Tag: travellingjournal

အင်းဝရှေးဟောင်းဘုရား ရာကျော်ပျက်စီးများရှင်းလင်းရေးတွင် ရှေး/သု အပြင် ပရဟိတဆရာတော်အဖွဲ့ တစ်ဖွဲ့ကသာ ရှင်းလင်းဆောင်ရွက်နေ

Posted on by Admin

#TravellingJournal

အင်းဝရှေးဟောင်းဘုရား ရာကျော်ပျက်စီးမှုများ ရှင်းလင်းရေးတွင် ရှေး/သု အပြင် ပရဟိတဆရာတော်အဖွဲ့ တစ်ဖွဲ့ကသာ ရှင်းလင်းဆောင်ရွက်ပေးနေကြောင်း ရှေးဟောင်းဘုရားများသန့်ရှင်းရေးအဖွဲ့(ရန်ကုန်) မှ နာယကဆရာတော်ဦးပညာသာရ က Travelling သို့ မိန့်ကြားသည်။

” သစ္စာတိုက်ဘုရား၊ ဆုထူးပန်ဘုရား၊ ခဲသင်းဘုရားစု ၊ မဟာမြတ်မုနိဘုရား၊ စန္ဒာမုနိဘုရားကြီးနဲ့ တောင်ပေါ်သာကျောင်းဝင်းထဲက ရှေးဟောင်းဘုရားနှစ်ဆူ တို့ကို သန့်ရှင်းရေးပြီးပြီ။ အခုလက်ရှိကတော့ ဒေါ်ဂျမ်းဘုရားစုကို သန့်ရှင်းရေးဝင်လုပ်နေတာ နှစ်ရက်ရှိပါပြီ။ ဘုန်းဘုန်း ကတော့ ရှေးဟောင်းဘုရားတွေကို သန့်ရှင်းရေးလုပ်ပေးရတာကို ဝါသနာပါတာ။လေးလပိုင်းပထမပတ်ကတည်းက အင်းဝကို ရောက်နေပြီး ကူညီတာပေါ့။ ပျက်တဲ့ဘုရားတွေကတော့အများကြီးပေါ့။ နိုင်တဲ့ဝန်ကို တစ်ဖက်တစ်လမ်းကနေ ကူညီပေးနေတာ။ အခက်အခဲကတော့ နဝကမ္မ လိုတာပေါ့။ နဝကမ္မရှိရင် ပြည့်စုံပါတယ်” ဟု ရှေးဟောင်းဘုရားများသန့်ရှင်းရေးအဖွဲ့(ရန်ကုန်) မှ နာယက ဆရာတော် ဦးပညာသာရ က Travelling သို့ မိန့်ကြားသည်။

နိုင်ငံခြားသားခရီးသွားအများစုမဖြစ်မနေ သွားရောက် လည်ပတ်ကြသည့် အင်းဝ​မြို့ဟောင်းတွင် စေတီပုထိုး ကိုးရာ ကျော်ရှိသည့်အနက်(၆၀၀) ကျော် ပျက်စီးခဲ့ရပြီး လက်ရှိတွင် ရှေးဟောင်းသုတေသနနှင့်အမျိုးသားပြတိုက်ဦးစီးဌာနမှ အင်ဂျင်နီယာများနှင့် သုတေသနသမားများမှလည်း ကွင်းဆင်းနေကြောင်း ယင်း ဌာနမှ တာဝန်ရှိသူတစ်ဦးက ၎င်း၏ လူမှုကွန်ယက်စာမျက်နှာပေါ်တွင် ရေးသားထားသည်ကို တွေ့ရသည်။

မန္တလေးတိုင်းဒေသကြီးအတွင်းရှိ အင်းဝမြို့ဟောင်းသည် စိတ်ဝင်စားဖွယ်လေ့လာစရာ များစွာတည်ရှိပြီး ပြည်တွင်းပြည်ပခရီးသွား ဧည့်သည်များကို ဆွဲဆောင်လျက်ရှိသည့် နာမည်ကျော်ခရီးသွားနေရာတစ်ခု ဖြစ်သလို အင်းဝတွင်နာမည်ကြီးလူသိအများဆုံးဖြစ်သည့် မယ်နုအုတ်ကျောင်းလို့ခေါ်တွင်သည့် “မဟာအောင်မြေဘုံစံ” ကျောင်းတော်ကြီးလည်း ပြိုကျပျက်စီးခဲ့သည်။

#TravellingJournal
#News
#Photo UKyawMyoWin(fb)
ပုံ-စာ ပျက်စီးသွားသည့်အင်းဝရှေးဟောင်းဘုရားတစ်ဆူတွင်ရှင်းလင်းရေးလုပ်နေသည့်မြင်ကွင်းတစ်ချို့ကိုတွေ့ရစဥ်။

ငလျင်ကြောင့် မန္တလေးရှိဟိုတယ် (၁၆) လုံးပြိုကျပြီး ပျက်စီးသည့် ဟိုတယ်စာရင်းများကို စိစစ်နေ

Posted on by Admin

#Travelling Journal

ပြီးခဲ့သည့် မတ်လက လှုပ်ခတ်ခဲ့သည့် အင်အားပြင်းငလျင်ကြောင့် မန္တလေးတိုင်းဒေသကြီး အခြေစိုက်ဟိုတယ် (၁၆) လုံး ပြိုကျပျက်စီးခဲ့ပြီး မပြိုကျပဲဒဏ်ဖြစ်ခဲ့သည့် ဟိုတယ်စာရင်းများကို စိစစ်နေကြောင်း မန္တလေးဟိုတယ်ဆိုင်ရာလုပ်ငန်းရှင်များအသင်းဥက္ကဋ္ဌ က Travelling သို့ပြောသည်။

” ပြိုကျတာကတော့ (၁၆) လုံးရှိတယ်။ မပြိုပေမဲ့ အနာရှိသွားတဲ့ ဟိုတယ်အဆောက်အအုံစာရင်းတွေကိုလည်း စိစစ်နေပါတယ်။ မပြီးသေးပါဘူး။(ဟိုတယ်/ခရီး) ကလည်း စစ်ဆေးနေသလို သက်ဆိုင်ရာဟိုတယ်တွေကလည်း သူတို့ဘာသာပြုပြင်နေတာတွေလည်းရှိပါတယ် “ဟု မန္တလေး ဟိုတယ်ဆိုင်ရာလုပ်ငန်းရှင်များအသင်း ဥက္ကဋ္ဌ က Travelling သို့ ပြောသည်။

မတ် ၂၈ ရက် က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင် လှုပ်ခတ်ခဲ့သောကြောင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်နှင့်နေပြည်တော်တို့တွင် ထိခိုက်မှုများဖြစ်ပေါ်ခဲ့ခြင်းဖြစ်သည်။

“ကားကြီးကွင်းနားမှာ ဟိုတယ်အဆောက်အအုံ
လေးလုံး တန်းစီပြီး ဆောက်ထားတာပါ။ (၁) ကတော့ ပထမထပ်ပြိုကျတော့ ငါးထပ်လုံးကို ဖြိုချရမှာပါ။
နောက်တစ်လုံး(၂) ကတော့ (၁၂)ထပ်ဆောက်ဖို့ရည်ရွယ် ထားပေမဲ့ အခုက (၈) ထပ်ဟိုတယ်ပဲဆောက်ထားတာ။ သူက အောက်ခြေခိုင်ခန့်တော့ ဘာမှကြီးကြီးမားမားမထိခိုက်ဘူး။ ဓာတ်လှေခါးရော /မှန်တွေရော မထိခိုက်ဘူး။ အောင်မြင့်မိုရ်တည်းခိုခန်းနဲ့ လူနေအိမ်ကတော့ ပြန်ပြီးစစ်ဆေးရမှာဖြစ်ပါတယ် “ဟု အောင်မြင့်မိုရ်ဟိုတယ်ပိုင်ရှင် က Travelling သို့ ပြောသည်။

ထို့ပြင် အဆိုပါ ဟိုတယ်အဆောက်အအုံများကို ဂျပန်နိုင်ငံ၏ အာမခံလုပ်ငန်းဖြစ်သည့် GGI အာမခံလုပ်ငန်းတွင် အလုံးစုံံအာမခံထားရှိပြီးဂျပန်ကုမ္ပဏီ( GGI) အာမခံဌာနမှ ဂျပန်ကုမ္ပဏီနှင့် ထိုင်းအခြေစိုက် GGI ကုမ္ပဏီ တို့က လာရောက်စစ်ဆေးခဲ့ကြောင်း ၎င်းက Travelling သို့ ပြောသည်။

” မထိတဲ့ ဟိုတယ်တော့မရှိပါဘူး။ နည်းနည်းနှင့် များများသာ ကွဲပြားပါတယ်။ ကျွန်တော်တို့ကတော့
၂၈ ရက်ကတည်းက ဆက်ဖွင့်ထားတာပါ။ဟိုတယ်ရဲ့ Structure Beam အကုန်ကောင်းတော့ရေချိုးခန်းနံရံ အုတ်ရိုးလောက်တော့ ထိပါတယ်”အထပ်မြင့် ဟိုတယ် ပိုင်ရှင် တစ်ဦးကလည်း Travelling သို့ပြောသည်။

#Travelling Journal
#News
#Photo-Social/Internet
ပုံ-စာ ငလျင်ကြောင့်ပြိုကျခဲ့သည့်ဟိုတယ်တစ်လုံးနှင့် မပြိုကျပဲဒဏ်ဖြစ်ခဲ့သည့် ဟိုတယ်တစ်လုံးကိုတွေ့ရစဥ်။

ခရီးသွားလုပ်ငန်း အသိုက်အဝန်းမှ အလှူရှင်များစုပေါင်းပြီး အင်းလေး ပေါက်ပါးရွာတွင် ဝါးအိမ်များ ကိုယ်ထူကိုယ်ထ ဆောက်လုပ်ပေးနေ

Posted on by Admin

#TravellingJournal

ရှမ်းပြည်နယ်တောင်ပိုင်း၊ ညောင်ရွှေမြို့နယ်၊အင်းလေး ဒေသရှိ ပေါက်ပါးရွာတွင် ငလျင်ဘေးသင့်အိမ်များအတွက် ခရီးသွားလုပ်ငန်းအသိုက်အဝန်းမှ အလှူရှင်များစုပေါင်းပြီး ဝါးအိမ်များကို ကိုယ်ထူကိုယ်ထ ဆောက်လုပ်ပေးနေကြောင်းဦးဆောင်ဆောင်ရွက်လုပ်ကိုင်နေသည့် ဧည့်လမ်းညွှန် ဦးတင်လှိုင်က Travelling သို့ပြောသည်။

” ငလျင်လှုပ်ခါစက အင်းလေးမှာ ပျက်ကျသွားတဲ့ အိမ်တွေကို ဝါးအိမ်လေးတစ်လုံးလောက်ပြန်ဆောက်ပေးချင်လိုက်တာဆိုပြီး ညီမလေးဝါဝါနဲ့ စတင်ခဲ့ပါတယ် ။ အမှန်အတိုင်းပြောရရင် အစပထမမှာ ကျွန်တော်တို့ရော မဝါဝါ ပါ ( Emotion Travel ) နဲ့ ပူးပေါင်းကာ အိမ်တစ်အိမ်လှူနိုင်ဖို့တောင် မဝံ့မရဲခဲ့ပါဘူး။ ဒါပေမဲ့ တဖြည်း ဖြည်းနဲ့ ပြည်တွင်း/ပ က အလှူရှင်တွေ တိုးတိုးလာတာ အခုဆိုရင်( ၅) အိမ်အထိ ဆောက်လုပ်လှူဒါန်းနိုင်ပါပြီ။ အင်းလေးထိ ကိုယ့်စရိတ်နဲ့ကိုယ်လာပြီး ငွေဇင်ယော်ဆေးလိပ်ခုံမှာဘဲ တည်းခိုကာ ကြီးကြပ်ပေးနေပါတယ်။ ဒေါ်တင်မြင့်၊ မသွယ်သွယ်မြင့်တို့က Eyeful Lake Restaurent ၊ အခု ( ၅) အိမ်မြောက် အလှူရှင် Ava Travel က organize လုပ်ပေးထားတယ် “ဟု ဧည့်လမ်းညွှန်တစ်ဦးဖြစ်သူ ဦးတင်လှိုင်က Travelling သို့ ပြောသည်။

အင်းလေးရှိ ပေါက်ပါးရွာသည် ရေပေါ်ရွာဖြစ်ပြီး
အိမ်​ခြေ (၂၂၈)လုံး ရှိပြီး ပျက်စီးခဲ့သည့် အိမ်ခြေ (၉၄) လုံးရှိကာ ယိုင်နဲ့ ခဲ့သည့် အိမ်ခြေ (၁၀၈ )အိမ်ရှိကြောင်းသိရသည်။

အဆိုပါ ဝါးအိမ်များတည်ဆောက်ရာတွင် အိမ်တစ်လုံးလျင် ကျပ် (၅၂ )သိန်း ကုန်ကျကြောင်း သိရသည်။

“ကျွန်တော်တို့ အခုလုပ်နေတာက သေသပ်ခိုင်ခန့်ပြီး လက်ရာကောင်းကောင်းနဲ့ပါ။ဝါးဘိုးဝါးမဟုတ်ပါဘူး။ ဝါးကအစ အင်းလေးရေထဲမှာ ကြာကြာခံတဲ့ ဝါးနဲ့ တည်ဆောက်ပေးပါတယ် ” ဟု ဦးတင်လှိုင်က Travelling သို့ ပြောသည်။

#TravellingJournal
#News
#Photo Tin Hlaing

မြန်မာနိုင်ငံခရီးသွားလုပ်ငန်းအဖွဲ့ချုပ်မှ အိမ်တစ်လုံး (၅၄ )သိန်းခွဲဖြင့် ရေဘေးသင့်အိမ်(၂၂ ) လုံး ဆောက်လုပ်ပေးပြီး ရွာသားများထံအပ်နှံ

Posted on by Admin

#TravellingJournal

နေပြည်တော်ပြည်ထောင်စုနယ်မြေ၊ မကျည်းပင်ကျေးရွာအုပ်စုမှ ရေဘေးကြောင့် ရွာလုံးကျွတ်နီးပါး ပျက်စီးခဲ့ရသည့် ညောင်ပင်သာကျေးရွာရှိ နေအိမ်(၂၂ ) လုံးကို မြန်မာနိုင်ငံခရီးသွားလုပ်ငန်းအဖွဲ့ချုပ်မှ အိမ်တစ်လုံးလျှင် (၅၄ )သိန်းခွဲဖြင့် ဆောက်လုပ်လှူဒါန်းပြီး ရွာသားများထံအပ်နှံပေးခဲ့ကြောင်း အဆိုပါအဖွဲ့ချုပ်၏ ဥက္ကဋ္ဌ ဦးရန်ဝင်း က Travelling သို့ ပြောသည်။

“အိမ်တစ်လုံးကို ကျပ် (၅၄) သိန်းခွဲ ဝန်းကျင်နဲ့ အိမ် (၂၂) လုံး ဆောက်ပေးခဲ့တာပါ။ Community Center ကတော့ သိန်း(၃၅၀) ကျပါတယ်။ နောက်ထပ်အခုလိုမျိုး ထပ်လှူနိုင်ဖို့လည်းကြိုးစားသွားမှာပါ ” ဟု အဆိုပါအဖွဲ့ချုပ်၏ဥက္ကဋ္ဌ ဦးရန်ဝင်း က Travelling သို့ ပြောသည်။

နေပြည်တော်ရှိ ရေဘေးသင့်ခဲ့သော ကျေးရွာရှိဒေသခံများလက်ဝယ်သို့ ယနေ့ (မေလ ၃ ရက်)တွင် အိမ်များ အပ်နှံပေးခဲ့ကြောင်း မြန်မာနိုင်ငံခရီးသွားလုပ်ငန်းအဖွဲ့ချုပ် လက်အောက်ရှိ ဘေးအန္တရာယ်တုံ့ပြန်ရေး လုပ်ငန်းအဖွဲ့မှ တာဝန်ရှိသူတစ်ဦးက Travelling သို့ပြောသည်။

ရေဘေးကြောင့် ရွာလုံးကျွတ်နီးပါး ပျက်စီးခဲ့သည့်ညောင်ပင်သာကျေးရွာသို့ သွားရောက်ကွင်းဆင်းခဲ့ပြီး မိုးတွင်းမရောက်ခင် တည်ဆောက်ပေးခဲ့ကာ ယခုအခါ အိမ်များ အားလုံးပြီးစီးသွားသဖြင့် လက်ဝယ်ပေးအပ်နိုင်ခဲ့ကြောင်း သိရသည်။

ရေဘေးဒဏ်သင့်ခဲ့သည့် ညောင်ပင်သာကျေးရွာတွင် Community Centre တစ်ခုနှင့် အိမ်အလုံး(၂၂ ) ဆောက်လုပ်နိုင်ရန်အတွက် မြန်မာနိုင်ငံခရီးသွားလုပ်ငန်းအဖွဲ့ချုပ်လက်အောက်ရှိအသင်းများနှင့်
အသင်းအဖွဲ့များ၊ အလှူရှင်များ၊ ကုမ္ပဏီများမှ ထည့်ဝင်ငွေကြေးများဖြင့် ဆောက်လုပ်လှူဒါန်းပေးနိုင်ခဲ့ကြောင်းသိရသည်။

#TravellingJournal
#News
#Photo MTF

မန္တလေးနှင့် စစ်ကိုင်းရှိ ငလျင်ဒဏ်သင့်ပြည်သူများကို DPTOA အသင်းမှ ကျပ်သိန်း(၄၀၀) ကျော် လှူဒါန်း

Posted on by Admin

#TravellingJournal

မန္တလေးနှင့် စစ်ကိုင်းရှိ ငလျင်ဒဏ်သင့်ပြည်သူများကို ပြည်တွင်းဘုရားဖူးနှင့်ခရီးသွားဝန်ဆောင်မှုအသင်း (DPTOA)၏ သုံးပါးရတနာလူမှုကူညီရေးကော်မတီမှ ကျပ်သိန်း(၄၀၀) ကျော် သွားရောက်လှူဒါန်း
ပေးခဲ့ကြောင်း သိရသည် ။

ပြီးခဲ့သည့် ဧပြီလ (၂၆) ရက်က စစ်ကိုင်းမြို့ရှိ ကျောက်တာကျေးရွာနှင့် မန္တလေးမြို့ရှိ ရွှေတန်းရပ်နှင့်ကုသိုလ်တော်ဘုရားကယ်ဆယ်ရေးစခန်းတို့ရှိ အိမ်ထောင်စုပေါင်း(၃၉၇)စုကို ငွေသားနှင့်စားသောက်ကုန်ပစ္စည်းစုစုပေါင်းတန်ဖိုး(၄၀၀)သိန်းခန့် ကို လှူဒါန်းခဲ့ကြောင်း သိရသည်။

“ကျွန်တော်တို့အသင်းကြီးကနေ အခုလိုမျိုး သဘာဝဘေးအန္တရာယ်ဖြစ်ခဲ့တဲ့နေရာဒေသတွေကို သွားလှူဒါန်းခဲ့တာက ငါးကြိမ်မြောက်တော့ရှိပါပြီ။ ရေဘေး ၊ ငလျင်ဘေး ဖြစ်ခဲ့တဲ့ ဧရာဝတီတိုင်း၊ပဲခူး၊နေပြည်တော်၊အင်းလေး၊အခု မန္တလေးနဲ့ စစ်ကိုင်းတို့ကို လှူဒါန်းပေးနိုင်ခဲ့ပါတယ်။ဒါပေမဲ့ အသင်းအောက်မှာရှိတဲ့ ခရီးသွား ဝန်ဆောင်မှုလုပ်တဲ့လုပ်ငန်းတွေကတော့ သူတို့ဘာသာသူတို့အစီအစဥ်နဲ့လှူဒါန်းကြတာတွေလည်းအများကြီးရှိပါတယ် “လို့ ပြည်တွင်းဘုရားဖူးနှင့် ခရီးသွားဝန်ဆောင် မှုအသင်းမှ တာဝန်ရှိသူက Travelling သို့ ပြောသည်။

ပြည်တွင်းဘုရားဖူးနှင့် ခရီးသွားဝန်ဆောင်မှုအသင်း (DPTOA) အသင်းကြီးလက်အောက်ရှိ သုံးပါးရတနာ လူမှုကူညီရေးကော်မတီ ကို ဖွဲ့စည်းထားပြီး ယင်းကော်မတီမှ သဘာဝဘေးအန္တရာယ်ဖြစ်ပွား
သည့်ဒေသများကို သွားရောက်လှူဒါန်းထောက်ပံ့နိုင်ရန် ရည်ရွယ်ချက်ဖြင့် ဖွဲ့စည်းခဲ့ကြောင်း သိရသည်။

လက်ရှိတွင် DPTOA အသင်း၌ အသင်း၀င် (၆၀၀) ဝန်းကျင်ရှိပြီး အသင်းမ၀င်ရသေးသည့်လုပ်ငန်းများလည်းရှိကြောင်း သိရသည်။

#TravellingJournal
#News
#Donation
#Photo DPTOA

ဟိုတယ်ဆိုင်ရာလုပ်ငန်းရှင်များအသင်းမှ ဝန်ကြီးဌာန အား ကျပ်သိန်း (၁၅၀)၊ ငလျင်ဒဏ်သင့်ဒေသများ အတွက် သိန်း(၇၁၀) နှင့် ပစ္စည်းအပါအဝင် ကာလတန်ဖိုး ကျပ်သိန်း(၁၀၀၀) ဝန်းကျင် လှူဒါန်းခဲ့

Posted on by Admin

#TravellingJournal

မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း (MHA) မှ ဟိုတယ်နှင့်ခရီးသွားလာရေးဝန်ကြီးဌာနအား ငွေကျပ် သိန်း (၁၅၀)နှင့် ငလျင်ဒဏ်သင့်ဒေသများအတွက် ငွေသားနှင့်ပစ္စည်းများအပါအဝင် ကျပ်သိန်း(၁၀၀၀) ဝန်းကျင်တို့ကို လှူဒါန်းခဲ့ကြောင်း အဆိုပါအသင်း၏ တာဝန်ရှိသူက Travelling သို့ ပြောသည်။

” ကျွန်တော်တို့အသင်းကနေ ငလျင်ဒဏ်ထိခိုက်တဲ့ဒေသတွေကို သွားကြည့်​ခဲ့ပါတယ်။ ဧပြီ(၉) ရက်ကနေ သွားခဲ့တယ်။ နေပြည်တော်၊ မန္တလေး၊ စစ်ကိုင်းစတဲ့နေရာတွေသွားခဲ့ပါတယ်။ ရှမ်း/တောင် အင်းလေးကိုတော့ ဧပြီ(၂၈) သွားတယ်။ မေလ (၁) ရက် ပြန်ရောက်တယ်။ ကျွန်တော်တို့သွားရောက်လှူဒါန်းတဲ့ထဲမှာ ငွေသားလည်းပါတယ်။စားအုံးဆီလည်း လှူဒါန်းခဲ့ပါတယ် “လို့ မြန်မာနိုင်ငံ ဟိုတယ်ဆိုင်ရာလုပ်ငန်းရှင်များအသင်း(MHA ) ၏ အထွေထွေအတွင်းရေးမှူး ဦးနေအောင်ကို က Travelling သို့ ပြောသည်။

ငလျင်ဘေးဒဏ်သင့်ဒေသများသို့ လိုအပ်သည်များ ကူညီထောက်ပံ့ဆောင်ရွက်နိုင်ရန်အတွက် အသင်းမှ
ကျပ်သိန်း(၃၀၀) မတည်၍ ဇုန်နယ်မြေများနှင့် အလုပ်အမှုဆောင်များမှ ပူးပေါင်းပါဝင်ပြီး
မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း (နေပြည်တော်ဇုန်)သို့ ကျပ်သိန်း(၅၀)၊ ဟိုတယ်နှင့်ခရီးသွားလာရေးဝန်ကြီးဌာနမှ ငလျင်ဘေးဒဏ်သင့် ဝန်ထမ်းမိသားစုများအတွက် ကျပ်သိန်း (၁၅၀)၊ နေပြည်တော် ကုတင်(၁၀၀၀)ဆေးရုံ ပျဉ်းမနားပေါင်းလောင်း (ယာယီ)ဆေးရုံသို့ ရန်ကုန်ဇုန်အသင်းဝင်ဟိုတယ်များမှ လှူဒါန်းထားသော ခေါင်းအုံးစွပ်၊ Bedsheet ၊ Bath Tower နှင့် အိပ်ရာခင်းများကို လှူဒါန်းခဲ့ကြောင်း သိရသည်။

ထို့ပြင် မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(မန္တလေးဇုန်)သို့ ကျပ်သိန်း(၁၀၀)နှင့် စားအုံးဆီဘူး(၅၀၀)၊ မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(စစ်ကိုင်းဇုန်)သို့ ကျပ်သိန်း(၁၀၀) နှင့် စားအုန်းဆီဘူး(၅၀၀) နှင့် အင်းလေး ဒေသအတွက် ကျပ်သိန်း (၁၅၀) နှင့်စားအုံးဆီ ဘူးများ လှူဒါန်းခဲ့ကြောင်းသိရသည်။

လက်ရှိတွင် မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း၏ လက်အောက်တွင် ဟိုတယ်ဇုန် (၂၁ ) ဇုန် ရှိပြီး ပြည်နယ်နှင့်တိုင်းအားလုံး၌ ဟိုတယ်လုပ်ငန်းရှင် အသင်းဝင်ပေါင်း (၁၈၀၀)ကျော်ရှိကြောင်း သိရသည်။

#TravellingJournal
#News
#Photo MHA

ငလျင်ကြောင့် နေပြည်တော်ရှိ Jade City ဟိုတယ်၊အေးချမ်းသာဟိုတယ်နှင့် ပုလဲသီရိဟိုတယ်တို့ ဖြိုချရမည်ဖြစ်ပြီး ကျန်ဟိုတယ်များ အပျက်စီးများရှိခဲ့

Posted on by Admin

#Travelling Journal

ငလျင်ကြောင့် နေပြည်တော်ရှိ Jade city ဟိုတယ်၊အေးချမ်းသာဟိုတယ်နှင့် ပုလဲသီရိဟိုတယ်တို့ ဖြိုချရမည်ဖြစ်ပြီး ကျန်ဟိုတယ်များလည်း အပျက်စီးများရှိခဲ့ကြောင်း ဟိုတယ်နှင့်ခရီးသွားလာရေး ညွှန်ကြားမှုဦးစီးဌာန(နေပြည်တော်) မှ တာဝန်ရှိသူက Travelling သို့ ပြောသည်။

” နေပြည်တော်အခြေစိုက် ဟိုတယ်နဲ့တည်းခိုရိပ်သာပေါင်း (၁၀၂) လုံးထဲမှာ ဟိုတယ်သုံးလုံး ပြိုကျ​ပျက်စီးခဲ့တယ်။ ကျန်တဲ့ ဟိုတယ်နဲ့တည်းခိုရိပ်သာတွေကတော့ အပျက်အစီးတွေတော့ရှိတယ်။ကြီးကြီးမားမားဖြစ်တာကတော့ Jade City ဟိုတယ်
၊ အေးချမ်းသာဟိုတယ် နဲ့ ပုလဲသီရိဟိုတယ်တို့က ပြိုကျပျက်စီးသွားခဲ့ပါတယ်။အခုတော့ အဲဒီဟိုတယ်တွေကို ချက်ချင်း ဖြိုချ ဖျက်ခိုင်းနေပါပြီ “ဟု နေပြည်တော် ဟိုတယ်နှင့်ခရီးသွားလာရေး ညွန်ကြားမှုဦးစီးဌာနမှ တာဝန်ရှိသူကTravelling သို့ ပြောသည်။

ငလျင်ဒဏ်ကြောင့် Jade City ဟိုတယ်၏ ရှစ်ထပ်အထပ်မြင့်အ​ဆောက်အအုံ နှစ်လုံး၊လေးထပ်အထပ်မြင့်အဆောက်အအုံတစ်လုံးနှင့် သုံးထပ်အထပ်မြင့်အဆောက်အအုံတစ်လုံး တို့မှာ ပြိုကျပျက်စီးခဲ့ပြီး လက်ရှိတွင် ဟိုတယ်အား
ဖြိုချရန်အတွက်မူ အခက်အခဲများဖြစ်ပေါ်နေကြောင်း ယင်းဟိုတယ်ပိုင်ရှင်က Travelling သို့ ပြောသည်။

“ဖြိုချခိုင်းတာကတော့ မှန်ပေမဲ့ ဒီဟိုတယ်ထဲက ပစ္စည်းတွေ ထုတ်ဖို့နဲ့သိမ်းဖို့နေရာအတွက်ကို တော်တော်လေးခက်ခဲနေတာပါ။ အခုတောင် ညညဆို သူခိုးရန်ကလည်းရှိသေးတယ်။အဲကွန်းတွေလာဖြုတ်ခိုးကျလို့။ ငလျင်ကလည်း ခဏခဏထပ်ထပ်လှုပ်လို့ နိုင်ငံခြားသားကယ်ဆယ်ရေးတွေလာတုန်းကလည်း ထိခိုက်တာတောင်ရှိခဲ့သေးတယ်။ အဆောက်အအုံတွေကပျက်စီးသွားပေမဲ့ အထဲကပစ္စည်းတွေကကောင်းနေတာမို့ ရွေ့ဖို့အတွက်ကိုတောင် ဘယ်လိုလုပ်ရမလဲဆိုတာ
မသိတော့ပါဘူး ” ဟု Jade City ဟိုတယ်ပိုင်ရှင်က Travelling သို့ ပြောသည်။

အဆိုပါ Jade City ဟိုတယ်ကို ဒေါ်လာ (၁၅ )သန်းအကုန်အကျခံအောင် ဆောက်လုပ်ခဲ့ပြီး ယခုငလျင်ဒဏ်ကြောင့် သိန်းကြီး ခြောက်သိန်း(ကျပ်)ခန့် ဆုံးရှုံးမှု ဖြစ်ပေါ်ခဲ့ကြောင်း သိရသည်။

” ငလျင်ဒဏ်ထိခဲ့တဲ့ နေပြည်တော်က ဟိုတယ်/ မိုတယ်တွေတချို့ကို လိုင်စင်ရ Engineer Team တွေနဲ့ လိုက်လံစစ်ဆေးပေးခဲ့ပါတယ်။ကျွန်တော်တို့အသင်းကတော့ ဟိုတယ်/ခရီးကစစ်ဆေးခိုင်းတဲ့ဟိုတယ် မိုတယ်တွေကို စစ်ဆေးပေးရတာပါ။ စစ်ပြီးတဲ့ အလုံး( ၁၅ )လုံးတော့ရှိတယ်။ ထပ်စစ်ပေးရမဲ့ ဟိုတယ်အလုံးတွေလည်းကျန်ရှိပါသေးတယ် “ဟု နေပြည်တော်ဟိုတယ်ဆိုင်ရာလုပ်ငန်းရှင်များအသင်းမှ တာဝန်ရှိသူ တစ်ဦးက Travelling သို့ပြောသည်။

ထို့ပြင် အေးချမ်းသာဟိုတယ်ကလည်း သန့်ရှင်းရေးအပိုင်းလောက်သာပြီးစီးသေးကြောင်းသိရသည်။

နေပြည်တော်ဟိုတယ်အများစုမှာ အားကစားပွဲတော်နှင့်ကျောက်မျက်ပြပွဲရာသီကာလများတွင်သာ
ဧည့်သည်ပြည့်ကြပြီး ကျန်ရာသီများ၌ ဧည့်သည် ဝင်ရောက်မှုနည်းပါးကြောင်း သိရသည်။

ပြီးခဲ့သည့် မတ်လ ၂၈ ရက် က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင် လှုပ်ခတ်ခဲ့သောကြောင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်နှင့်နေပြည်တော်တို့တွင် ထိခိုက်မှုများဖြစ်ပေါ်ခဲ့ခြင်းဖြစ်သည်။

#Travelling journal
#News
#Photo Zayyar Lin

မွန်၊ ကရင် နှင့် ပဲခူး​မြို့ခရီးသွားပတ်လမ်းကြောင်းကို ပထမဆုံးဖော်ဆောင်ပြီး ခရီးစဥ်ရောင်းချမည်

Posted on by Admin

#TravellingJournal

မွန်ပြည်နယ်၊ ကရင်ပြည်နယ်နှင့် ပဲခူးတိုင်း တို့ကို သွားရောက်လည်ပတ်မည့် ခရီးသွားပတ်လမ်းကြောင်း ကို ပထမဆုံးဖော်ဆောင်နေပြီး ခရီးစဥ်ရောင်းချသွားမည်ဖြစ်ကြောင်း ကရင်ပြည်နယ်အခြေစိုက် Hearticraft Myanmar Travel and Tours မှ တာဝန်ရှိသူတစ်ဦးက Travelling သို့ ပြောသည်။

လက်ရှိတွင် ယင်းခရီးသွားပတ်လမ်းကြောင်းကို
ဖော်ဆောင်ရန် ခရီးစဥ်နေရာများကို ယင်းကုမ္ပဏီ အနေဖြင့် သွားရောက်လေ့လာခဲ့ပြီးဖြစ်ကြောင်း သိရသည်။

မွန်ပြည်နယ်ရှိ ကိုလိုနီအဆောက်အအုံများနှင့် ဦးနာအောက်ကျောင်း၊ ကျောက်သင်ပုန်းရွာ၊ ကျိုက်ထီးရိုး စသည့်နေရာများ၊ ကရင်ပြည်နယ်ရှိ သဘာဝအလှတရား များရှိရာ ဂူခရီးစဥ်များ နှင့်တောင်တက်ခရီးစဥ်များ၊ Trekking လမ်းကြောင်းခရီးစဥ်များနှင့် ပဲခူးမြို့ပေါ်ရှိ ကမ္ဘောဇသာဒီနန်းတော်၊ ရွှေသာလျောင်းနှင့် ဝင်္ဂဘော် ဆင်စခန်း တို့ကို သွားရောက်လည်ပတ်ရန် စီစဥ်ထားကြောင်း သိရသည်။

အဆိုပါ ခရီးစဥ်ကို ငါးညအိပ် ခြောက်ရက်ခရီးစဥ်သတ်မှတ်ထားပြီး ဟိုတယ်တည်း/ငြိမ်း/စား အပြီးအစီးကို တစ်ဦးလျှင် ကျပ်(၁၀)သိန်းမှ ကျပ် (၁၅)သိန်း ဝန်းကျင် သတ်မှတ်ထားပြီး နိုင်ငံခြားသားတစ်ဦးကို ကန်ဒေါ်လာ( ၆၀၀) ဝန်းကျင် သတ်မှတ်ထားကြောင်း သိရသည်။

“ဒီခရီးစဥ်လမ်းကြောင်းကို လေ့လာခဲ့ပြီးပါပြီ။ ခရီးသွားပတ်လမ်းအနေနဲ့ဖော်​ဆောင်သွားမှာပါ။လက်ရှိ ဒီနေရာတွေကို သွားလာလို့ရနေပါတယ်။ ဒီခရီးစဥ်တွေရောင်းလို့ရတယ်ဆိုတာကို ပြည်တွင်းအခြေစိုက်ခရီးသွား ကုမ္ပဏီတွေကို ဖိတ် ခေါ်သွားဖို့လည်း နောင်ကျရင် စီစဥ်ထားပါတယ် “ဟု ကရင်ပြည်နယ် အခြေစိုက် Hearticraft Myanmar Travel and tours မှ တာဝန်ရှိသူတစ်ဦး က Travelling သို့ ပြောသည်။

ကျိုင်းတုံမြို့တွင် လွယ်တိုင်းရင်းသားတို့၏ဟိုယန်းကျေးရွာကို တတိယမြောက် CBT ကျေးရွာအဖြစ် ဖော်ဆောင်

Posted on by Admin

#TravellingJournal

ရှမ်းပြည်နယ်အရှေ့ပိုင်း၊ ကျိုင်းတုံမြို့တွင်
လွယ်တိုင်းရင်းသားများ နေထိုင်ကြသည့် ဟိုယန်းကျေးရွာအား တတိယမြောက် ရပ်ရွာအခြေပြုခရီးသွားလုပ်ငန်း(CBT) ကျေးရွာအဖြစ် ဖော်ဆောင်နေကြောင်း ဟိုတယ်နှင့်ခရီးသွားညွှန်ကြားမှုဦးစီးဌာန(ကျိုင်းတုံ)မှ တာဝန်ရှိသူ တစ်ဦးက Travelling သို့ ပြောသည်။

ကျိုင်းတုံမြို့ပေါ်မှ မိုင် (၄၀) ခန့်ကွာဝေးပြီး တိုင်းလွယ် တိုင်းရင်းသားများနေထိုင်ကြသည့် ဟိုယန်းကျေးရွာကို (CBT) ကျေးရွာအဖြစ် ဖော်​ဆောင်နေကြောင်း သိရသည်။

” မတ်လ လောက်တော့ ပြီးတော့မှာပါ။ ညအိပ်တည်းခိုနေထိုင်နိုင်ဖို့ ရိုးရာအိမ်ငါးလုံးကို ဆောက်နေပါတယ်။ ဟိုယန်း CBT နဲ့ဆို ကျွန်တော်တို့ ကျိုင်းတုံမြို့မှာ သုံးခုမြောက် ရပ်ရွာအ​ခြေပြုကျေးရွာဖြစ်လာပါပြီ ” ဟု ဟိုတယ်နှင့်ခရီးသွားညွှန်ကြားမှုဦးစီးဌာန (ကျိုင်းတုံ)မှ တာဝန်ရှိသူတစ်ဦးက Travelling သို့ ပြောသည်။

ကျိုင်းတုံမြို့၏ ပထမဆုံး CBT ကျေးရွာကို အိမ်ခြေ ၂၀၀ ဝန်းကျင်ရှိသည့် အာခါတိုင်းရင်းသား များနေထိုင်ကြသည့် ဟိုကျင်းအာခါရွာ ၁၊ ၂ ၊ ၃ ၊ ၄ ရွာကို ပေါင်းထားပြီး ရပ်ရွာအခြေပြုခရီးသွားလုပ်ငန်း CBT ကျေးရွာကို ဖော်ဆောင်ထားကာ ဒုတိယမြောက် CBT ကျေးရွာအား ဝ တိုင်းရင်းသား များနေထိုင်သည့် ပင်းဆိုင်းကျေးရွာကို ဖော်ဆောင်ခဲ့ခြင်းဖြစ်ကြောင်း သိရသည်။

ကျိုင်းတုံမြို့ပေါ်၌ ရှေးဟောင်းယဉ်ကျေးမှုလက်ရာများကို တစုတဝေးမြင်တွေ့ရပြီး ရှေးဟောင်းအဆောက်အအုံများစွာ တည်ရှိသည့်အပြင် ရှမ်း၊အာခါ၊လားဟူ၊လွယ် စသည့်တိုင်းရင်းသားများနေထိုင်ကြသည့် ခရီးသွားမြို့တော်တစ်ခုဖြစ်ကြောင်း သိရသည်။

Photo Daw Win Ei Phyo
ပုံ-စာ လွယ်တိုင်းရင်းသားတို့၏ ဟိုယန်း CBT ကျေးရွာ အိမ်ဆောက်လုပ်နေသည့်မြင်ကွင်းကိုတွေ့ရစဥ်။

လွိုင်မွေချယ်ရီပန်းပွဲတော်သို့ ရှမ်း/ရှေ့ ဒေသခံ(၇၀၀၀၀) ကျော် လာရောက်လည်ပတ်ခဲ့

Posted on by Admin

#TravellingJournal

နှစ်စဥ် ဇန်နဝါရီလတွင် ကျင်းပလေ့ရှိသည့်ရှမ်းပြည်နယ်(အရှေ့ပိုင်း)၊ ကျိုင်းတုံမြို့နယ်
လွိုင်မွေဒေသရှိ ချယ်ရီပန်းပွဲတော်သို့ ရှမ်းပြည်နယ် အရှေ့ပိုင်းရှိ ဒေသခံ ခုနှစ်သောင်း(၇၀၀၀၀)ကျော် လာရောက်လည်ပတ်ခဲ့ကြောင်း ဟိုတယ်နှင့်ခရီးသွားလာရေးညွှန်ကြားမှုဦးစီးဌာန(ကျိုင်းတုံ)မှ တာဝန်ရှိသူကTravelling သို့ ပြောသည်။

“ရှမ်းအရှေ့ပိုင်းက ဒေသခံတွေ အများဆုံးလာကြတယ်။ မိုင်းခတ်၊ မိုင်းယန်း ၊မိုင်းလား၊ တာချီလိတ် အဲဒီဘက်တွေက ရိုးရာဝတ်စုံတွေနဲ့ အုပ်စုလိုက်လာရောက် လည်ပတ်ခဲ့ကြပါတယ်။ ပြီးခဲ့တဲ့နှစ်ကဆို လူဦးရေ ကိုးသောင်းကျော် လောက်လာလည်တယ်။ဒီနှစ်ကတော့ လူဦးရေ (၇၅၀၀၀ )လောက်ပဲ လာကြတယ် “ဟု ဟိုတယ်နှင့်ခရီးသွားလာရေး ညွှန်ကြားမှုဦးစီးဌာန(ကျိုင်းတုံ)မှ တာဝန်ရှိသူကTravelling သို့ ပြောသည်။

အဆိုပါ ချယ်ရီပန်းပွဲတော်ကို ဇန်နဝါရီ (၁)ရက်မှ (၅)ရက်နေ့အထိ ကျင်းပခဲ့ပြီး ယခုကျင်းပသည့်
ပန်းပွဲတော်မှာ လေးကြိမ်မြောက် ကျင်းပခြင်းဖြစ်ကြောင်း သိရသည်။

” ထိုင်းလူမျိုးတွေက ပန်းပွဲတော်ကို လာလည်ချင်ကြတယ်။ အခုက ဗီဇာနဲ့ရော တံတားကလည်းဖြတ်လို့မရဘူး။ တတိယနိုင်ငံသားတွေလည်းလာလို့မရဘူး။ အဲဒါကြောင့်အခုတော့​ ဖြေလျော့ပေးဖို့တော့တင်ပြထားပါတယ် “ဟု ဟိုတယ်/ခရီး(ကျိူင်းတုံ)မှ တာဝန်ရှိသူကTravelling သို့ ပြောသည်။

ထို့ပြင် ယင်းပွဲတော်တွင် အသေးစား၊ အငယ်စား၊ အလတ်စား MSME ထုတ်ကုန် ဆိုင်ခန်းပေါင်း (၁၀) ခန်း လည်း ပါဝင်ရောင်းချခဲ့ပြီး ထူးခြားချက်အနေဖြင့် ယခု နှစ်တွင်ချယ်ရီပန်းပင်ကိုင်းများအား ဒေသခံများမှ ချိုးယူခြင်းများကို မပြုလုပ်ခဲ့ကြောင်း သိရသည်။

ပြီးခဲ့သည့်နှစ်တွင် ကျိုင်းတုံမြို့နယ် သစ်တောဦးစီးဌာန နှင့် ဟိုတယ်/ခရီးဌာနတို့ပူးပေါင်းပြီး ချယ်ရီပင် (၂၇၀၀) ကို အသစ် စိုက်ပျိုးနိုင်ခဲ့ကြောင်း သိရသည်။

လွိုင်မွေမြို့၏ LandMark တစ်ခုဖြစ်သည့်ချယ်ရီပန်း သည် လွိုင်မွေ၏ အမွေအနှစ် တစ်ခုဖြစ်ပြီး သဘာဝအတိုင်းခေတ်အဆက်ဆက်တိုင် ချယ်ရီပင်များစွာကို တစ်စုတစ်စည်းထဲတွေ့မြင်ရသည့် တောင်ပေါ်စခန်းမြို့လည်းဖြစ်ကြောင်း သိရသည်။

Photo Daw Win Ei Phyo
ပုံ-စာ ဇန်နဝါရီ ၁ ရက်နေ့က ကျင်းပ ခဲ့သည့် လွိုင်မွေချယ်ရီပန်းပွဲတော် သို့ လာရောက် လည်ပတ် နေသူများကို တွေ့ရ
စဥ်။

ခရီးသွားကျေးရွာဆုရရှိသည့် ကော့မရမ်းရွာတွင် Resort စီမံကိန်းကို ပထမဆုံးဖော်ဆောင်

Posted on by Admin

#TravellingJournal

အရှေ့တောင်အာရှနိုင်ငံများက ပေးအပ်သည့် Sustainable Tourism Award (2022 )ဆု ရရှိခဲ့
သည့် ကရင်ပြည်နယ်၊ ဘားအံမြို့ရှိ ကော့မရမ်းရွာတွင် စိုက်ပျိုးရေးကိုအခြေခံသည့် ခရီးသွားလုပ်ငန်း Agro Tourism ဖော်ဆောင်နိုင်ရန်အတွက် Resort စီမံကိန်းကို ပထမဆုံး ဖော်ဆောင်သွားမည်ဖြစ်ကြောင်း သိရသည်။

ပြီးခဲ့သည့် ဒီဇင်ဘာ(၂၄) ရက်က ကျင်းပ ပြုလုပ်ခဲ့သည့် ကရင်ပြည်နယ်ဒေသဆိုင်ရာ ခရီးသွားလုပ်ငန်းကော်မတီ(၁၀/၂၀၂၄)ကြိမ်မြောက် အစည်းအဝေး၌ ကရင်ပြည်နယ်အစိုးရအဖွဲ့ ပြည်နယ်ဝန်ကြီးချုပ် သီရိပျံချီဦးစောမြင့်ဦးက ပြောကြားခဲ့ခြင်းဖြစ်သည်။

အဆိုပါ ဟိုတယ်စီမံကိန်းဆောင်ရွက်နိုင်ရန် လယ်ယာမြေအား အခြားနည်းအသုံးပြုခွင့်ကို လုပ်ထုံးလုပ်နည်းနှင့်အညီ လျှောက်ထားရာတွင် ခွင့်ပြုချက်ရရှိပြီးဖြစ်ကြောင်း သိရသည်။

ထို့ပြင် လာမည့် ဒီဇင်ဘာလ(၂၉) ရက်တွင် Resort စီမံကိန်းအား လုပ်ငန်းရှင်မှ ဆက်လက်အကောင်အထည်ဖော်ဆောင်ရွက်နိုင်ရန် ပနှက်ရိုက်ခြင်းကို ပြုလုပ်သွားမည်ဖြစ်ကြောင်းသိရသည်။

” ကော့မရမ်းရွာမှာ ဟိုတယ်စီမံကိန်းကို ဖြစ်စေချင်တာပါ။ အခုလို ခွင့်ပြုတာလည်းကြားသိရတော့ဝမ်းသာမိပါတယ်။ ကျွန်တော်တို့ ဘားအံမှာက ဟိုတယ်တွေက အများအား​ဖြင့် ရှုခင်းကို အသားပေးပြီး ဆောက်ကြပါတယ်။ ကော့မရမ်းရွာမှာ အခုလို ဟိုတယ်တည်ဆောက်တာက ဒေသခံအတွက်လည်း အများကြီး အကျိုးရှိသလို အခုဟိုတယ်ကလည်း အများနဲ့မတူပဲ တမူထူးခြားစေတဲ့ Luxury Hotel ပုံစံမျိုးနဲ့ ထွက်ပေါ်လာမှာကြားလို့ Tourism လောကသမားအနေနဲ့ဝမ်းသာမိပါတယ် ” ဟု ဒေသခံဧည့်လမ်းညွှန် ဦးသူရဦး က Travelling သို့ ပြောသည်။

လက်ရှိ ကရင်ပြည်နယ်သို့ ခရီးသွားဧည့်သည်
လာရောက်မှုများ ပိုမိုများပြားလာသဖြင့် ဟိုတယ်အိပ်ခန်းလိုအပ်ချက်များ ဖြည့်ဆည်း ပေးနိုင်ရေးအတွက် ဟိုတယ်လုပ်ငန်းရှင်များနှင့် ရင်းနှီးမြှပ်နှံသူအသစ်များကို ဖိတ်ခေါ်သွားမည်ဟု ပြည်နယ်ဝန်ကြီးချုပ်က ယင်းအစည်းအဝေးတွင် ပြောကြားခဲ့သည်။

ဘားအံမြို့၏ Photo Point များအဖြစ် ခရီးသွားဧည့်သည်များအကြား ပေါ်ပြူလာ ဖြစ်လာသည့်နေရာများမှာ ကော့မရမ်းရွာ ၊ ထွန့်ပတိုင်၊ လှိုင်ကားကျေးရွာရှိ လှိုင်ကား​ရေတံခွန် နှင့် ကော့နန်းသာရွာ တို့ဖြစ်ကြောင်း ဒေသခံ ဧည့်လမ်းညွှန် ဦးသူရဦးက Travelling သို့ပြောသည်။

#Photo Thura Oo
ကော့မရမ်းကျေးရွာသို့ သွားရောက်လည်ပတ်နေကြသည့်ပြည်တွင်းခရီးသွားတစ်ချို့ကို တွေ့ရစဥ်။

ရှမ်းပြည်နယ် (အရှေ့ပိုင်း) မိုင်းယန်းမြို့ကရိုးရာကျွဲခတ်ပွဲ

Posted on by Admin

#TravellingJournal

ရှမ်းပြည်နယ် (အရှေ့ပိုင်း) မိုင်းယန်းမြို့က
ရိုးရာကျွဲ ခတ်ပွဲကို နှစ်စဥ်ကျင်းပပြုလေ့ရှိကြသည်။

အဆိုပါကျွဲခတ်ပွဲကို မိုင်းလွေကျေးရွာမှ စတင်ကျင်းပလာပြီး မိုင်းယန်းနှင့် မိုင်ကွယ် ကျေးရွာတို့တွင်လည်း ကျင်းပလာသည်မှာ နှစ်ပေါင်း မရေတွက်နိုင်အောင် ရှိလာခဲ့ပြီ ဖြစ်သည်။

နှစ်စဉ် ကျွဲခတ်ပွဲများ မကျင်းပဖြစ်ခဲ့ပါက
ဒေသအပေါ် ရောဂါကပ်ဆိုးများ ကျရောက်တတ်သည်ဟု ဒေသခံများက အယူရှိသောကြောင့် ပွဲတော်ကို ကျင်းပလေ့ရှိသည်။

နှစ်စဉ်ကျင်းပပြုလုပ်ပါက ကျွဲများအနာရောဂါ ကင်းဝေးကာ စိုက်ပျိုးထား‌သည့် သီးနှံများ ဖြစ်ထွန်းကြောင်း၊ အန္တရာယ်ဘေးရောဂါကပ်ဆိုးများဘေးမှ ကင်းဝေးကြောင်း ဒေသခံများက ယုံကြည်လျက် နှစ်စဉ်နှစ်တိုင်း ကျွဲခတ်ပွဲကို ကျင်းပပြုလုပ်လျက်ရှိသည်။

ကိုဗစ်နောက်ပိုင်း ၂၀၂၃၊ ဇန်နဝါရီလတွင် ပထမအကြိမ် ပြန်လည်ကျင်းပခဲ့ပြီး ၂၀၂၄ ခုနှစ်၊ ဒီဇင်ဘာ (၂၁) ရက်က ဒုတိယအကြိမ် မြောက် ကျင်းပခဲ့ခြင်းဖြစ်သည်။

ကျိုင်းတုံမြို့မှ ကားဖြင့် သုံးနာရီ
လောက်သွားရပြီး မိုင်းယန်းမြို့တွင် ရှမ်း၊ အာခါ၊ လားဟူ၊ ဝ အစရှိသည့် တိုင်းရင်းသားလူမျိုးများနေထိုင်ကြသည်။

ကျွဲခတ်ပွဲ၏ အစသည် မိုင်းလွေမြို့ ဖြစ်ပြီး
နှစ်စဥ် ဒီဇင်ဘာလတွင် နေရာတစ်ခုလျှင် ငါးရက်ခန့် ကျွဲခတ်ပွဲကျင်းပပြီး အချို့နှစ်များ၌ ဇန်နဝါရီလထိတိုင်အောင် ကျင်းပလေ့ရှိကြောင်းသိရသည်။

မိုင်းလွေသည် စီးပွားရေးကောင်းသည့် ရွာကြီးတစ်ရွာဖြစ်ပြီး ဒေသခံရှမ်းတို့၏ ပါးစပ်ရာဇဝင်အရ ယင်းအရပ်၌ အင်အားကြီးမားသည့် ကျွဲမောင်နှံရှိခဲ့ပြီး အဆိုပါကျွဲ မောင်နှံမှ မွေးဖွား လာသည့် ကျွဲထီးများကို သတ်ပစ်သဖြင့်မိခင်ကျွဲမကြီးက ဂူတစ်ခုတွင် လျှို့ဝှက်စွာ ကျွဲထီးလေးတစ်ကောင်ကို မွေး၍ ကျွေးမွေးကာ ကြီးပြင်းစေခဲ့သည်။ ဖခင်၏ခြေရာကို ကျွဲငယ်အားပြ၍ တထပ်တည်းကျချိန် ရောက်မှ တိုက်ခိုက်စေခဲ့၏။ သားဖြစ်သူ ကျွဲထီးလေး အနိုင်ရရှိချိန်တွင်မူ ဖခင်ကျွဲထီးကြီး ကွယ်လွန်သောကြောင့် မိခင်ကျွဲမကြီးမှာ ရင်ကွဲနာကျ၍ သေခဲ့ပြီး ထိုရာဇဝင်တွင်ပါသော ကျွဲမင်းဂူသည်လည်း မိုင်းလွေဒေသတွင် ရှိခဲ့သလို ပါးစပ်ရာဇဝင်တွင်ပါသော ရှမ်းအမည်နှင့်
ရွာများ ယခုတိုင်ရှိသည်ဟု ကျိုင်းတုံ ဒေသခံ ဟိုတယ်လုပ်ငန်း ရှင်တစ်ဦးဖြစ်သူ ဦးရဲ မြင့်အောင်က Travelling သို့ပြောသည်။

တစ်ကြိမ်တစ်ခါက မိုင်းယန်းကျွဲခတ်ပွဲနေရာသည် ခေတ်အခြေအနေအရ ကျဉ်းမြောင်းသည်ဟု ဆိုကာ အခြားနေရာသို့ ပြောင်းလဲ ကျင်းပခဲ့ရာမီးအကြီးအကျယ်လောင်၍ မြို့တဝက်ခန့် ပျက် ခဲ့ကြောင်း သိရသည်။

ထို့ကြောင့် ရှေးထုံးအယူများကို မပယ်ရှားဝံ့ကြပဲ ခေတ်အဆက်ဆက် ကျွဲခတ်ပွဲများကို နေရာ သုံးနေရာ၌ ဆက်လက်ကျင်းပလာခဲ့သော်လည်းကိုဗစ်ကာလများတွင်မူ မကျင်းပနိုင်ခဲ့‌ကြောင်း သိရသည်။

ကျွဲခတ်ပွဲကျင်းပသည့်နေရာတွင် တိုင်းရင်းသားရိုးရာ အင်္ကျီအဝတ်အစားဆိုင်များ ၊ အစားအသောက်ရောင်းသည့် ဆိုင်လေးများဖြင့် စည်ကားနေပြီး ပွဲကြည့်ပရိသတ်များဖြင့်စည်ကားလျက် ရှိသည်။

ယနေ့ထက်တိုင် မိုင်းယန်းမြို့နယ် မိုင်းလွေ ဝမ်တောင်းရွာအနီး၌ ကျွဲမင်းဂူရှိပြီး ခရီးသွားများက အမှတ်တရဓာတ်ပုံ သွားရောက်ရိုက်ကူးလေ့ရှိကြသည်။

ထို့ပြင် မိုင်းယန်းမြို့၏ အထင်ကရနာမည်ကျော် ပိတောက်နက်ပင်ကြီးလည်း
ဘုန်းကြီးကျောင်းဝင်းအတွင်း တည်ရှိနေကာ ခရီးသွားများကို ဆွဲဆောင်သည့်နေရာတစ်ခု ဖြစ်လာသည်။

အဆိုပါ ရိုးရာကျွဲခတ်ပွဲ ကို ရွှေတြွိဂံဟိုတယ်ဇုန် (ကျိုင်းတုံ)မှ ဦးရဲမြင့်အောင်(နာယက) ၊ ဦးစိုင်းလိုင်းတစ် (ဒုဥက္ကဋ္ဌ) ၊ ဦးစိုင်းဝန်းရှဲန် (အတွင်းရေးမှူး) ၊ ဦးမျိုးမြင့်လွင် (တွဲဖက်အတွင်းရေးမှူး) အဖွဲ့တို့မှ သွားရောက် လေ့လာခဲ့ကြသည်။

Photo Essays
Photo Ye Myint Aung
ပုံစာ ဒီဇင်ဘာ ၂၁ ရက်က မိုင်းယန်မြို့ က ရိုးရာ ကျွဲခတ်ပွဲ ကျင်းပ နေသည်ကို တွေ့ရစဥ်။