရေအတွက်ကို ၁၀၅ ခန်းထိ ထည့်သွင်းသွားမည် ​ဖြစ်ကြောင်း သိရသည်။

ဟိုတယ်တွင် အခန်းအမျိုးအစားနှစ်မျိုးရှိပြီး
Deluxe အခန်းကို တစ်ညလျှင် ကျပ်တစ်သိန်းနှစ်သောင်း(120,000/-)ဖြစ်ပြီး Suite အခန်းကို တစ်ညလျှင် ကျပ်တစ်သိန်းခြောက်သောင်း (160,000/-) သတ်မှတ်ထားကြောင်း သိရသည်။

မြန်မာ့ဟိုတယ်နှင့် ခရီးသွားလာရေးလုပ်ငန်း ဖွံ့ဖြိုးတိုးတက်ရေးကဏ္ဍတွင် နေရာတစ်နေရာမှ ပူးပေါင်းပါဝင်ဆောင်ရွက်ခွင့်ရသည့်လုပ်ငန်းစုတစ်ခုအနေဖြင့် ရပ်တည်လိုခြင်းနှင့် Hotel ကို လာရောက်တည်းခိုသည့် ဧည့်သည်များ အပေါ် Professional ကျကျ service ပေးနိုင်သည့် Hotel တစ်လုံး ဖြစ်ပေါ်လာစေရန် ရည်ရွယ်ချက်ဖြင့် ဟိုတယ်ကိုဆောက်လုပ်ရခြင်းဖြစ်ကြောင်း သိရသည်။

လက်ရှိ တွင် Y Mandalay Hotel အုပ်စု အောက်တွင် ဟိုတယ်နှစ်လုံးရှိပြီး အောင်မြင်ခြင်း Triumph Hotel နှင့် Y Mandalay Hotel တို့ကို ဆောက်လုပ်​​ခဲ့ပြီးဖြစ်ကာ တခြား ပြည်နယ်နှင့်တိုင်းတို့တွင်လည်း ဟိုတယ်များကို ထပ်မံဆောက်လုပ်သွားရန် စီစဥ်ထားကြောင်း သိရသည်။

Photo Y Mandalay Hotel

တောင်ရိုးတိုင်းရင်း သားတို့၏ ရိုးရာတာတက်ပွဲကိုကျင်းပ​နေ

Posted on by Admin

Travelling Journal

တောင်ရိုးတိုင်းရင်းသားတို့၏ ရိုးရာဓလေ့ပွဲတော်ဖြစ်သည်​့ ရိုးရာတာတက်ပွဲတော်ကို ကျင်းပနေကြောင်း တောင်ရိုးတိုင်းရင်းသားဒေသခံတစ်ဦးက Travelling သို့ပြောသည်။

အဆုိပါပွဲတော်သည် တောင်ရိုးတိုင်းရင်းသားတို့၏ ရိုးရာအမွေအနှစ်ပွဲတော်တစ်ခုဖြစ်ပြီး နှစ်စဥ် တန်ခူးလနှင့် ကဆုန်လများတွင် ကျင်းပလေ့ရှိကြောင်းသိရသည်။

တောင်ရိုးတိုင်းရင်းသားများသည်် ရာသီအလိုက် စိုက်ပျိုးရေးကို အဓိကလုပ်ကိုင်ကြပြီးရိုးရာ ဓလေ့ဖြစ်သည့် တာတက်ပွဲ (ခေါ်) မီးလုံးပွဲတော်ကို တောင်ရိုးတိုင်းသားများနေထိုင်ရာ
မြို့နယ်များရှိရွာများအလိုက် နှစ်စဥ်ကျင်းပလေ့ရှိကြကြောင်းသိရသည်။

ရှမ်းပြည်နယ်အတွင်း တိုင်းရင်းသား လူမျိုး
ပေါင်းစုံနေထိုင်ကြပြီး တိုင်းရင်းသား တစ်ခုချင်းစီ၌ ရိုးရာဓလေ့နှင့်ယဥ်ကျေးမှု ကိုယ်ပိုင်ဟန်​များရှိကြကာ ရှမ်းတိုင်းရင်းသားမျိုးနွယ်စု (၃၃)မျိုးတွင် တောင်ရိုးမျိုးနွယ်စုလည်း ပါဝင်ကြောင်း သိရသည်။

အနီးစပ်ဆုံးအနေဖြင့် ဧပြီလ (၂၄)ရက်တွင် ကလောမြို့နယ်ရှိ တောင်မြေခြားရွာ နှင့် ပင်းတယမြို့နယ်ရှိ ပွေးလှရွာl ဝါတရာရွာ l တည်ပင်ရွာတို့ ရိုးရာတာတက်ပွဲတော်ကိုကျင်းပခဲ့ပြီးဖြစ်ကြောင်းသိရသည်။

ရှမ်း ပြည် နယ်အတွင်း ကလော l အောင်ပန်းl
ပင်းတယနှင့် ပင် လောင်းတို့တွင် တောင်ရိုးတိုင်းရင်းသားလူဦးရေငါးသိန်းဝန်းကျင်ခန့်နေထိုင်ကြပြီး တောင်ရိုးတိုင်းရင်းသား များနေထိုင်ကြသည့်ကျေးရွာများတွင် ယင်း ပွဲတော်များကို ဆင်နွဲဲ ကြလေ့ရှိကြောင်းသိရသည်။

Taung Yoe Traditional Festival
Photo Lu Wine /Sai khant zaw