Author: Admin

နန်းမြင့်​​​မျှော်စင် ရောင်းချမည့် သတင်း မဟုတ်မှန်ကြောင်း လက်ဝယ်ပိုင်ဆိုင်ထားသည့် ရှင်သန်သူ ကုမ္ပဏီမှ ပြောကြား၊လွန်ခဲ့သည့် ငါးနှစ်ကတည်းက ထူးအုပ်စုကရောင်းချထားပြီးဖြစ်နေ

Posted on by Admin

#TravellingJournal

ပုဂံရှေးဟောင်းယဉ်ကျေးမှုဒေသ၏ အမြင့်ဆုံး ဘုရားဖြစ်သည့် သဗ္ဗေညုဘုရား ဥာဏ်တော် ထက် သုံးပေ နိမ့်သည့် ပုဂံဒေသတစ်ခုလုံးအား အပေါ်စီးမှ မြင်တွေ့နိုင်သော နန်းမြင့်​​​မျှော်စင် အား စျေးကွက်အတွင်းရောင်းချမည်ဟု ထွက်ပေါ်လာသည့် ကောလာဟလမှာ မှားယွင်းကြောင်း လက်ရှိနန်းမြင့်မျှော်စင်ကို ပိုင်ဆိုင်ထားသည့် ရှင်သန်သူကုမ္ပဏီမှ တာဝန်ရှိသူက Travelling သို့ ပြောသည်။

အဆိုပါ နန်းမြင့်​​​မျှော်စင်ကို လွန်ခဲ့သည့် ငါးနှစ်ဝန်းကျင်ခန့်ကတည်းက နာမည်ကျော် သူဌေးကြီး တစ်ဦးဖြစ်သူဦးတေဇ၏ ထူးလုပ်ငန်းစု စီမံခန့်ခွဲအောက်၌ မရှိတော့ပဲ ရှင်သန်သူကုမ္ပဏီသို့ လက်ပြောင်းထားခဲ့ပြီးဖြစ်ကြောင်း ထူး ဟိုတယ်လုပ်ငန်းစုမှ ပြောရေးဆိုခွင့်ရှိသူက Travelling သို့ ပြောသည်။

“လူမှုကွန်ယက်မှာတွေ့ပါတယ်။ မရောင်းပါဘူး။ ကျွန်တော်တို့လက်ထဲမှာ ပိုင်ဆိုင်မှုစာရွက်စာတမ်းတွေ ရှိပါတယ်။ ကျွန်တော်တို့ မရောင်းပါဘူး “ဟု ရှင်သန်သူကုမ္ပဏီမှ တာဝန်ရှိသူက Travelling ကို ပြောသည်။

လက်ရှိတွင် နန်းမြင့်​​​ မျှော်စင်သို့ လာရောက်လည်ပတ်သည့် ပြည်တွင်းခရီးသွားတစ်ဦးလျှင် ကျပ် ၃၀၀၀ နှင့် နိုင်ငံခြားသားဧည့်သည်ဆိုပါကတစ်ဦးလျှင် ၅ ဒေါ်လာ ဝင်ကြေးကောက်ခံကြောင်း သိရသည်။

#Bagan

#Photo-နန်းမြင့်မျှော်စင်

မြန်မာအမျိုးသားလေကြောင်းလိုင်းမှ ပုသိမ်လေဆိပ်သို့ (၇) နှစ်ကျော်ရပ်နားထားသည့် လေကြောင်းခရီးစဥ်ကို ပြန်လည်ပြေးဆွဲ

Posted on by Admin

#TravellingJournal

ဧရာဝတီတိုင်းဒေသကြီး၊ပုသိမ်လေဆိပ်သို့ မြန်မာအမျိုးသားလေကြောင်းလိုင်း (MNA) အနေဖြင့် (၇) နှစ်ကျော်ကြာ ပြေးဆွဲမှုရပ်နားထားပြီး ယခုအခါ ပုသိမ်လေဆိပ်သို့လေကြောင်းလိုင်းခရီးစဥ်ကို ပြန်လည် ပြေးဆွဲသွားမည်ဖြစ်ကြောင်း မြန်မာအမျိုးသားလေကြောင်းလိုင်းမှ တာဝန်ရှိသူတစ်ဦးက Travelling သို့ပြောသည်။

“ကျွန်တော်တို့က ၂၀၁၆ -၂၀၁၇ မှာရပ်နားခဲ့တာ။ ၇ နှစ်ကျော်တော့ရှိပြီ။ အရင်ကဆွဲခဲ့တာကလည်း စင်းလုံးငှားလေယာဥ်ခရီးစဥ်အနေနဲ့ဆွဲခဲ့တာပါ။ အခုကတော့ပုံမှန်ခရီးစဥ်အနေနဲ့ပျံသန်းပြေးဆွဲတာပါ “ဟု မြန်မာအမျိုးသားလေကြောင်း လိုင်းမှ တာဝန် ရှိသူက Travelling သို့ပြောသည်။

အောက်တိုဘာ္(၁၃) ရက်မှစတင်ကာ မြန်မာအမျိုးသားလေကြောင်း (MNA) မှ တနဂ်နွေ နှင့် တနလာ်နေ့များတွင် ရန်ကုန် -ပုသိမ်-ညောင်ဦး -မန္တလေး ခရီးစဥ်အနေဖြင့်ပြေးဆွဲပေးပြီး
အပြည်ပြည်ဆိုင်ရာမြန်မာလေကြောင်း (MNA / မဂ်လာလေကြောင်း)မှ ကြာသပတေးနှင့်သောကြာနေ့များတွင် ရန်ကုန်-ပုသိမ်-ညောင်ဦး -မန္တလေး-မန္တလေး-ညောင်ဦး -ပုသိမ်-ရန်ကုန် ခရီးစဥ်အနေဖြင့် ပြေးဆွဲပေးမည်ဖြစ်ကြောင်း ဟိုတယ်နှင့် ခရီးသွားလာရေးဝန်ကြီးဌာနမှ ထုတ်ပြန်ထားသည်။

Photo-MNA/ဟိုတယ်/ခရီး

ပြည်တွင်းဘုရားဖူးအသင်း (DPTOA)မှသုံးပါးရတနာ လူမှုကူညီရေးကော်မတီတို့က ရေဘေးသင့် အိမ်ခြေ (၃၃၀)အတွက်ကျပ်သိန်း (၃၀၀) ကျော် တန်ဖိုးရှိ လူသုံးကုန်ပစ္စည်းများနှင့် ငွေသားများ ထောက်ပံ့လှူဒါန်း

Posted on by Admin

#TravellingJournal

နေပြည်တော်၊ ဇေယျာသီရိမြို့နယ်၊လှေခွင်းတောင် အနီးတဝိုက်ရှိ ရေဘေးသင့်ကျေးရွာ ဖြစ်သည့် ချောင်းကမ်းကြီးကျေးရွာ၊စည်ပင်ကြီးကျေးရွာနှင့် ညောင်ပင်ကြီးကျေးရွာရှိ အိမ်ထောင်စု (၃၃၀ )အား ပြည်တွင်းဘုရားဖူးနှင့် ခရီးသွားဝန်ဆောင်မှုအသင်း (DPTOA)မှ သုံးပါးရတနာ လူမှုကူညီရေးကော်မတီတို့က ကျပ်သိန်း(၃၀၀) ကျော်တန်ဖိုးရှိ လူသုံးကုန်ပစ္စည်းများနှင့် ငွေသားများကို ထောက်ပံ့ပေးခဲ့ကြောင်း ပြည်တွင်းဘုရားဖူးနှင့် ခရီးသွားဝန်ဆောင်မှု အသင်းမှ တွဲဖက်အထွေအထွေအတွင်းရေးမှူး ဦးမျိုးသိန်းကျော်က Travelling ကို ပြောသည်။

အဆိုပါ ရေဘေးသင့်အိမ်ထောင်စုများသို့
ပြည်တွင်းဘုရားဖူးလိုက်ပါသူ ဦးရေ ( ၂၀ )ဝန်းကျင် မှ ကိုယ်တိုင်သွားရောက် လှူဒါန်းပေးခဲ့ကြောင်း သိရသည်။

အဆိုပါ ရေဘေးအလှူအတွက် ပြည်တွင်းဘုရားဖူးနှင့် ခရီးသွားဝန်ဆောင်မှုအသင်း (DPTOA)မှ ကွင်းဆင်း လေ့လာကာ ရေဘေးအလှူခရီးစဥ် ဆွဲပြီး အလှူရံပုံငွေ လက်မှတ်တစ်စောင်ကို တစ်ဦးလျှင် ကျပ် (၃၅,၀၀၀) သတ်မှတ်ထားပြီး ရရှိလာသော ရံပုံငွေအလှူများကို လိုအပ်သော ဆေးဝါးများ၊ လူသုံးကုန်ပစ္စည်းများ၊ အဝတ်အထည်များနှင့်စားသောက်ကုန်များကို ဝယ်ယူခဲ့ကြောင်း သိရသည်။

“ကျွန်တော်တို့အသင်းက ယာဉ်ပိုင်ရှင်တွေက ကားကိုအခမဲ့အသုံးပြုခွင့်ပေးတယ်။ ဆီဖိုးပဲစိုက်ရပါတယ်။ လက်မှတ်ရောင်းရတဲ့ငွေကြေးအကုန်ကို ရေဘေးအလှူထဲ ထည့်ဝင်လှူဒါန်းခဲ့ပါတယ်။ ဒီခရီးစဥ်မှာ လိုက်ပါတဲ့သူတွေကခရီးသွားတွေလည်းဖြစ်သလို သုံးပါးရတနာအဖွဲ့ဝင်တွေဖြစ်ကြပါတယ်။ ပြောရမယ်ဆိုရင် သူတို့ကလည်း DPTOA အသင်းသားတွေပါ”ဟု ဦးမျိုးသိန်းကျော်က Travelling ကို ပြောသည်။

ထို့ပြင် ယင်းခရီးစဥ်အလှူအတွက် မြန်မာနိုင်ငံ ခရီးသွားလုပ်ငန်းအဖွဲ့ချုပ်ကလည်း​စားသောက်ကုန် များကို လှူဒါန်းပေးခဲ့ကြောင်း သိရသည်။

အဆိုပါ ရေဘေးသင့်ကျေးရွာများသို့ Air Con Express မော်တော်ယာဉ်သုံးစီးနှင့် ကားသေး
သုံးစီး စုစုပေါင်း ကားခြောက်စီးဖြင့် ပြီးခဲ့သည့် စက်တင်ဘာ(၂၉ ) က သွားရောက်လှူဒါန်းခဲ့ကြောင်း သိရသည်။

Donation

ပုံ-စာ ပြီးခဲ့သည့် စက်တင်ဘာ၂၉ ရက်က ပြည်တွင်းဘုရားဖူးနှင့် ခရီးသွားဝန်ဆောင်မှုအသင်း (DPTOA)မှ သုံးပါးရတနာ လူမှုကူညီရေးကော်မတီ တို့က လူသုံးကုန်ပစ္စည်းများနှင့် ငွေသားများကို ရေဘေးသင့် ကျေးရွာ ဖြစ်သည့်ချောင်းကမ်းကြီးရှိ ဒေသခံများအား ပေးအပ်လှူဒါန်းနေသည့် မြင်ကွင်းကို တွေ့ရစဥ်။

​ပုန်းအင်းဒေသမှ ရေ​းေဘးသင့် အိမ်ထောင်စုဦးရေ (၁၄၂၆) အတွက် KBZ Bank၊Lwin Oo Htwe Co.,Ltd နှင့် ရှမ်း/တောင်ပရဟိတ အသင်းတို့အပါအဝင် အလှူရှင်များစုပေါင်းပြီး ကျပ်သိန်း(၁၁၀၀) တန်ဖိုးရှိအစားအသောက်များ ထောက်ပံ့ပေးနိုင်ခဲ့

Posted on by Admin

#TravellingJournal

ရှမ်းပြည်နယ်တောင်ပိုင်း၊တောင်ကြီးမြို့၊ ဟိုပုံးမြို့နှင့် ဆီဆိုင်မြို့အကြား ပုန်းအင်းဒေသရှိ ရွာပေါင်း(၂၅) ရွာကျော် ရေနစ်မြုပ်ခဲ့သဖြင့် အိမ်ထောင်စုပေါင်း(၁၄၂၆) အတွက် သိန်း(၁၁၀၀) တန်ဖိုးရှိ အစားအသောက် များကို ထောက်ပံ့ပေးနိုင်ခဲ့ကြောင်း ပအိုဝ်းဒေသ သဘာဝဘေးနှင့်လူမှုကူညီရေးအသင်း(ဗဟို) တောင်ကြီးမြို့၏ အဖွဲ့ဝင်တစ်ဦးဖြစ်သူ ဦးခွန်ထွန်းဦးက Travelling သို့ ပြောသည်။

ရေနစ်မြုပ်ခဲ့သည့် ရှမ်းပြည်နယ်တောင်ပိုင်း ပုန်းအင်းဒေသရှိ ကျေးရွာပေါင်း(၂၅) ရွာ၊ အိမ်ထောင်စုပေါင်း(၁၄၂၆)အတွက် KBZ Bank ၊ A to Z Group( Lwin Oo Htwe Co.,Ltd) ၊ FVS Group ၊ SSYEA ၊ ရှမ်းတောင်ပရဟိတညီနောင်များကွန်ယက် (SSSPBN ) နှင့် (ပအိုဝ်းဒေသ သဘာဝဘေး နှင့် လူမှုကူညီရေးအသင်း- ဗဟို)တို့ စုပေါင်း၍ ကာလတန်ဖိုး သိန်း (၁၁၀၀ )ဝန်းကျင် ရှိသည့်ဆန်၊ ဆီ၊ ခေါက်ဆွဲခြောက်၊ ငါးသေတ္တာ အစရှိသည့် စားသောက်ကုန်ပစ္စည်းများကို စက်တင်ဘာ(၂၂) ရက်က လှူဒါန်းပေးခဲ့ကြောင်း သိရသည်။

ပုန်းအင်းဒေသသည် ရှမ်းပြည်နယ်တောင်ပိုင်း၊ (တောင်ကြီးမြို့နယ်၊ ဟိုပုံးမြို့နယ်၊ ဆီဆိုင်မြို့နယ် ) အစရှိသည့် မြို့နယ် (၃)ခုဆုံကာ ရှမ်းတိုင်းရင်းသားအများစုနေထိုင်ကြသည့် အရပ်ဒေသတစ်ခုဖြစ်ပြီး လမ်းပန်းဆက်သွယ်ရေးမှာလည်း ခက်ခဲကြောင်း ယခုကဲ့သို့ ရေဘေးသင့်ပြည်သူများအတွက် လှူဒါန်းပေးသည့် အလှူရှင်များကိုလည်းကျေးဇူးတင်ရှိကြောင်း ဦးခွန်ထွန်းဦးက Travelling သို့ ပြောသည်။

ရေဘေးသင့်ပြည်သူများ လတ်တလောနေထိုင်ကြသည့် ဆီဆုံကျေးရွာဘုန်းကြီးကျောင်း၊ ကက္ကူဘုန်းကြီးကျောင်းနှင့် ဆိုင်လဲကျေးရွာသို့
သွားရောက်နိုင်ရန်အတွက် ပအိုဝ်းဒေသ သဘာဝဘေးနှင့် လူမှုကူညီရေးအသင်း(ဗဟို) နှင့် ပုန်းအင်းဒေသခံတို့ ပူးပေါင်းပြီး အလှူရှင်များ သွားရောက်လှူဒါန်းနိုင်အောင် ကူညီဆောင်ရွက်ပေးခဲ့ကြောင်း ပုန်းအင်းဒေသခံ တစ်ဦးက Travelling သို့ ပြောသည်။

ပုန်းအင်းဒေသသည် ကုန်း(၆)လ ရေ (၆) လနေထိုင်ကြသည့် အေးချမ်းသာယာလှပသည့် ဒေသဖြစ်ပြီး “နောင်မွန်ရှမ်းဆန်” ထွက်ရှိရာဒေသအဖြစ် နာမည်ကျော်ကြားသည့် ဒေသ တစ်ခု ဖြစ်ကြောင်းသိရသည်။

Photo Khun Htun Oo

ရေကြီးမြေပြိုနစ်မြုပ်ခဲ့သည့် ရမည်းသင်းခရိုင် ချောင်းဖျားကျေးရွာသို့ ပြည်သူသို့မျှဝေခြင်းအဖွဲ့နှင့် ဒိဝါတပတိမိသားစုက သွားရောက်လှူဒါန်း

Posted on by Admin

#TravellingJournal

ပြည်သူသို့မျှဝေခြင်း (Contribution to Community C2C )မှ ဦးဆောင်သော အဖွဲ့နှင့် မြန်မာနိုင်ငံခြေလျင်နှင့် တောင်တက်အဖွဲ့ချုပ် မှ လုပ်အားပေးအဖွဲ့များသည် ရေကြီးနစ်မြုပ် မြေပြိုခဲ့ကြသည့် ရမည်းသင်းခရိုင်၊ ဝါးဖြူတောင်ကျေးရွာအုပ်စု၊ ချောင်းဖျားကျေးရွာရှိ ရေဘေးသင့်ပြည်သူများအတွက် ထောက်ပံ့ ပစ္စည်းများကို စက်တင်ဘာ ၁၈ ရက်က သွားရောက် လှူဒါန်းခဲ့ကြောင်း ပြည်သူသို့မျှဝေခြင်းအဖွဲ့မှ ဒေါက်တာနေစိုးမောင် က Travelling သို့ ပြောသည်။

အဆိုပါကျေးရွာသည် သပြေပင်ကျေးရွာထက်
ပိုဝေးပြီး လူသူအရောက်ပေါက်နည်းသည့်ကျေးရွာဖြစ်သောကြောင့် သွားရောက်လှူဒါန်းခဲ့ကြောင်း ၎င်းက ပြောသည်။

“မြန်မာလူမျိုးတွေက အလှူအတန်းမှာ အရမ်းရက်ရော လှူဒါန်းကြပါတယ်။ ဘယ်နေရာပဲ ဖြစ်ဖြစ် တက်အားသရွေ့ကို လှူကြပါတယ်။ကျွန်တော်တို့သွားလှူတဲ့ချောင်းဖျားရွာက သပြေပင်ရွာကနေထက်ပြီးသွားရသေးတဲ့ရွာပါ။လမ်းခရီးလည်းကြမ်းပေမဲ့ လာလှူကြတဲ့အလှူရှင်အဖွဲ့တွေကိုလည်းတွေ့ရပါတယ် “ဟု ဒေါက်တာနေစိုးမောင် က Travelling သို့ ပြောသည်။

တစ်ရွာလုံးနီးပါးခန့် ရေ ဘေးသင့်ခဲ့ကြသည့်
ချောင်းဖျားကျေးရွာသို့ သွားရောက်ပြီး လိုအပ်
သည့် ထောက်ပံ့ရေးပစ္စည်းများကို လှူဒါန်းခဲ့ကြောင်းသိရသည်။

” ရွာအိမ်ခြေကတော့(၂၅၇) အိမ်ရှိပါတယ်။ လိုအပ်တာတွေကို သွားရောက်လှူဒါန်းခဲ့ပါတယ်။ လမ်းခရီးလည်း အလွန် ကြမ်းတမ်းပါတယ် “ဟု အဆိုပါ မြန်မာနိုင်ငံခြေလျင်နှင့် တောင်တက် အဖွဲ့ချုပ် ရေဘေးကူညီရေး (ပရဟိတ) အဖွဲ့ မှ လိုက်ပါခဲ့သည့်အဖွဲ့ဝင် တစ်ဦးကလည်း Travelling သို့ ပြောသည်။

ထို့ပြင် ရမည်းသင်းမြို့နယ် ချောင်းဖျားရွာအတွက်လည်း ဒိဝါတပတိမိသားစုက အလှူငွေ (185) သိန်းတိတိကို စက်တင်ဘာ( ၁၇ )ရက် နေ့က သွားရောက်လှူဒါန်းခဲ့ကြောင်း Golden Image မြန်မာပန်းပုပြခန်းပိုင်ရှင်​ ဒေါ်မေဇင်ဦး က Travelling သို့ ပြောသည်။

” ရွာသူကြီးရယ် ရပ်မိရပ်ဖများနဲ့အတူ
သေချာစာရင်းကောက်ပြီးမှ လက်ရောက်
လှူပေးခဲ့တာပါ”ဟု Golden Image မြန်မာပန်းပုပြခန်းပိုင်ရှင်​ ဒေါ်မေဇင်ဦး က Travelling သို့ ပြောသည်။

ရေကြီးမြေပြိုမှုများဖြစ်ခဲ့သော ရမည်းသင်းမြို့နယ်၊ချောင်းဖျားကျေးရွာလေးတွင် အိမ်ခြေ ၇၀၀ အနက် မြေအောက်ရောက်သွားသည့်
အိမ်ခြေ (75) အိမ်အတွက် တစ်အိမ်လျှင် နှစ် သိန်းကျပ် စုစုပေါင်း သိန်း( 150)နှင့် သေဆုံးသူဦးရေ (၈) ဦးအတွက် ကျန်ရစ်သူ မိသားစုအား တစ်ဦးလျှင် ကျပ် ငါးသိန်းတိတိကို ပေးအပ်လှူဒါန်းခဲ့ကြောင်းသိရသည်။

Donation
photo Nathan Lin Htut /Golden Image
စက်တင်ဘာ ၁၇ ရက်နှင့် ၁၈ ရက်က ချောင်းဖျားရွာသို့ သွားရောက်လှူဒါန်းခဲ့သည့်မြင်ကွင်းများကို
တွေ့ရစဥ်။

ဟိုတယ်ဆိုင်ရာ လုပ်ငန်းရှင်များအသင်း(MHA)နှင့် သမ္မတဖောင်ဒေးရှင်းတို့ ပူးပေါင်းပြီး ရေဘေးသင့်ပြည်သူများအား သိန်း (၅၀၀ )ဝန်းကျင်ရှိ ထောက်ပံ့ပစ္စည်းများ လှူဒါန်း

Posted on by Admin

#TravellingJournal

မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(MHA) နှင့် သမ္မတဖောင်ဒေးရှင်းတို့
ပူးပေါင်းပြီး တောင်ငူမြို့၊ပျဥ်းမနားမြို့နယ်နှင့်
တပ်ကုန်းမြို့နယ်များရှိ ရေဘေးသင့်ပြည်သူများအား ထောက်ပံ့ပစ္စည်းများကို စက်တင်ဘာ(၁၇) ရက်က သွားရောက်လှူဒါန်းခဲ့ကြောင်း ​မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(MHA) မှအထွေထွေ အတွင်းရေးမှူး ဦးနေအောင်ကို က Travelling သို့ ပြောသည်။

“ကျွန်တော်အဖွဲ့ တစ်ဖွဲ့က ( ၁၇ )ရက်က
သွားလှူခဲ့တယ်။အဲဒီမှာ ရေတက်တာနဲ့ တိုးမိ​ပြီး ပိတ်မိနေသေးတယ်။တောင်ငူမှာ လှူနေပါတယ်။ရွာထဲက ကယ်ဆယ်ရေးစခန်းတွေဆီ လှူဒါန်းခဲ့ပါတယ်” ဟု သမ္မတဖောင်ဒေရှင်း မှ တာဝန်ရှိသူ က Travelling သို့ ပြောသည်။

မိသားစု( ၄၀၀ )စာအတွက် မီးခြစ် ၊ဖယောင်းတိုင်၊BPI ဓါတ်စားထုတ်၊ကိတ်ခြောက် သုံးမျိုး၊ခေါက်ဆွဲ ၊ကြာဆံ သုံးမျိုး ၊ဆန်၊ ဆီ ၊ငပိထောင်း ၊ လက်ဖက်ပဲကျော် ၊နှမ်း ၊မြေပဲ၊ ပုစွန်ခြောက် ၊ကာပေါ်လစ်ဆပ်ပြာ ၊ငါးသတ္တာ နှင့် ရေသန့် တို့ကို ပေးအပ်လှူဒါန်းခဲ့ကြောင်းသိရသည်။

ထို့ပြင်အမျိုးသမီး၊ အမျိုးသား နှင့် ကလေး ငယ်များအတွက် လူဦးရေ (၂၀၀၀ )စာ အဝတ်အစားနှင့်ခြုံစောင်( ၂၀၀) တို့ကို လှူဒါန်းပေးခဲ့​​ကြောင်း သိရသည်။

Donation
Photo U Nay Aung Ko

အင်းလေးကန်အတွင်း ရေဘေးသင့်ပြည်သူများကို Amata Garden Resort မှ စားစရာနှင့် အခြေခံလိုအပ်ချက်များကို လှူဒါန်းပေးနေ

Posted on by Admin

#TravellingJournal

အင်းလေးကန်အတွင်း ရေဘေးသင့်ပြည်သူများအတွက် အင်းလေးအခြေစိုက်ဟိုတယ်တစ်ခုဖြစ်သည့် Amata Garden Resort မှ စားစရာနှင့် အခြေခံလိုအပ်ချက်များကို လှူဒါန်းပေးနေ ကြောင်း Amata ဟိုတယ်ပိုင်ရှင် က Travelling သို့ ပြောသည်။

ထို့ပြင် Amata Garden Resort, Inle Lake မှ
အင်းလေး ရေဘေးကူညီဆောင်ရွက်ပေးနေသည့် လူမှု့ကူညီကယ်ဆယ်ရေးအသင်းအဖွဲ့များဖြင့် ပူးပေါင်း၍သော်လည်းကောင်း တတ်စွမ်းသမျှ ကူညီဆောင်ရွက်သွားမည်ဖြစ်ကြောင်းသိရသည်။

” အလှူရှင်/ပရဟိတအသင်း လာလှူတဲ့လူတွေအတွက် ဟိုတယ်ကနေ လှေတွေ၊ကားတွေ ၊တည်းခိုဖို့ အခမဲ့စီစဉ်ပေးပါမယ်။ ကိုယ်နိုင်သလောက်က အရင်စပါမယ်။ အခုလက်ရှိကတော့ အဓိကစားစရာ၊ ရေ၊မုန့် အခြေခံချက်ချင်းလိုတာတွေကို ဟိုတယ်ကနေ ရေမြုပ်နေတဲ့ရွာတွေကို နေ့စဉ်ပေးပို့လှူဒါန်းနေပါတယ်။အခြားလှူချင်တဲ့သူရှိလာရင် ဟိုတယ်ဝန်ထမ်းတွေကတဆင့် လှူဒါန်းပေးသွားပါမယ် “ဟု Amata ဟိုတယ်ပိုင်ရှင် က Travelling သို့ ပြောသည်။

” ဦးဇင်းတို့ အင်းလေး ဟဲယာရွာမဘက်
ရေကြီးနေပါတယ်။လိုင်းလည်းမရပါဘူး။
လိုအပ်တာက သောက်ရေ နဲ့ ထင်း တွေ ကလည်းရေမြုပ်ကုန်တာကြောင့် ထင်းအစားထိုးလောင်စာနဲ့ ဆန်/ဆီ/ ကြက်ဥ တွေကို လိုအပ်နေပါတယ်။ အဆက်အသွယ်ခက်ခဲမှုတွေကြောင့် ဦးဇင်းက အခုသာသနပါလကဓမ္မဗိမာန်တော် မှာ အမြဲရှိနေပါတယ် “ဟု Travelling သို့ မိန့်ကြားသည်။

လက်ရှိအနေအထားတွင် အင်းလေးရေဘေးအတွက် အဓိကထားပြီးလုပ်ဆောင်ပေးနေကြောင်း ပုန်းအင်းဒေသဘက်သို့ ဖုန်းအဆက် အသွယ်များရရှိပါက ကူညီဆောင်ရွက်ရန် လွယ်ကူသွားမည်ဖြစ်ကြောင်း သိရသည်။

ယခုလက်ရှိတွင် ကေလာ၊ ငါးဖယ်ချောင်း၊ လင်းကင်းစသည့် ကျေးရွာအုပ်စုများအပြင်
အင်းလေးဒေသရှိ ကျေးရွာအုပ်စု (၃၅) စုထဲမှ
ရွာပေါင်း (၁၇၀) ကျော်ရေနစ်မြုပ်နေကြောင်းသိရသည်။

Inle
Photo အရှင်ကုသလ ရွာမ ပထမ

ပုံ-စာ /ယနေ့ အင်းလေးကန်၏ အခြေအနေကို တွေ့ရစဥ်။

ပုန်းအင်းဒေသ ရွာပေါင်း၂၅ ကျော် ၊ အိမ်ခြေ (၁၂၀၀ )ကျော် ရေနစ်မြုပ်သဖြင့် အစားအသောက် များ အရေးပေါ် လိုအပ်နေ

Posted on by Admin

#TravellingJournal

ရှမ်းပြည်နယ်တောင်ပိုင်း တောင်ကြီးမြို့၊ ဟိုပုံးမြို့နှင့် ဆီဆိုင်မြို့အကြား ပုန်းအင်းဒေသရှိ ရွာပေါင်း(၂၅) ရွာကျော် နှင့် အိမ်​ခြေ (၁၂၀၀ ) ကျော် ရေနစ်မြုပ်နေသဖြင့် စားနပ်ရိက္ခာများ အရေးပေါ်လိုအပ်နေကြောင်း ပအိုဝ်းဒေသ သဘာဝဘေးအန္တရာယ်ကာကွယ်ရေးအဖွဲ့နှင့် ချိတ်ဆက်ဆောင်ရွက်နေသည့် ဦးခွန်ထွန်းဦးက Travelling သို့ ပြောသည်။

” အဲဒီဘက်တွေကို အဆက်အသွယ်မရဘူး။
အင်းရေပြင်လိုဖြစ်သွားတာပါ။ အဓိကနောင်မွန်ရှမ်းဆန်စပါး အဓိကထွက်တဲ့ဒေသတွေပါ။ ပင်လွန်ရွာက ဒေသခံဆီ အဆက်အသွယ်ရတော့လှမ်းမေးတာအစားအသောက် အခက်အခဲ ရှိနေပါတယ်။ အိမ်တွေကတော့ မြုပ်ကုန်လို့ အမြင့်ပိုင်းနေရာတွေကို ပြောင်းရွှေ့နေထိုင်နေကြပါတယ် “လို့ ဦးခွန်ထွန်းဦးက Travelling သို့ ပြောသည်။

ရှမ်းတိုင်းရင်းများနေထိုင်ကြသည့် ပင်လွန်ရွာသည် အိမ်​ခြေပေါင်း (၁၀၀) ကျော် ရေနစ်မြုပ်နေပြီး နန့်တံဘက်ချောင်းကို အလယ်မှ ခြားကာ ချောင်း၏ အရှေ့ဘက်ခြမ်းဆိုပါက ဆီဆိုင်မြို့နယ်ထဲတွင် ပါ၀င်ပြီး ချောင်းအနောက်ဘက်ခြမ်းဆိုပါကတောင်ကြီးမြို့နယ် နယ်နိ မိတ်အဖြစ် သတ်မှတ်ခံထားရထားသည့် ရှမ်းတိုင်းရင်းသားများ အများဆုံး နေထိုင်ကြသည့် ရွာများဖြစ်ကြောင်း သိရသည်။

ပုန်းအင်းဒေသသည် ကုန်း ၆လ ရေ ၆ လနေထိုင်ကြသည့် အေးချမ်းသာယာလှပသည့် ဒေသဖြစ်ပြီး “နောင်မွန်ရှမ်းဆန်” ထွက်ရှိရာဒေသအဖြစ်နာမည်ကျော်ကြားသည့် ဒေသဖြစ်ကြောင်းသိရသည်။

Photo- မူရင်းပိုင်ရှင် Crd

ဟိုတယ်နှင်းရွှေရည်မှ ကလောမြို့တွင် ဆိုလာဖြင့် ဖုန်းအားသွင်းရန် နှစ်နေရာ ပြုလုပ်ပေးထား

Posted on by Admin

#TravellingJournal

ရှမ်းပြည်နယ်တောင်ပိုင်း အောင်ပန်းအခြေ စိုက် ဟိုတယ်နှင်းရွှေရည်မှ ကလောရေဘေးရှောင် ပြည်သူများအတွက် ထမင်းနှင့်ဟင်းများချက်ပြုတ်ပြီး စက်တင်ဘာ ၁၅ ရက် နံနက်ပိုင်း
က သွားရောက် လှူဒါန်းခဲ့ကြောင်း သိရသည်။

ထို့ပြင် ဖုံးအားသွင်းရန် အဆင်ပြေရန်အတွက် အောင်ပန်းမြို့ဘက်မှ ကလောမြို့အဝင်တွင် ဆိုလာဖြင့် ဖုန်းအားသွင်းရန်နေရာတစ်နေရာနှင့် ကလောမြို့တွင်း တစ်နေရာတို့၌ ဖုန်းအားသွင်းရန် စီစဥ်ထားရှိပေးထားကြောင်း သိရသည်။

” ဒီ စက်တင်ဘာ ၁၅ ရက် မနက်ပိုင်းက ဆန် ၇ ပြည်ချက်ပြီး သွားလှူတယ်။ ကြက်သားကြော်သွားတယ်။ ကယ်ဆယ်ရေးစခန်းက သူတွေက ထမင်းချက်စားလို့မရသေးဘူး။ ကျွန်တော်တို့ချက်ပြီး သွားလှူပေးတာ။ မစားရသေးတဲ့သူတွေရှိလို့ အခုထပ်ပြီးချက်နေပါတယ်။ ညနေသွားထပ်လှူမှာပါ။ ကလောက အန်တီလီလီ ဆီ လည်း ဆန် (၁၀ )အိတ် လှူပြီး လိုတဲ့နေရာတွေချက်​လှူ နေပါတယ်။ အဝတ်အစားတွေနဲ့စားစရာကိုတော့အဓိက လှူနေပါတယ်”ဟု ကိုမင်းကိုကိုက Travelling သို့ပြောသည်။

စက်တင်ဘာ ၁၂ ရက်မှ စတင်ကာ ထမင်းနှင့် ဟင်းများကိုချက်ပြုတ်ပြီး လှူဒါန်းနေကြောင်း သိရသည်။

Donation
Photo Min ko

ပုံ-စာ ရေပြန်ကျပြီး​​​နောက်ပိုင်းကလောမြို့တစ်နေရာကိုတွေ့ရစဥ်။

ခရီးသွားမြို့တော်ဟု တင်စားထားသည့်ကလောမြို့တွင် ရေဘေးကြောင့် အိမ်ခြေ (၄၀၀) ကျော် ပျက်စီး၊ လူ (၁၄) ဦး သေဆုံး

Posted on by Admin

#TravellingJournal

ခရီးသွားမြို့တော်ဟု တင်စားထားသည့် ကလောမြို့သည် ရေဘေးကြောင့် အိမ်ခြေ (၄၀၀)ကျော် ပျက်စီးဆုံးရှုံးခဲ့ပြီး လူဦးရေ (၁၄) ဦး သေဆုံးခဲ့ကြောင်း ကလောမြို့စည်ပင် သာယာရေးဌာနမှ တာဝန်ရှိသူက Travelling သို့ ပြောသည်။

” လက်ရှိစာရင်းအရဆိုရင် အိမ်အပျက်အစီး
(၄၄၀ )ကျော် နဲ့ လူ (၁၄)ဦး သေဆုံးခဲ့ပါတယ်”ဟု ၄င်းက Travelling ကို ဖုန်းမက်ဆေ့ဖြင့် ပြန်လည်ဖြေကြားခဲ့သည်။

လက်ရှိတွင် ကလောမြို့ပေါ် ၌ ရေပြန်ကျသွားပြီးနောက် မြို့ပေါ်လမ်းများကို သန့်ရှင်းရေး များဆောင်ရွက်ခြင်းနှင့် ရေပေးဝေရေးလုပ်ငန်းများကို အဓိကထား ဆောင်ရွက်နေကြောင်း ကလောမြို့စည်ပင်သာယာရေးဌာနမှ တာဝန်ရှိသူက Travelling သို့ ပြောသည်။

” စည်ပင်ဌာနကတော့ မြို့သန်းရှင်းရေးနဲ့ ရေပေးဝေရေးလုပ်ငန်းတွေကို အဓိကထား လုပ်ဆောင်နေပါတယ်။ လုပ်နေတုံးပါပဲ။ အမြန်ဆုံးဆောင်ရွက်လျက်ရှိနေပါတယ်။ ခန့်မှန်းအားဖြင့် တစ်လခန့်ကြာမြှင့်ပါမယ် “ဟု ၄င်းက ပြောသည်။

လက်ရှိတွင် ကလောမြို့၌ ကယ်ဆယ်ရေးစခန်း
(၇) ခု ဖွင့်လှစ်ထားပြီး မြို့မဘုန်းကြီးကျောင်း၌ ကယ်ဆယ် ကွပ်ကဲရေးရုံးကို ဖွင့်လှစ်ထားကြောင်း အလှူရှင်များအနေဖြင့် မြို့မဘုန်းကြီးကျောင်းသို့ လှူဒါန်းပေးနိုင်ကြောင်း သိရသည်။

ကလောရေဘေးကြောင့် ရေဘေးရှောင် ဒေသခံလူဦးရေ ခန့်မှန်း ၂၀၀၀ ဝန်းကျင်ရှိပြီး သေဆုံးသူ ဦးရေမှာ (၁၄) ဦး ရှိကြောင်း စည်ပင်သာယာရေးဌာန ၏ လက်ရှိ စာရင်းအရ သိရသည်။

Photo July Angel

ပုံ-စာ စက်တင်ဘာ ၁၃ ရက်နှင့် ၁၄ ရက်နေ့က မြင်တွေ့ရသည့် ကလော မြို့ပေါ် မြင်ကွင်းကို တွေ့ရစဥ်။

မြန်မာ့ခရီးသွားဘဏ် မှ နေပြည်တော်ပတ်ဝန်းကျင်ရှိရေဘေးရှောင် ပြည်သူ (၁၀၀၀၀)ကျော်ကို စားစရာများ လှူဒါန်း

Posted on by Admin

#TravellingJournal

မြန်မာ့ခရီးသွားဘဏ်မှ နေပြည်တော် ပတ်ဝန်း ကျင်ရှိ ရေဘေးရှောင် ပြည်သူ (၁၀၀၀၀)ကျော်ကို စားစရာများ လှူဒါန်းခဲ့ကြောင်း သိရသည်။

ရန်ကုန်၊ မန္တလေး နှင့် နေပြည်တော်ရှိ မြန်မာ့ခရီးသွားဘဏ် – MTB Bank ၏ ရုံးချုပ်၊ ဘဏ်ခွဲနှင့် ဌာနအသီးသီးမှ Volunteer ဝန်ထမ်း (၃၆) ဦးပါဝင်သော စေတနာ့ဝန်ထမ်းအဖွဲ့များမှ စက်တင်ဘာလ (၁၄)ရက် နံနက်ပိုင်းမှ ရန်ကုန်မြို့မှ နေပြည်တော်သို့ သွားရောက်ပြီး လှူဒါန်းခဲ့ကြောင်း သိရသည်။

မြန်မာ့ခရီးသွားဘဏ်မိသားစုမှ စုပေါင်း လှူဒါန်းသည့် ငွေကျပ် (၂၀၀ ) သိန်းကျော်တန်ဖိုးရှိ အစားအသောက်၊ ဆေးဝါး နှင့် အသုံးအဆောင်ပစ္စည်းများအား ရေဘေးသင့်ပြည်သူများအတွက်နေပြည်တော်ပတ်ဝန်းကျင်ရှိ ရေ​ဘေးရှောင်ကြသည့် တပ်ကုန်း အထက် ၁ မှ လူ ဦး ရေ (၄၀၀၀) ကျော် ၊ လှေကွင်တောင်ခြေဘက်မှ လူ (၅၀၀၀) ကျော်နှင့် သာသနာ့ဗိမာန် မှ လူ ဦးရေ (၂၆၀၀) ကျော်အတွက် လှူဒါန်းပေးခဲ့ကြောင်းသိရသည်။

Donation
Photo MTB Bank
ပုံ-စာ စက်တင်ဘာ ၁၅ ရက်က နေပြည်တော် တစ်ဝိုက်ရှိ ရေဘေးရှောင်ပြည်သူများကို မြန်မာ့ခရီးသွားဘဏ် မှ သွားရောက်လှူဒါန်းနေသည့်မြင်ကွင်းကိုတွေ့ရစဥ်။

JJ Express မှ ‌ရေဘေးအလှူအဖြစ် ထမင်းဘူး (၅၀၀၀) လှူဒါန်းမည်

Posted on by Admin

#TravellingJournal

ပြည်တွင်းယာဥ်လိုင်းတစ်ခုဖြစ်သည့် JJ Express မှ ‌ရေဘေးအလှူအဖြစ် ထမင်းဘူး (၅၀၀၀) ကို လှူဒါန်းသွားမည်ဖြစ်ကြောင်း ၄င်း၏ ဖေ့ဘုတ်စ်စာမျက်နှာတွင် ယနေ့ ညနေ ပိုင်းက ရေးသားဖော်ပြထားကြောင်းသိရသည်။

“ပရဟိတအသင်းနာမည်၊ လိပ်စာ၊ ဥက္ကဋ္ဌနံမည် ၊ဆက်သွယ် ရမယ့်ဖုံးနံပတ်၊ လှူမယ့်နေရာ၊ လှူမယ့်လူဦးရေ ၊ ကူညီ ပေးမယ့်ဒေသနဲ့ ဘယ်လိုသွားရောက်ကူညီပေးမလဲဆိုတာ​လေးကို ပြောပြပေးရင်ရပါပြီ” လို့ JJ Express မှ တာဝန်ရှိသူတစ်ဦးက Travelling သို့ပြောသည်။

လက်ရှိတွင် ပရဟိတအသင်းများမှ ဆက်သွယ်လာခြင်းမရှိသေးကြောင်း ရေဘေးသင့် ပြည်သူများကို ကူညီပေးနေသော ပရဟိတအဖွဲ့များ မှ JJ Express ဖုံးနံပတ် – 09 772 82 3000 သို့ ဆက်သွယ်ပြီး ထမင်း ဗူးများကို ရယူနိုင်ပြီဖြစ်ကြောင်း သိရသည်။

JJ Express
Donation