Month: May 2025

#Travelling Journal

လိုင်စင်ရခရီးသွားကုမ္ပဏီများမှ Tour Package
ဖြင့်လည်ပတ်သည့် ကမ္ဘာလှည့်ခရီးသည်များ၏ ခရီးစဥ် အစအဆုံးမှတ်တမ်းများကို ဟိုတယ်နှင့်ခရီးသွားလာရေးဝန်ကြီးဌာနသို့ ပေးပို့ရမည်ဖြစ်ကြောင်းသိရသည်။

အဆိုပါဝန်ကြီးဌာနမှ မေလ(၁၆)ရက် ရက်စွဲဖြင့် ထုတ်ပြန်ကြေညာထားပြီး ထုတ်ပြန်ချက်တွင် မတ်လ(၂၈) ရက် မန္တလေးငလျင်ကြီးဖြစ်ပွားပြီးနောက် လိုင်စင်ရခရီးသွားကုမ္ပဏီများ၏အစီအစဥ်ဖြင့် ခရီးစဥ် ဒေသများသို့ လာရောက်လည်ပတ်ခဲ့သော ကမ္ဘာလှည့်ခရီးသည်များနှင့် မြိတ်ကျွန်းစုသို့စက်တပ်ရွက်လှေများဖြင့် လာရောက်လည်ပတ်ခဲ့သော ကမ္ဘာလှည့်ခရီးသည်များ၏ ခရီးစဥ်များကိုတင်ပြခဲ့ရာ ခရီးသွားကုမ္ပဏီများ၏ အစီအစဥ်ဖြင့်လာရောက်သော ခရီးစဥ်များတွင် ခရီးသည်များ၏ ဓာတ်ပုံ၊ဗွီဒီယိုများရိုက်ကူးထားရှိပြီး ဌာနသို့ ပေးပို့ရန်နှင့် ဌာန၏ Website နှင့် Social Media များတွင်ဖော်ပြရန်ဟု ထုတ်ပြန်ချက်တွင်ဖော်ပြထားကြောင်းသိရသည်။

“အခု မြိတ်ကျွန်းစုဘက်က ဒီရာသီက ခရီးသွားရာသီနားထားတယ်။ နိုဝင်ဘာကျမှ မြိတ်ကျွန်းစုခရီးသွားကာလက ပြန်လည်ဖွင့်တာ။ တခါတလေတော့ခရီးသွားလာတာမျိုးရှိပါတယ်။ အဲဒီအချိန်ကျရင်တော့တင်ပြရမှာပေါ့ “ဟု ဟိုတယ်နှင့်ခရီးသွားလာရေးညွန်ကြားမှု ဦးစီးဌာန ( ကော့သောင်းရုံးခွဲ) မှ တာဝန်ရှိသူက Travelling သို့ပြောသည်။

လိုင်စင်ရခရီးသွားကုမ္ပဏီများအနေဖြင့် ဝန်ဆောင်မှူပေးခဲ့သော ခရီးစဥ်များတွင် ပါရှိသည့်ခရီးသွားများ စတင်ရောက်ရှိလာရာမှစတင်ပြီး ခရီးစဥ်လည်ပတ်ကြည့်ရှုနေမှုများနှင့် လမ်းခရီးတစ်လျှောက်လှုပ်ရှားမှုများကို ဓာတ်ပုံ ဗွီဒီယိုများဖြင့် မှတ်တမ်းတင်ရိုက်ကူးပြီး ခရီးစဥ် ပြီးဆုံးသည့်နေ့မှ (၁၀) ရက်အတွင်း ဟိုတယ် နှင့်ခရီးသွားညွှန်ကြားမှုဦးစီးဌာန ဟို တယ်နှင့်ခရီးသွားလုပ်ငန်းဆိုင်ရာကြီးကြပ်ရေးဌာနခွဲ Email (trd.trd2021@gmail. com) သို့လိပ်မူ၍ မပျက်မကွက်ပေးပို့ရန် ယင်းထုတ်ပြန်ချက်တွင် ဖော်ပြထားကြောင်းသိရသည်။

#Travelling Journal

#News

#Photo Tourism Tanintharyi

#Travelling Journal

ထင်းရှုးမြို့တော်ဖြစ်သည့် ကလောမြို့မှ အောင်ပန်းမြို့သို့ ပြေးဆွဲလျက်ရှိသည့် ကားရထားကို ဧပြီလအတွင်း ခေါက်ရေ (၃၀) ကျော်ပြေးဆွဲနိုင်ခဲ့ပြီး စီးနင်းသူခရီးသွားအများစုမှာ အလှဓာတ်ပုံံရိုက်ကူးရန်ဖြစ်ကြောင်း ကလောမီးရထားဘူတာရုံံပိုင်ကြီးမှ Travelling သို့ပြောသည်။

” ကလောကနေ အောင်ပန်းအထိ စင်းလုံးဌား တစ်ခေါက်ကို တစ်သိန်းနှစ်သောင်း ယူပါတယ်။(၁၅)ယောက် စီးလို့ရတယ်။ တကယ်လို့လူနည်းနည်းပဲစီးချင်လည်း ဒီနှုန်းထားပါပဲ။ ကြိုငှားလို့လည်းရသလို တကယ်လို့ ချက်ချင်းစီးချင်ရင်တော့ အချိန်တော့စောင့်ဆိုင်းပေးရမှာပါ။ အသွားအပြန်ကို တစ်နာရီခွဲလောက်ကြာပါတယ်။ ဧပြီလအတွင်းမှာတော့ခေါက်ရေ (၃၀)ကျော်ပြေးဆွဲနိုင်ခဲ့တယ်။ဒီလကတော့ အနည်းဆုံးပုံမှန်တစ်ခေါက်ပြေးဆွဲပေးနေရတယ်” ကလောမီးရထားဘူတာ ရုံံပိုင်ကြီး မှ Travelling သို့ ပြောသည်။

လက်ရှိတွင် ကားရထားတွဲဆိုင်းတစ်တွဲဖြင့် ဝန်ဆောင်မှုပေးလျက်ရှိပြီး ဧည့်သည် (၁၅) ဦးလိုက်ပါစီးနင်းနိုင်ကာလူတစ်ဦးလျှင် ကျပ် (၈၀၀၀) ဝန်းကျင်ခန့် ကျသင့်ကြောင်းသိရသည်။

ကားရထားစီးသူအများစုသည် ကလောမြို့သို့
လာရောက်ကြသည့်ခရီးသွားများအပြင် တောင်ကြီး -အောင်ပန်း -ကလောမှ ဒေသခံတစ်ချို့လည်း စီးနင်းမှုများလည်းရှိကြောင်းသိရသည်။

“စီးတဲ့ခရီးသွားတွေကတော့ အများစုက ဓာတ်ပုံရိုက်ကြတာ။ရှုခင်းအရမ်းလှတယ်လေ။ ဗျိုက်တောင်နားမှာ ဓာတ်ပုံရိုက်လို့ရအောင်( ၁၅ )မိနစ်ခန့် ရပ်ပေးတယ်။ ပြီးတော့ မြင်းဒိုက်နားက ကျောက်ဂူလေးမှာလည်းရပ်ပေးပါတယ် “ဟု ကလောရုံံပိုင်ကြီးက Travelling သို့ ပြောသည်။

ထို့ပြင် ကလောမြို့သို့ လာရောက်လည်ပတ်သည့် ဧည့်သည်များအတွက် ရထားစီးလည်ပတ်နိုင်ရန် ရေနွေးငွေ့ စက်ခေါင်းနှင့်တွဲဆိုင်းများ ကလောဘူတာသို့ ထပ်မံရောက်ရှိလာပြီး လက်ရှိ၌အောင်ပန်းတွင်ထားရှိကာ အဆင့်မြှင့်ပြင်ဆင်နေကြောင်း သိရသည်။

Travelling Journal

News

Photo Tin Soe Aung (Kalaw)

#Travelling Journal

Page အတုများဖြင့် လိမ်လည်ရောင်းချမှုများရှိနေခြင်းကြောင့် Online မှ လေယာဥ်လက်မှတ်ဝယ်မည့် ခရီးသွားများအနေဖြင့် အထူးဂရုပြုသင့်ဟု ခရီးသွားကုမ္ပဏီတချို့က တိုက်တွန်းပြောကြားထားကြောင်းသိရသည်။

” လူလိမ် Page တွေ အရမ်းများနေလို့ ။ကျွန်တော်တို့ဆီကို လာလာပြီး ပြောတာ သုံးလေးကြိမ်ရှိတယ်။
အထူးသတိထားစေချင်ပါတယ်။ ပေါက်စျေးထက်ငါးသောင်းကျော် ခြောက်သောင်းကွာရင် သတိ
ပြုသင့်ပါတယ်”ဟု ရန်ကုန်အခြေစိုက် ပြည်တွင်းပြည်ပ လေယာဥ်လက်မှတ်ရောင်းချပေးသည့် Than Than Travel မှ တာဝန်ရှိသူက Travelling သို့ပြောသည်။

လက်ရှိတွင် အွန်လိုင်းပေါ်၌ အလွယ်တကူပေ့ချ်(Page)များ ဖွင့်လှစ်ပြီး လေယာဥ်လက်မှတ်များ နှင့်ခရီးစဥ်များကို ပုံမှန်စျေးထက်စျေးသက်သာပြီး ရောင်းချနေခြင်းကြောင့် ယခုလိုမျိုး ဖြစ်စဥ်များ များပြားလာခဲ့ကြောင်း လက်မှတ်ဝယ်ယူခဲ့ဖူးသည့်ခရီးသွားပြည်သူတစ်ဦးကလည်း Travelling သို့ပြောသည်။

“ကျွန်တော် AirTicket ဝယ်မယ်ပေါ့။ အမြဲအားပေးနေတဲ့ Agent က စျေးများတယ်လို့ ခံစားမိလို့ ဒါနဲ့ လွန်ခဲ့တဲ့ ၁၀ နှစ်ကျော်က ဆက်ဆံဖူးတဲ့ (ရွှေလူငယ်)ကို ခေါ်တော့ Return Ticket( ၅)သိန်းခွဲတဲ့။ ခုနက Agent ထက် (၁၄၀၀၀၀) ပိုသက်သာတယ်။ ပျော်သွားတယ် ဝယ်မယ်ပေါ့။ လိပ်စာက အရင်အောင်မဂ်လာ အဝေးပြေးဂိတ်မှာ မဟုတ်တော့ဘဲ International Airport Terminal အပေါ်ထပ်မှာတဲ့။ အိမ်နဲ့မဝေးတော့ ပိုက်ဆံပေးပြီး လက်မှတ်တခါတည်း လာယူမယ်ပြောတော့
အထဲကို ဝင်မရဘူးလို့ ပြောတယ်။ အမျိုးသမီးက ငွေလွှဲဖို့ အကုန်ပြင်ပြီးသား။ ဒါဆိုလည်း လေဆိပ်မှာ သူငယ်ချင်း Chief Engineer ရှိတယ်။ မင်းတို့
ရုံးကို လွှတ်လိုက်မယ်။ သူနဲ့ရှင်းလိုက် ပြောတော့ ရုံးပိတ်ခါနီး လာလို့မရဘူးတဲ့။ ငွေတဝက်လွှဲရင် Return Ticket ထုတ်ပေးမယ်။ ကျန်တာနောက်မှ လွှဲပါတဲ့။ ကိုယ်လည်း မနက်ဖြန်မှ ဆက်လုပ်မယ် ပြောလိုက်တယ်။ ၅ သောင်းဘဲ လွှဲပေးပါ။ ကျန်တာ အဆင်ပြေအောင် လုပ်ပေးထားမယ်။ မနက်ဖြန် လက်မှတ်ယူပြီး လက်ကျန်ငွေရှင်းပါတဲ့။ သံသယက တ​ဖြည်းဖြည်း မြင့်လာပြီ။ ပို့ထားတဲ့ ကိုယ့် PP Photo ကိုလည်း Delete ပြန်လုပ်လိုက်တယ်။ အိမ်မှာ ရွှေလူငယ် Visiting Card ပြန်ရှာတယ်… စနစ်တကျ သိမ်းထားတော့ ချက်ခြင်းတွေ့တယ်။ Page ထဲက ဖုန်းနဲ့မတူဘူး။ လိပ်စာလည်း အောင်မဂ်လာမှာပဲ။ ရွှေလူငယ်ကို ရောက်တော့
သူတို့နာမည်တင်မက၊တခြား Tour Agent နာမည််တူတွေနဲ့ဗြောင်ပတ်လိမ်စားနေတဲ့သူ တပုံကြီးတဲ့ဗျာ” ဟု လတ်မှတ်ဝယ်ယူခဲ့ဖူးသည့် ခရီးသွားပြည်သူတစ်ဦးက Travelling သို့ ပြောသည်။

ပုံမှန်စျေးထက်ပိုသက်သာနေပါက သတိပြုရမည်ဖြစ်ပြီး စိတ်ချယုံကြည်ရသည့်ခရီးသွားကုမ္ပဏီများထံမှ ဝယ်ယူသင့်ကြောင်း Than Than Travel မှ သူ၏ လူမှုကွန်ရက်စာမျက်နှာတွင်လည်း ရေးသားဖော်ပြထားသည်။

ထို့ပြင် ခရီးသွားများအနေဖြင့် မိမိနှင့်ဆက်သွယ်ပြောသည့် ပေ့ချ်ကိုလေ့လာပြီး အသုံးပြုထားသည့် လိပ်စာ၊ဖုန်းနံပါတ်များကို သေချာစစ်ဆေးရန်လိုကြောင်းနှင့် ချက်ချင်းငွေလွှဲပြီး အယုံမလွယ်ရန် ဂရုပြုဆောင်ရွက်သင့်ကြောင်း ခရီးသွားကုမ္ပဏီတစ်ချို့က အကြံပြုပြောကြားထားကြောင်းသိရသည်။

#TravellingJournal

#News

ပုံ-စာ Pageအတုတစ်ခုနှင့်လက်မှတ်ဝယ်သူကြားဆက်သွယ်ထားတဲ့ Chat list တစ်ခုကိုတွေရစဥ်

#Travelling Journal

ပြည်တွင်းပြည်ပ ခရီးသွားဧည့်သည်အများဆုံးသွားရောက်လည်ပတ်ကြသည့် ရှမ်းပြည်နယ်တောင်ပိုင်း၏ Trekking မြို့တော်ဟု တင်စားရသည့် ကလောမြို့သို့ ယခုနှစ် ဇန်နဝါရီလ မှ မေလ ၉ ရက်အထိ ပြည်တွင်း/ပ ခရီးသွားဧည့်သည်ဦးရေ (၃၁၉၇၂ ) သာ လာရောက်လည်ပတ်ခဲ့ကြောင်း ဟိုတယ် နှင့်ခရီးသွားလာရေးညွှန်ကြားမှုဦးစီးဌာန (တောင်ကြီးရုံးခွဲ)စာရင်းအရ သိရသည်။

ခရီးသွားဧည့်သည်များ အနေဖြင့် ဟိုတယ်၊ မိုတယ်၊ Home Stay နှင့်Camp များ ဖြင့် စိတ်တိုင်းကျ ရွေးချယ်တည်းခိုနိုင်သည့် အားသာချက်များရှိသော်လည်း ကလောရေကြီးမှုဖြစ်ပွားပြီးနောက်ပိုင်း ကလောမြို့သို့ ဧည့်သည်ဝင်ရောက်မှုမှာ အလွန်နည်းသွားကြောင်း ကလောအခြေစိုက် ဟိုတယ်လုပ်ငန်းရှင်တစ်ဦးက Travelling သို့ ပြောသည်။

“ကလောမှ မဟုတ်ဘူး။ ​ကလော -တောင်ကြီး-အင်းလေး -ရွာငံ -ပင်းတယ အဲဒီခရီးစဥ်တွေလည်း
ဧည့်သည်နည်းပါးတယ် “ဟု တောင်ကြီးအခြေစိုက်ဟိုတယ်လုပ်ငန်းရှင်တစ်ဦးက Travelling သို့ပြောသည်။

ဟိုတယ်နှင့်ခရီးသွားလာမှုညွှန်ကြားမှူဦးဌာန၏ စာရင်းအရ ၂၀၂၅ခုနှစ် ဇန်နဝါရီလ တွင် ပြည်တွင်း( ၉၄၇၄ )ဦးနှင့် ပြည်ပ(၁၁၁ )ဦး စုစုပေါင်း ( ၉၅၈၅ )ဦး၊ ဖေဖော်ဝါရီလတွင် ပြည်တွင်း (၆၀၀၂ )ဦးနှင့် ပြည်ပ (၄၅)ဦး စုစုပေါင်း (၆၀၄၇)ဦး၊မတ်လ တွင် ပြည်တွင်း (၇၁၉၂)ဦး နှင့်ပြည်ပ (၆၉ )ဦး စုစုပေါင်း (၇၂၆၁)ဦး ၊
ဧပြီလတွင်ပြည်တွင်း (၆၁၃၀ )ဦး နှင့်ပြည်ပ( ၅၀)ဦး စုစုပေါင်း (၆၁၈၀)ဦး နှင့်မေလ ၉ ရက်နေ့ထိ ပြည်တွင်း (၂၈၆၆) ဦးနှင့်ပြည်ပ (၃၃) ဦး ဝင်ရောက်လည်ပတ်ခဲ့ကြောင်းသိရသည်။

ကလောမြို့၏ အထင်ကရ လည်ပတ်စရာများစွာ
ရှိသော်လည်း ရှန်ဘာလာ View Point ၊City View၊
သိမ်တောင်၊ ရေယောင်းမ View Piont များ၊ Hill top Villa၊မနောလှ၊ Kalaw View point၊Kalaw Cafeyard၊အိုးစည်တောင်၊ဗျိုက်တောင်၊ပင်းဒယ၊ရွာငံအသွားလမ်း၊မြင်းမူကုန်းနှင့် အလွမ်းတောင် စသည့်နေရာများကိုသာ ပြည်တွင်းခရီးသွားဧည့်သည်များ အများဆုံးသွားရောက်လည်ပတ်ကြောင်း သိရသည်။

လက်ရှိကလောမြို့တွင် ဟိုတယ်နှင့်ခရီးသွားလိုင်စင်ရယူထားပြီး လုပ်ကိုင်ဆောင်ရွက်နေသည့် ဟိုတယ်(၆၇) လုံးသာရှိကြောင်း ဟိုတယ်နှင့်ခရီးသွားလာရေးညွှန်ကြားမှုဦးစီးဌာန (တောင်ကြီး )မှ သိရသည်။

#Travelling Journal

#News

#Photo Kalaw Travelling /Tin Soe Aung

#TravellingJournal

အင်းဝရှေးဟောင်းဘုရား ရာကျော်ပျက်စီးမှုများ ရှင်းလင်းရေးတွင် ရှေး/သု အပြင် ပရဟိတဆရာတော်အဖွဲ့ တစ်ဖွဲ့ကသာ ရှင်းလင်းဆောင်ရွက်ပေးနေကြောင်း ရှေးဟောင်းဘုရားများသန့်ရှင်းရေးအဖွဲ့(ရန်ကုန်) မှ နာယကဆရာတော်ဦးပညာသာရ က Travelling သို့ မိန့်ကြားသည်။

” သစ္စာတိုက်ဘုရား၊ ဆုထူးပန်ဘုရား၊ ခဲသင်းဘုရားစု ၊ မဟာမြတ်မုနိဘုရား၊ စန္ဒာမုနိဘုရားကြီးနဲ့ တောင်ပေါ်သာကျောင်းဝင်းထဲက ရှေးဟောင်းဘုရားနှစ်ဆူ တို့ကို သန့်ရှင်းရေးပြီးပြီ။ အခုလက်ရှိကတော့ ဒေါ်ဂျမ်းဘုရားစုကို သန့်ရှင်းရေးဝင်လုပ်နေတာ နှစ်ရက်ရှိပါပြီ။ ဘုန်းဘုန်း ကတော့ ရှေးဟောင်းဘုရားတွေကို သန့်ရှင်းရေးလုပ်ပေးရတာကို ဝါသနာပါတာ။လေးလပိုင်းပထမပတ်ကတည်းက အင်းဝကို ရောက်နေပြီး ကူညီတာပေါ့။ ပျက်တဲ့ဘုရားတွေကတော့အများကြီးပေါ့။ နိုင်တဲ့ဝန်ကို တစ်ဖက်တစ်လမ်းကနေ ကူညီပေးနေတာ။ အခက်အခဲကတော့ နဝကမ္မ လိုတာပေါ့။ နဝကမ္မရှိရင် ပြည့်စုံပါတယ်” ဟု ရှေးဟောင်းဘုရားများသန့်ရှင်းရေးအဖွဲ့(ရန်ကုန်) မှ နာယက ဆရာတော် ဦးပညာသာရ က Travelling သို့ မိန့်ကြားသည်။

နိုင်ငံခြားသားခရီးသွားအများစုမဖြစ်မနေ သွားရောက် လည်ပတ်ကြသည့် အင်းဝ​မြို့ဟောင်းတွင် စေတီပုထိုး ကိုးရာ ကျော်ရှိသည့်အနက်(၆၀၀) ကျော် ပျက်စီးခဲ့ရပြီး လက်ရှိတွင် ရှေးဟောင်းသုတေသနနှင့်အမျိုးသားပြတိုက်ဦးစီးဌာနမှ အင်ဂျင်နီယာများနှင့် သုတေသနသမားများမှလည်း ကွင်းဆင်းနေကြောင်း ယင်း ဌာနမှ တာဝန်ရှိသူတစ်ဦးက ၎င်း၏ လူမှုကွန်ယက်စာမျက်နှာပေါ်တွင် ရေးသားထားသည်ကို တွေ့ရသည်။

မန္တလေးတိုင်းဒေသကြီးအတွင်းရှိ အင်းဝမြို့ဟောင်းသည် စိတ်ဝင်စားဖွယ်လေ့လာစရာ များစွာတည်ရှိပြီး ပြည်တွင်းပြည်ပခရီးသွား ဧည့်သည်များကို ဆွဲဆောင်လျက်ရှိသည့် နာမည်ကျော်ခရီးသွားနေရာတစ်ခု ဖြစ်သလို အင်းဝတွင်နာမည်ကြီးလူသိအများဆုံးဖြစ်သည့် မယ်နုအုတ်ကျောင်းလို့ခေါ်တွင်သည့် “မဟာအောင်မြေဘုံစံ” ကျောင်းတော်ကြီးလည်း ပြိုကျပျက်စီးခဲ့သည်။

#TravellingJournal

#News

#Photo UKyawMyoWin(fb)

ပုံ-စာ ပျက်စီးသွားသည့်အင်းဝရှေးဟောင်းဘုရားတစ်ဆူတွင်ရှင်းလင်းရေးလုပ်နေသည့်မြင်ကွင်းတစ်ချို့ကိုတွေ့ရစဥ်။

#Travelling Journal

ပြီးခဲ့သည့် မတ်လက လှုပ်ခတ်ခဲ့သည့် အင်အားပြင်းငလျင်ကြောင့် မန္တလေးတိုင်းဒေသကြီး အခြေစိုက်ဟိုတယ် (၁၆) လုံး ပြိုကျပျက်စီးခဲ့ပြီး မပြိုကျပဲဒဏ်ဖြစ်ခဲ့သည့် ဟိုတယ်စာရင်းများကို စိစစ်နေကြောင်း မန္တလေးဟိုတယ်ဆိုင်ရာလုပ်ငန်းရှင်များအသင်းဥက္ကဋ္ဌ က Travelling သို့ပြောသည်။

” ပြိုကျတာကတော့ (၁၆) လုံးရှိတယ်။ မပြိုပေမဲ့ အနာရှိသွားတဲ့ ဟိုတယ်အဆောက်အအုံစာရင်းတွေကိုလည်း စိစစ်နေပါတယ်။ မပြီးသေးပါဘူး။(ဟိုတယ်/ခရီး) ကလည်း စစ်ဆေးနေသလို သက်ဆိုင်ရာဟိုတယ်တွေကလည်း သူတို့ဘာသာပြုပြင်နေတာတွေလည်းရှိပါတယ် “ဟု မန္တလေး ဟိုတယ်ဆိုင်ရာလုပ်ငန်းရှင်များအသင်း ဥက္ကဋ္ဌ က Travelling သို့ ပြောသည်။

မတ် ၂၈ ရက် က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင် လှုပ်ခတ်ခဲ့သောကြောင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်နှင့်နေပြည်တော်တို့တွင် ထိခိုက်မှုများဖြစ်ပေါ်ခဲ့ခြင်းဖြစ်သည်။

“ကားကြီးကွင်းနားမှာ ဟိုတယ်အဆောက်အအုံ
လေးလုံး တန်းစီပြီး ဆောက်ထားတာပါ။ (၁) ကတော့ ပထမထပ်ပြိုကျတော့ ငါးထပ်လုံးကို ဖြိုချရမှာပါ။
နောက်တစ်လုံး(၂) ကတော့ (၁၂)ထပ်ဆောက်ဖို့ရည်ရွယ် ထားပေမဲ့ အခုက (၈) ထပ်ဟိုတယ်ပဲဆောက်ထားတာ။ သူက အောက်ခြေခိုင်ခန့်တော့ ဘာမှကြီးကြီးမားမားမထိခိုက်ဘူး။ ဓာတ်လှေခါးရော /မှန်တွေရော မထိခိုက်ဘူး။ အောင်မြင့်မိုရ်တည်းခိုခန်းနဲ့ လူနေအိမ်ကတော့ ပြန်ပြီးစစ်ဆေးရမှာဖြစ်ပါတယ် “ဟု အောင်မြင့်မိုရ်ဟိုတယ်ပိုင်ရှင် က Travelling သို့ ပြောသည်။

ထို့ပြင် အဆိုပါ ဟိုတယ်အဆောက်အအုံများကို ဂျပန်နိုင်ငံ၏ အာမခံလုပ်ငန်းဖြစ်သည့် GGI အာမခံလုပ်ငန်းတွင် အလုံးစုံံအာမခံထားရှိပြီးဂျပန်ကုမ္ပဏီ( GGI) အာမခံဌာနမှ ဂျပန်ကုမ္ပဏီနှင့် ထိုင်းအခြေစိုက် GGI ကုမ္ပဏီ တို့က လာရောက်စစ်ဆေးခဲ့ကြောင်း ၎င်းက Travelling သို့ ပြောသည်။

” မထိတဲ့ ဟိုတယ်တော့မရှိပါဘူး။ နည်းနည်းနှင့် များများသာ ကွဲပြားပါတယ်။ ကျွန်တော်တို့ကတော့
၂၈ ရက်ကတည်းက ဆက်ဖွင့်ထားတာပါ။ဟိုတယ်ရဲ့ Structure Beam အကုန်ကောင်းတော့ရေချိုးခန်းနံရံ အုတ်ရိုးလောက်တော့ ထိပါတယ်”အထပ်မြင့် ဟိုတယ် ပိုင်ရှင် တစ်ဦးကလည်း Travelling သို့ပြောသည်။

#Travelling Journal

#News

#Photo-Social/Internet

ပုံ-စာ ငလျင်ကြောင့်ပြိုကျခဲ့သည့်ဟိုတယ်တစ်လုံးနှင့် မပြိုကျပဲဒဏ်ဖြစ်ခဲ့သည့် ဟိုတယ်တစ်လုံးကိုတွေ့ရစဥ်။