ကချင်ပြည်နယ်၊ ပူတာအိုခရိုင်၊ ခေါင်လန်ဖူးမြို့နယ်ထဲမှ ရေခဲပြင်ရွာကလေးဖြစ်သည့် ရှိန်းခေါင်ကျေးရွာခရီးစဥ်ကို သွားရောက်လည်ပတ်နိုင်ပြီဖြစ်ကြောင်း ပူတာအိုအခြေစိုက်ခရီးသွား ကုမ္ပဏီတစ်ခုဖြစ်သည့် Putao Beauty Travels &Tours မှ တာဝန်ရှိသူက Travelling သို့ ပြောသည်။

အဆိုပါ ရှိန်းခေါင်ရွာသည် မြန်မာနိုင်ငံနှင့် တရုတ်နိုင်ငံနယ်စပ်အနီးရှိ ရေခဲတောင်ရွာဟု နာမည်ကျော်ကြားပြီး အလှပဆုံးအချိန်မှာ ဆောင်းရာသီအလယ်မှ နွေဦးပေါက်အထိ ရေခဲနေသည့် ကာလဖြစ်ကြောင်းသိရသည်။

” ရှိန်းခေါင်ရွာခရီးစဉ်ရော သွားမဲ့သူတွေရှိရင်ပို့ပေးမှာပါ။ အဲဘက်ကတော့ လက်ရှိအချိန် Safe ဖြစ်ပါတယ်။ လုံခြုံရေးအခြေအနေ အဆင်မပြေရင်တော့ ကြိုတင်အသိပေးပါတယ် ” ဟု ဒေသခံတစ်ဦးဖြစ်သူ K.Sar Ram က Travelling သို့ ပြောသည်။

ရှိန်းခေါင်ရွာသည် တောင်ပတ်လည်ဝန်းရံထားသည့်ကျေးရွာဖြစ်ကာ လမ်းပန်းဆက်သွယ်ရေးမှာလည်း ခက်ခဲနေပြီး လက်ရှိအနေအထားအထိ ခရီးသွားလာမှုမှာ အနည်းအကျဥ်းလောက်သာရှိ သေးကြောင်း သိရသည်။

ပူတာအိုတွင် ကားခ၊ စားသောက်စရိတ်၊ အထမ်းခအပါအဝင် အထွေထွေကုန်ကျစရိတ်များ စျေးတက်ခြင်းကြောင့် လက်ရှိအခြေအနေအရ ဧည့်သည်တစ်ဦးကို ကျပ်သိန်း (၂၀) ကျော် လောက် ကုန်ကျနိုင်မည်ဖြစ်ကြောင်း သိရသည်။

” ဖုန်ကန်ရာဇီ၊ ဖုန်ရင်ရာဇီ၊ ရှိန်းခေါင်ရွာနဲ့ ခေါင်လန်ဖူးဘက် ရေခဲတောင်ခရီးစဉ်အသစ်တွေ ရှိပါတယ် ” ဟု Putao Beauty Travels &Tours မှ တာဝန်ရှိသူက Travelling သို့ ပြောသည်။

ထို့ပြင် ပူတာအိုမှတစ်ဆင့် ရေခဲတောင်များသို့ တောင်တက်ခရီးသွားများ လာရောက်လည်ပတ်နိုင်ရန် ရေခဲတောင်ခရီးစဉ်များ ဖွင့်လှစ်နေပြီဖြစ်ကြောင်း ပူတာအို အခြေစိုက်
ခရီးသွားကုမ္မဏီများက အသိပေး
ကြော်ငြာနေကြောင်း သိရသည်။

Putao Beauty Travels &Tours အနေဖြင့် ၂၀၁၉ ခုနှစ်မှ စတင်လုပ်ကိုင်လာခဲ့ပြီး
ဒေသတွင်း ဧည့်လမ်းညွှန်သူငယ်ချင်းများ
စုပေါင်းပြီး လုပ်ကိုင်သည့်ခရီးသွားကုမ္ပဏီတစ်ခုဖြစ်ကြောင်း သိရသည်။

ရှိန်းခေါင်ရွာခရီးစဥ်တွင် ဒေသခံအိမ်၌သာ
ညအိပ်ရမည်ဖြစ်ပြီး ရေခဲတောင်တက်ဝါသနာပါပါက တောင်တက်ခရီးစဉ်ကိုလည်း စီစဉ်ပေးကြောင်းသိရသည်။

ရေခဲပြင်ရွာ

Photo-K.Sar Ram

ပုံ-စာ ၂၀၂၃ ခုနှစ်က မြင်တွေ့ရသည့် ရှိန်းခေါင်ရွာ ကို တွေ့ရစဥ် ။

#Travelling Journal

ပုဂံရှေးဟောင်းယဥ်ကျေးမှုဒေသသို့ ယခုနှစ် ၇ လတာ ကာလအတွင်း လာရောက်လည်ပတ်ခဲ့သည့် နိုင်ငံခြားသားခရီးသွားဧည့်သည် (၁၇၇၄)ဦးထံမှ ပုဂံဇုန်ဝင်ကြေး ကျပ်သိန်း (၅၀၀) ကျော် ရရှိခဲ့ကြောင်း သာသနာရေးနှင့် ယဉ်ကျေးမှုဝန်ကြီးဌာန ရှေးဟောင်းသုတေသနနှင့် အမျိုးသားပြတိုက် ဦးစီးဌာန (ပုဂံဌာနခွဲ) မှ တာဝန်ရှိသူက Travelling သို့ ပြောသည်။

ယခုနှစ် ၂၀၂၄-၂၀၂၅ ဘဏ္ဍာနှစ် (၇) လတာ ကာလအတွင်း ဇုန်ဝင်ကြေး ကောက်ခံရရှိခဲ့သည့် ဝင်ကြေးငွေ ဖြစ်ကြောင်းသိရသည်။

ဧပြီလပိုင်းမှ စတင်ဝင်ရောက်ခဲ့သည့်စာရင်းအရ ဧပြီလတွင် (၁၂၉) ဦး ၊ မေလတွင် (၄၅၂) ဦး ၊ဇွန်လတွင် (၂၃၃) ဦး ၊ဇူလိုင်လတွင် (၂၂၆) ဦး ၊ဩဂုတ်လတွင် (၂၀၈) ဦး ၊စက်တင်ဘာလတွင် (၁၃၇) ဦး ၊အောက်တိုဘာ ၂၇ ရက်ထိ (၃၈၉) ဦး စုစုပေါင်း (၁၇၇၄) ဦး ပုဂံဒေသသို့လာရောက်လည်ပတ်ခဲ့ကြောင်း သာသနာရေးနှင့် ယဉ်ကျေးမှုဝန်ကြီးဌာနရှေးဟောင်းသုတေ သနနှင့် အမျိုးသားပြတိုက် ဦးစီးဌာန (ပုဂံဌာနခွဲ) မှ တာဝန်ရှိသူ က Travelling ကို ပြောသည်။

ပုဂံဇုန်ဝင်ကြေးအနေဖြင့် နိုင်ငံခြားသားဧည့်သည်တစ်ဦးကို မြန်မာငွေကျပ် သုံးသောင်း ​ကောက်ခံထားပြီး လက်ရှိတွင် ဇုန်ဝင်ကြေးကောက်ခံသည့် အဖွဲ့(၄ ) ဖွဲ့ကိုသာ ထားရှိပေးထားနိုင်ကြောင်း သိရသည်။

“အရင်ကတော့ ပုဂ္ဂလိကကို တင်ဒါပေးပြီး
လုပ်ကိုင်ခွင့် ပေးပါတယ်။ နောက်ဆုံးလုပ်ကိုင်ခဲ့တဲ့တင်ဒါအောင်ခဲ့သူက ကိုဗစ်ကာလ အတွင်းမှာ ပြန်အပ်ခဲ့ပါတယ်။ အဲဒီကတည်းက ဆရာတို့ကပဲ ကောက်ခံ တာလုပ်ခဲ့တာပါ။ လက်ရှိ ကတော့ဧည့်သည်အဝင်နည်းတာမို့ တင်ဒါခေါ်ဖို့အစီအစဥ်မရှိသေးပါဘူး။ ခေါ်ရင်လည်း ကုမ္ပဏီတွေအနေနဲ့ လုပ်နိုင်မယ်မထင်ပါဘူး။ ဘာလို့ဆို ဧည့်သည် နည်းတာကြောင့်ပါ “ဟု ရှေးဟောင်းသုတေသနနှင့် အမျိုးသားပြတိုက် ဦးစီးဌာန (ပုဂံဌာနခွဲ) မှ တာဝန်ရှိသူ က Travelling ကို ပြောသည်။

ထို့ပြင် ပုဂံရှေးဟောင်းသုတေသနပြတိုက်သို့ တနင်္လာနေ့နှင့် အများပြည်သူ ရုံးပိတ်ရက်များ မှအပ နေ့စဉ် နံနက် ၉ နာရီခွဲမှ ညနေ ၄ နာရီခွဲအထိ ဖွင့်လှစ်ထားပြီး ပြတိုက်ဝင်ကြေးအနေဖြင့် ပြည်တွင်း ခရီးသွားတစ်ဦးလျှင် ၁၀၀၀ ကျပ်နှုန်း သတ်မှတ်ထားပြီး နိုင်ငံခြားသားတစ်ဦးလျှင် ဝင်ကြေး ၁၀၀၀၀ ကျပ်ကို ထပ်မံ ကောက်ခံကြောင်းသိရသည်။

ပြီးခဲ့သည့် ၂၀၂၃ ခုနှစ် ဧပြီလမှ ၂၀၂၄ ခုနှစ် မတ်လကုန်အထိ ပုဂံရှေးဟောင်း သုတေသနပြတိုက်သို့ ပြည်တွင်း ခရီးသွားဦးရေ ကိုးသောင်းကျော်ဝင်ရောက် လေ့လာလည်ပတ်ခဲ့ကြောင်း သိရသည်။

#TravellingJournal

ပုဂံရှေးဟောင်းယဉ်ကျေးမှုဒေသ၏ အမြင့်ဆုံး ဘုရားဖြစ်သည့် သဗ္ဗေညုဘုရား ဥာဏ်တော် ထက် သုံးပေ နိမ့်သည့် ပုဂံဒေသတစ်ခုလုံးအား အပေါ်စီးမှ မြင်တွေ့နိုင်သော နန်းမြင့်​​​မျှော်စင် အား စျေးကွက်အတွင်းရောင်းချမည်ဟု ထွက်ပေါ်လာသည့် ကောလာဟလမှာ မှားယွင်းကြောင်း လက်ရှိနန်းမြင့်မျှော်စင်ကို ပိုင်ဆိုင်ထားသည့် ရှင်သန်သူကုမ္ပဏီမှ တာဝန်ရှိသူက Travelling သို့ ပြောသည်။

အဆိုပါ နန်းမြင့်​​​မျှော်စင်ကို လွန်ခဲ့သည့် ငါးနှစ်ဝန်းကျင်ခန့်ကတည်းက နာမည်ကျော် သူဌေးကြီး တစ်ဦးဖြစ်သူဦးတေဇ၏ ထူးလုပ်ငန်းစု စီမံခန့်ခွဲအောက်၌ မရှိတော့ပဲ ရှင်သန်သူကုမ္ပဏီသို့ လက်ပြောင်းထားခဲ့ပြီးဖြစ်ကြောင်း ထူး ဟိုတယ်လုပ်ငန်းစုမှ ပြောရေးဆိုခွင့်ရှိသူက Travelling သို့ ပြောသည်။

“လူမှုကွန်ယက်မှာတွေ့ပါတယ်။ မရောင်းပါဘူး။ ကျွန်တော်တို့လက်ထဲမှာ ပိုင်ဆိုင်မှုစာရွက်စာတမ်းတွေ ရှိပါတယ်။ ကျွန်တော်တို့ မရောင်းပါဘူး “ဟု ရှင်သန်သူကုမ္ပဏီမှ တာဝန်ရှိသူက Travelling ကို ပြောသည်။

လက်ရှိတွင် နန်းမြင့်​​​ မျှော်စင်သို့ လာရောက်လည်ပတ်သည့် ပြည်တွင်းခရီးသွားတစ်ဦးလျှင် ကျပ် ၃၀၀၀ နှင့် နိုင်ငံခြားသားဧည့်သည်ဆိုပါကတစ်ဦးလျှင် ၅ ဒေါ်လာ ဝင်ကြေးကောက်ခံကြောင်း သိရသည်။

#Bagan

#Photo-နန်းမြင့်မျှော်စင်

#Travelling Journal

မြန်မာနိုင်ငံ၏ ပထမဦးဆုံးဘူမိဥယျာဉ်တစ်ခု ဖြစ်သည့် ပုပ္ပားတောင်အမျိုးသားဘူမိဥယျာဉ် နယ်မြေထဲရှိ မြန်မာ့ရွှေသမင်ခြံသို့ ခရီးသွားဧည့်သည်များ လာရောက်လေ့လာနိုင်ကြောင်း ပုပ္ပားတောင် အမျိုးသားဘူမိဥယျာဉ်၏ တာဝန်ရှိသူ ကTravelling Journal သို့ ပြောသည်။

အဆိုပါ ပုပ္ပားတောင်အမျိုးသားဘူမိဥယျာဉ် ကို ၂၀၂၄ ခုနှစ်၊မတ်လ (၂၀) ရက်တွင် စတင်ဖွင့်လှစ်ခဲ့ပြီးဘူမိနယ်မြေ (Geosite) ပေါင်း (၁၅)ခု နှင့်ဖွဲ့စည်းတည်ထောင်ထားကာအကျယ်အဝန်း ဧက (၅၀၀၀၀) ကျော်ရှိကြောင်းသိရသည်။

ယင်း ဘူမိနယ်မြေများတွင် လက်ရှိလူမှုကွန်ယက်စာမျက်နှာပေါ်၌ ရေပန်းစားနေသည့် တောင်ပေါ်တောင်ရွာလည်း ပါဝင်ကြောင်း သိရသည်။

“ အခုကတော့ အမျိုးသားဘူမိဥယျာဉ်အနေနဲ့
ဖွင့်လှစ်ထားပြီး အဲ့ဒီကနေ ကမ္ဘာ့အသိ အမှတ်ပြု UNESCO Geopark အဆင့်အထိ ရောက်ရှိအောင် ကြိုးစားသွားမယ်”ဟု ပုပ္ပားတောင် အမျိုးသားဘူမိဥယျာဉ် ၏ တာဝန်ရှိသူ ကTravelling Journal ကို ပြောသည်။

မြန်မာ့ရွှေသမင်ခြံ၏ အကျယ်အဝန်းမှာ (၁၇) ဧက ရှိပြီး မြန်မာ့မျိုးရင်းရွှေသမင် နှင့်
ဆတ်တို့ကို မွေးမြူထားသည့်အပြင် စန္ဒကူးပင်များကိုလည်း အိန္ဒိယနိုင်ငံ၊ မိုက်ဆိုးပြည်နယ်မှယူဆောင်လာပြီး စိုက်ပျိုးထိန်းသိမ်းထားကြောင်း သိရသည်။

Popa Mountain Resort နှင့် သိပ်မဝေးလှသည့်ဘူမိနယ်​ ​မြေ ၇ အဖြစ်သတ်မှတ်ထားသည့် စန္ဒကူးခင်း နှင့် (မြန်မာ့ရွှေသမင်ခြံ) ကို ခရီးသွားဧည့်သည်များ လာရောက်လေ့လာနိုင်ကြောင်းသိရသည်။

“အခုချိန်ကတော့ပုပ္ပါးဘက်ကို ဘုရားဖူးတွေ
သွားကြပါတယ်။မိုးရာသီလည်းဖြစ် အသီးနှံလေးတွေလည်းအစုံပေါတော့ ခရီးသွားအလာများပါတယ်။ တောင်ပေါ်ရွာလေးဆီတော့ အသွားများကြပါတယ်။ မိုးတွင်းပိုင်းနဲ့ ဆောင်းတွင်းကာလတွေဆိုပုပ္ပါးကို သွားရောက်လည်ပတ်သင့်တဲ့ကာလပါ။အဲဒီအချိန် ကအလှပဆုံးအချိန်တွေလို့ ပြောလို့ရပါတယ် “ဟု ပုဂံဒေသခံ Taxi ပြေးဆွဲပေးတဲ့ ကိုထက် (ပုဂံ)က Travelling သို့ ပြောသည်။

ပုပ္ပားဒေသသည် ဒေသခံများ၏ ကိုးကွယ်ယုံကြည်မှု၊ ယဉ်ကျေးမှု‌၊ ထုံးတမ်းအစဉ်အလာများ အစရှိသည့် သမိုင်းဆိုင်ရာ ယဥ်ကျေးမှုအမွေအနှစ်များ တည်ရှိရာ နေရာတစ်ခု အဖြစ် ပြည်တွင်းခရီးသွားဧည့်သည်များကြား ၌ ထင်ရှားသည့်ခရီးစဥ်ဒေသတစ်ခုဖြစ်ကြောင်း သိရသည်။

Popamountainpark

Photo KoHtetBaganTaxi