Travelling journal

လက်ရှိ အတိုင်းသွားနေသည့် ခရီးသွား လုပ်ငန်းကို ပိုပြီးတိုးတက်အောင်မြင်လာစေလိုပါက ခရီးသွား စီးပွားရေးပုံစံသစ်ကို ပြောင်းလဲလုပ်ကိုင်သင့်ရန် လိုအပ်သည်ဟု မြန်မာနိုင်ငံ ခရီးသွားလုပ်ငန်း အဖွဲ့ချုပ်မှ ဒုဥက္ကဋ္ဌ ဒေါ်မေမြတ်မွန်ဝင်းက Travelling journal သို့ ပြောသည်။

ခရီးသွားစီးပွားရေးပုံစံမျိုးကို ထည့်သွင်း​စဉ်းစားပေးရမည်ဖြစ်သလို တစ်ဖက်တွင် သဘာဝတရား မပျက်စီး စေခြင်းနှင့် ယဥ်ကျေးမှု ကိုလည်း မပျက်စီးအောင် ထိန်းသိမ်း လုပ်ဆောင်နိုင်မှသာ ရေရှည်အောင်မြင်မည့် ခရီးသွား လုပ်ငန်းဖြစ်လာမည်ဟု ဒေါ်မေမြတ်မွန်ဝင်းက သုံးသပ် ပြော ကြားသည်။

“ခရီးသွားလုပ်ငန်းအတွက် အကောင်းဆုံးက Story Telling ကုန်ကြမ်းတွေပါ။ အကြောင်း ကြောင်းကြောင့်
ဒီနေ့ထိ Tourism Product တခု ဖြစ်မလာခဲ့ဘူး။ မြို့နယ်အလိုက် တိုင်းနဲ့ ပြည်နယ်အလိုက် ခရီးသွားစီးပွားအတွက် အလားအလာတွေကို အုပ်ချုပ်သူတွေရော ပြည်သူတွေပါ နားလည်လာတဲ့တနေ့ မြန်မာ့နိုင်ငံရဲ့ အဓိက ဝင်ငွေဟာ ခရီးသွားကနေ ရှာနိုင်လာပါလိမ့်မယ်။ ဆန် တစ်တန် စိုက်ပြီးရောင်းမှ ဒေါ်လာ ၃၀၀ ရတာပါ။ မန္တလေးမှာ ခရီးသွားဧည့်သည်တယောက်ကို နှစ်ည အိပ်ခိုင်းနိုင်ရင် အဲဒီ ဆန်တစ်တန် ဖိုး ဝင်ငွေ ရပါပြီ”ဟု ဂျပန်ခရီးသွား စျေးကွက်ကို လုပ်ဆောင်နေသည့်VIVO Myanmar DMC ကုမ္ပဏီ မှ CEOဖြစ်သူဦးရဲထွန်းဦးက ပြောသည်။

လက်ရှိ တွင် ဟိုတယ်နှင့်ခရီးသွားလာရေးဝန်ကြီးဌာန မှ လည်း သက်ဆိုင်ရာဒေသအလိုက် ခရီးစဥ် သစ်များ ဖော်ဆောင်ရေးနှင့် ခရီးသွားများဝင်ရောက်မှု ပိုမိုတိုးတက်လာစေရန် DMOအဖွဲ့အစည်းများကို ဖွဲ့စည်းထားနေပြီးဖြစ်ကြောင်းသိရသည်။

ထို့​ပြင် ဟိုတယ် နှင့်ခရီးသွားလာရေးဝန်ကြီးဌာနအနေဖြင့် ကျေးလက်ဒေသများဖွံ့ဖြိုးတိုးတတ်လာစေရန် CBT ကျေးရွာ များကို ပြည်နယ်နှင့်တိုင်းအသီးသီးတွင် အကောင် အထည်ဖော်ဆောင် ထားသော်လည်း ခရီးသွားဧည့်သည်ဝင်ရောက်မှု နည်းပါးသည့် CBT ကျေးရွာ များ ရှိနေသေးကြောင်း စုံစမ်း သိရသည်။

လက်ရှိတွင် ခရီးသွားကုမ္ပဏီ အများစုမှာ ရှိပြီးသားခရီးစဥ်များကိုသာ ရောင်းချနေဆဲအနေအထားများသာရှိနေပြီး ခရီးသွား အကြိုက် ခရီးစဥ် Package များကို အသစ်ဖန်တီးရန် လိုနေကြောင်း သိရသည်။

“တိုးရစ်တွေတော့ သွားနေတယ်။လမ်းမှာ သူ့တို့အိတ်ထဲက ပိုက်ဆံမသုံးနိုင်ဘူးဖြစ်နေတာတွေ ရှိနေတယ်”ဟု မြန်မာနိုင်ငံခရီးသွားလုပ်ငန်းအဖွဲ့ချုပ်မှ ဒုဥက္ကဋ္ဌ မေမြတ်မွန်ဝင်း က ဆိုသည်။

ကမ္ဘာ့ခရီးသွားလုပ်ငန်းအဖွဲ့ချုပ်၏ စာရင်းဇယား အရ ၂ဝ၂ဝပြည့်နှစ်၏ ပထမနှစ်ဝက်ကာလတွင် နိုင်ငံတကာခရီးသည် ဝင်ရောက်မှုမှာ သန်း (၄၄ဝ) ရာခိုင်နှုန်းအားဖြင့် (၆၅) ရာခိုင်နှုန်း ကျဆင်းခဲ့ပြီး ဝင်ငွေအနေဖြင့် အမေရိကန် ဒေါ်လာ ၄၆ဝ ဘီလီယံ ဆုံးရှုံးခဲ့သည့်အတွက် အလုပ်အကိုင် ဆုံးရှုံးမှုများနှင့် ထိခိုက်မှုအများဆုံး ကဏ္ဍထဲတွင် ပါဝင်ခဲ့ကြောင်း ထုတ်ပြန်ထားပြီးဖြစ်သည်။

Photo Travelling journal

Travelling journal

ဒုတိယကမ္ဘာစစ် ကာလအတွင်းက ကျန်ရှိနေခဲ့သည့်မျိူးနွယ်စု အဖြစ် ယူဆထားခြင်း ခံရသည့် လူပုမျိုးနွယ် မိသားစု တစ်စု မှာ ကျိုင်းတုံ မြို့ ​လွယ်ပီကော်လာတောင် ပတ်ဝန်း ကျင်တွင် နေထိုင်ကြောင်း သိရှိလာခဲ့ရသည်ဟု ရွှေတြိဂံဟိုတယ်ဇုန်မှ အဖွဲ့ဝင် ဦးမျိုးမြင့်လွင် က Travelling Journal သို့ ပြောသည်။

နိုဝင်ဘာ ၁၃ ရက်နေ့က နားပေါ်ရွာ ဘက်သို့ ဒေသဖွံ့ဖြိုးရေးအတွက် လွှတ်တော်အမတ် ဒေါက်တာ ဝဏ္ဍစိုး နှင့် လိုက်ပါ သွားရောက်ခဲ့ရာမှ ဒေသခံများ၏ ပြောဆို ပြောပြချက်များကို ကြားသိ လာခဲ့ရခြင်းဖြစ်ကြောင်း ဦးမျိုးမြင့်လွင် က ရှင်းပြသည်။

’’ အခုက အနီးစပ်ဆုံးနေရာကိုပဲ ရောက်ခဲ့တာပါ။ ဒေသခံတွေရဲ့ ပြောကြားချက်အရ အဝတ်အစားမဝတ်ပဲ ဌက်ပျောရွက် သာပတ်ပြီး နေထိုင်ကြတယ်လို့သိရတယ်။ သူတို့က ဆား လာသုံးဆောင်ကြတယ်။ ပြေးလွှား သွားတာက အရမ်းမြန်တယ်။ မိန်းမနဲ့ကလေးတွေကို ဂူထဲမှာ ဖွက်ထားကြတယ်။ မီးမသုံးဘူး၊ မီးသုံး လိုက်ရင် လူကောင်းတွေက ခြေရာခံတာ လွယ်သွားမှာစိုးလို့ ၊ ပြီးခဲ့တဲ့ သုံးရက်လောက်က တောနင်းပြီး လမ်းတွေကြည့်တဲ့အခါ လမ်းတွေစစ်ရင်း ဒီဘက်ဒေသ ရွာတွေက သတင်းပို့ ပေးတာဖြစ်ပါတယ်’’ဟု ဦးမျိုးမြင့်လွင် က ပြောသည်။

ရှေ့မီနောက်မီ လူကြီးများပြောကြားချက်အရ ရှမ်းစကားနှင့် နီးသည့်အတွက် စကားပြောဆို ကြောင်း၊ ဒုတိယ ကမ္ဘာစစ်အတွင်းက အိမ်မပြန်တတ်တော့ပဲ စစ်ရှောင်ပြီး ရောက်လာခဲ့ကြသည်ဟု ခန့်မှန်းထားကြောင်း သိရသည်။

“လောလောဆယ်ပြီးခဲ့တဲ့ ရက်ကတော့ အဲဒီရွာကလူတွေနဲ့ ဆက်သွယ်ကြည့်တာတော့ မိသားစုက တစ်စုပဲ ကျန်တော့တယ်။ သေကုန်ကြပြီ။ ဘာမျိုးနွယ်မှန်းတော့ မသိရသေးဘူး၊သူတို့နဲ့ထိစပ်ခဲ့တဲ့ ရွာသူရွာသားတွေက ၁၉ရက်နေ့ကျရင် လူကြီး ပိုင်းတွေ ကျိုင်းတုံကို လာမှာလို့ ပြောတယ်”ဟု ဦးမျိုးမြင့်လွင် က ပြောပြသည်။

အဆိုပါ လူပုမျိုးနွယ်စုနှင့်လားဟူရှီးဒေသခံများနှင့် တွေ့ကြလေ့ရှိပြီး လားဟူရှီးစကားဖြင့်သာပြောဆိုကြလေ့ရှိသည်ဟု သိရသည်။ ယင်း လားဟူးရှီးရွာများဆီသို့သွားရောက်မည်ဆိုပါကလမ်းခရီးတွင် သုံးလေးရက် အချိန်ပေးပြီးမှ ရောက်ရှိကြောင်း သိရသည်။

” ရှမ်းစကားနဲ့လည်းမရဘူး။ လားဟူစကားနဲ့မှ မေးရတာ။ သူတို့ပြောတာကတော့ အရပ် လေးပေ လောက်တော့ရှိတယ်ပြောတယ်။ မီးလည်းမသုံးဘူး။ အသားစိမ်းတွေ စားတာဆိုတော့ ကိုယ့်ကို အန္တရာယ်ပြုနိုင်မလား။ ဒါလည်းစိုးရိမ်ရသေးတယ်”ဟု ၄င်းက ဆိုသည်။

လားဟူးရှီးလူမျိုးများသည် ပေ ၄၀၀၀ အထက် တောင်တန်းများတွင် နေထိုင်ကြပြီး ပေ၄၀၀၀ အောက်တွင် အာခါလူမျိုးများနေထိုင်ကြောင်းသိရသည်။

“နှစ်သစ်ကူးဆို သူတို့လာတက်တယ်ပြောတယ်။ ကျိုင်းတုံ မိုင်းဆက် လမ်းဘေးကနေသွားရတာပါ။ ကျွန်တော်တို့မမြင်ဖူးသေးဘူး၊ ဒေသခံတွေပြောတာကိုကြားခဲ့ရတာပါ’’ဟု ကျိုင်းတုံခရိုင် အုပ်ချုပ်ရေးမှုး ဦးဝင်းမင်းသိန်း က Travelling သို့ပြောသည်။

အဆိုပါ လူပုမျိုးနွယ်စုမှာ ပုံခေတ်ပုံပြည့် နှင့် လွယ်ပီကော်လာတောင် အနီးပတ်ဝန်းကျင် ပေပေါင်း ၇၀၀၀ ကျော်တောင်တန်းများတွင်နေထိုင်ကြကြောင်းသိရသည်။

ယင်းမျိုးနွယ်စုမှာ လက်ရှိတွင် ဂူထဲတွင် နေထိုင်ကြပြီး ဒေသခံရွာသားများမှ ယင်းတို့နေသည့် ဂူကို မုဆိုးနှင့် မှတ်ထားသားကြောင်း သိရသည်။

“ဒီလကုန်ပိုင်းထပ်သွားဖို့လုပ်ထားတယ်။ ကားကိုရသလောက်မောင်းပြီး ဟိုဘက်ကို ခြေလျှင်တက်ရမှာဖြစ်တယ်။ သူတို့ကို ဒီတိုင်းတွေ့ရဖို့ဆိုတာက အရမ်းခက်ခဲတယ်။ ဒေသခံ မုဆိုးတွေကို မေးကြည့်တော့ သူတို့ နေထိုင်မကောင်းဖြစ်ရင် ကုတဲ့ ဆရာမ တစ်ယောက်ရှိတယ် ပြောတယ်။ အဲဒီဆရာမ ထွက်ပြလိုက်ရင်တော့ ထွက်ပြတယ်လို့ ဆိုကြတယ်။ အဲဒီ ဆရာမက နားပေါ်ရွာနားမှာ နေတယ်လို့ ​ပြောတယ် “ဟု ဦးမျိုးမြင့်လွင်က Travelling journal ကို ပြောသည်။

Photo Ye Myint Aung

Travelling journal

ထူးဆန်းသော ကျောက်ရေကန် တည်ရှိသည့် တုရင်း တောင် ပတ်ဝန်းကျင်ဒေသကို ခရီးစဥ်သစ်ဖော်ဆောင်ရန် ဟိုတယ်နှင့် ခရီးသွားညွှန်ကြားမှူ ဦးစီးဌာန မှ စီစဥ်နေကြောင်း ပုဂံရုံးခွဲတာဝန်ခံ ဒုတိယညွှန်ကြားရေးမှူး
ဦးဝင်းအောင်က Travelling journal သို့ပြောသည်။

အဆိုပါ ကျောက်ရေကန်မှာ တုရင်းတောင်၏ အရှေ့ဘက်တွင် တည်ရှိပြီးပုဂံမြို့မှ ကား​ဖြင့် လာရောက်မည်ဆိုပါက မိနစ်၂၀ခန့်ကြာမြှင့်ပြီး ထိုမှတဆင့် ၁၅မိနစ်ခန့် လမ်းလျှောက်မည်ဆိုပါက ကျောက်ရေကန်ကို ရောက်ရှိမည်ဖြစ်ကြောင်း သိရသည်။

“ကျောက်ရေကန် ကနေ ကြည့်လိုက်ရင် ဧရာဝတီ မြစ်အလှနဲ့ ပုဂံမြို့ကို စီးပြီးကြည့်နိုင်လို့ရတယ်။ ဒီကျောက်ရေကန်ကနေ ဆက်တက်ရင် အပေါ် မှာ ဘုရား နှစ်ဆူ ကို ထပ် လေ့လာလို့ရသေးတယ်”ဟု ဦးဝင်းအောင်က Travelling journal ကို ပြောသည်။

လက်ရှိတွင် အဆိုပါနေရာသို့ ရန်ကုန်မြို့မှ ပြည်တွင်းခရီးသွား များလာရောက်လေ့လာပြီး ဓာတ်ပုံများ ရိုက်ကူးကာ လူမှုကွန်ယက်စာမျက်နှာများပေါ်သို့ တင်ခြင်းကြောင့် ပြည်တွင်းခရီးသွား ကြားများတွင် ပေါ်ပြူလာဖြစ် လာခဲ့သည့်နေရာတစ်ခု ဖြစ်ခဲ့ကြောင်းသိရသည်။

ယင်း ကျောက်ရေကန်သည် အလျား ၈၀’ အနံ ၈၀’ အနက် ၃၀’ ခန့် ရှိပြီး အလွန်ထူးခြားလှသည့် ရေကန်တစ်ခု ဖြစ်ကြောင်း သိရသည်။ ပါးစပ်ရာဇဝင်များအရအနော်ရထာ မင်းလက်ထက်က ရေကန်တွင် အလုပ်လုပ်သူများ နားနေကြသည့် နေရာဟုလည်း ဆို ကြောင်းသိရသည်။ ကျောက်ရေကန် အတွင်းတွင် ဝင်္ကပါပုံစံ ၊
နဂါးရုံ ပုံ၊ ဇာမဏီငှက်ပုံ စသည်တို့ကိုထွင်းထုထားသည့်လက်ရာများကို တွေ့မြင်နိုင်ကြောင်း သိရသည်။

Photo DHT Bagan

#Travelling journal

မြန်မာနိုင်ငံ၏ ပထမဆုံး ကျွန်းပေါ်အခြေပြု CBT ကိုဒုံးကျွန်းပေါ်တွင် ဖော်ဆောင်နေကြောင်း တနသ်ာရီတိုင်းဒေသကြီး ဟိုတယ် /ခရီး တိုင်းတာဝန်ခံ ဦးညိုအေးက Travelling journal သို့ ပြောသည်။

“တိုင်းအစိုးရ က ကျပ်သိန်း၁၀၀ ရယ်။မြိတ်ခရိုင်ခရီးသွားလုပ်ငန်းရှင်များအသင်းက ကျပ်သိန်း ၁၃၀ လောက်
မတည် ထည့်ဝင်ပြီး ဒီ CBTကို ဖော်ဆောင်ပေးတာပါ။ ကျန်တာကိုတော့ ကျေးရွာက လူတွေနဲ့ခရီးသွားအသင်း ညှိနှိုင်းချိတ်ဆက်ပြီး ဆက်လုပ်သွားကြမှာပါ။ ကျေးရွာ အပိုင်ထားခဲ့မှာ ပါ။ တခြား CBT တွေလို သုံးနှစ်ကာလမှာ ရင်းနှီးမြှုပ်နှံတဲ့သူကို ပြန်ပြီး ငွေပမာဏတစ်ခုပေးရတာမျိုးရှိတယ်။ ကျွန်တော်တို့ က တော့ စလုပ်ကတည်းက ခရီးသွားကုမ္ပဏီ ဘက် ကနေ ဧည့်သည်ပို့ပေးမယ်။ရလာတဲ့အကျိုးအမြတ်ကို သူတို့ယူ။ ထပ်ပြီးတိုးချဲ့တာရှိရင် သူတို့လုပ်။ ဝန်ဆောင်မှု ပိုင်းကိုတော့သင်တန်းမျိုးစုံပေးနိုင်အောင် ကျွန်တော်တို့က သင်တန်းပို့ချပေးပြီးပါပြီ။ တနေ့ကမှ ကျွန်းက​နေ ပြန်လာတာပါ။ ကျွန်းပေါ် ပထမဆုံး CBT ဆိုတော့ အောင်မြင် ဖို့အလားအလာက အားကောင်းလာမယ်လို့ ယုံကြည်ပါတယ်”ဟု ဦးညိုအေးက Travelling journal ကို ပြောသည်။

တနသ်ာရီတိုင်းဒေသကြီး မြိတ်ခရိုင် ကျွန်းစုမြို့နယ်အတွင်း ဒုံးကျွန်း ပေါ်တွင် ဆလုံလူမျိုးအများစု နေထိုင်ကြသည့် ဒုံးညောင်မှိုင်း‌ကျေးရွာကို ရပ်ရွာလူထု အခြေပြု ခရီးသွားလုပ်ငန်း(CBT)ကျေးရွာအဖြစ် ဖော်ဆောင်ထားပြီး ပင် လယ်ပြင်အတွင်း ပြည်တွင်း၊ပြည်ပ ခရီးသည်များ ညအိပ်ခွင့်ရရှိမည့် ကျွန်းပေါ်CBT ဖြစ်လာမည်ဖြစ်သည်။

“ဘိတ်က​နေ ၄၈ မိုင်ခန့်ကွာဝေးပါတယ်။ Speed Boat နဲ့ ဆိုရင် နှစ်နာရီခန့်သွားရပါတယ်။ ဒီရွာလေးရဲ့ပတ်လည်အနီးတဝိုက်မှာ မြိတ်ခရိုင်ရဲ့ အဓိကပင်လယ်ပြင်ခရီးစဉ်တွေဖြစ်တဲ့ စမတ်ကျွန်း(ပါပန့်ကျွန်း)၊လေးကျွန်း၊ဘေလီကျွန်း၊နှစ်ဖက်လှကျွန်း၊နတ်သမီးရေတွင်းကျွန်း စတဲ့ကျွန်းတွေရှိပါတယ်။ အချိန်တိုတွင်း ဒုံးကျွန်းကနေ သွားရောက်နိုင်ပါတယ်”ဟု ကွင်းဆင်းလေ့လာခဲ့သည့် ဟိုတယ်နှင့်ခရီးသွားညွန်ကြားမှုဦးစီးဌာန (ထားဝယ်ရုံးခွဲ)မှ လက်ထောက်ညွှန်ကြားရေးမှုး ဦးလွှမ်းမိုးက Travelling journal ကို ပြောသည်။

ဒုံးညောင်မှိုင်းကျေးရွာတွင် ကရင်၊ဗမာ၊ဆလုံ လူမျိုးများအခြေချနေထိုင်ပြီး လူဦးရေ (၇၃၉ )ဦးနေထိုင်ပြီး ဆလုံလူဦးရေ ၂၀၉ ဦးနေထိုင်သဖြင့် ဆလုံကျေးရွာဟုလည်း ခေါ်ဆိုကြောင်း သိရသည်။

လက်ရှိတွင် ခရီးသည် (၁၆)ဦးတည်း ခိုနေထိုင်နိုင် သည့် အဆောက်အဦး များကို ဆောက်လုပ်လျက်ရှိနေကြောင်း ဒီဇင်ဘာလအတွင်း ဖွင့်လှစ်သွားရန် ရည်ရွယ်ထားပြီးတနသ်ာရီတိုင်းဒေသကြီးအတွင်း CBT ကျေးရွာ သုံးခုကို ဖော်ဆောင်ထားပြီးဖြစ်ကြောင်း သိရသည်။

Photo Hlwann moe

Travelling journal

သီတင်းကျွတ်၊တန်ဆောင်တိုင် နှင့် New Year အတွက် အထူးရည်ရွယ်ပြီး မြန်မာ့ခရီးသွားဘဏ် မှ လက်ဆောင် ငွေသားလက်မှတ် Gift Voucher များ မကြာခင် ထွက်ရှိလာမည်ဖြစ်ကြောင်း အဆိုပါဘဏ်၏ Brand Manager
ဦး စိုင်းဝင်းမင်းဦး က Travelling journal သို့ ပြောသည်။

အဆိုပါ Bank Product ကို လာမည့်ရှေ့တစ်ပတ်အတွင်း ထွက်ရှိရန် စီစဥ်ထားပြီး မြန်မာ့ခရီးသွားဘဏ် မှ အများပြည်သူ လက်လှမ်းမီ သည့် ငွေသား လက်ဆောင်ကဒ် ကျပ် တစ်သောင်း မှ ကျပ် ငါးသောင်းထိ သုံးမျိုးခွဲ ခြားထား ထုတ်ထားပေးကြောင်း သိရသည်။

” Gift Voucher က သုံးမျိုးရှိပါတယ်။ တစ်သောင်း တန် သုံးသောင်းတန် ငါးသောင်းတန် လုပ်ထားပါတယ်။ ကိုယ့်ရဲ့ ချစ်ခင်ရတဲ့ မိတ်ဆွေတွေကို လက်ဆောင်ကဒ်ပေးလို့ရအောင် ရည်ရွယ်ပြီး ထုတ်တာပါ”ဟု ၄င်းက ပြောသည်။

အဆိုပါ Gift Voucher ပေးချင်သည့် Customer များ အနေဖြင့် မြန်မာ့ခရီးသွားဘဏ် တွင် အကောင့် ဖွင့်လှစ်ထားသူဖြစ်ရပြီး Gift Voucher ဖြင့် လဲလှယ်ရယူနိုင်ကြောင်းသိရသည်။ ထို့ပြင် Gift Voucher ရရှိသည့် Customer များအနေဖြင့် မြန်မာ့ခရီးသွားဘဏ် ၏မည်သည့်ဘဏ်ခွဲမဆို လာရောက် ကာ ငွေသားဖြင့် ချက်ချင်း လဲလှယ်ယူနိုင်ကြောင်း ​သိရသည်။

Travelling journal

ဥရောပနိုင်ငံသားများ အများဆုံး လာရောက် လည်ပတ်ကြသည့် သီပေါမြို့တွင်း ပြည်ပခရီးသွား လည်ပတ်ခွင့် ကန့်သတ်ထားသည့် (၁၁) နေရာကို ဖြေလျော့ပေးရန် တင်ပြထားပြီးဖြစ်ကြောင်း ဟိုတယ်နှင့် ခရီးသွားညွှန်ကြားမှု ဦးစီးဌာန (လားရှိုးရုံးခွဲ) ရှမ်းမြောက် ဟိုတယ်/ခရီး တာဝန်ခံ ဦးသက်လင်း က Travelling journal သို့ ပြောသည်။

” ပြည်တွင်း ခရီးသွား ကတော့ ဘယ်နေရာသွားသွား ရတယ်။အခုက ပြည်ပဧည့်သည်တွေ အတွက် ကန့်သတ်ဧရိယာကနေ ဖြေလျော့ပေးဖို့ တရားဝင်ဖြစ်သွားအောင်ပါ။ဥပမာ ချောင်းဆုံနေရာမျိုးပေါ့။ မြို့နဲ့မလှမ်းမကမ်းနေရာတွေကို တင်ထားတယ် “ဟု ၄င်းက ပြောသည်။

ကမ္ဘာလှည့်ခရီးသွားများ လည်ပတ်နိုင်စေရန်အတွက် မြို့ပြင်ခွင့်ပြုချက်တင်ပြတောင်းခံထားသည့်( ၁၁) နေရာမှာ တုံစင့်ဘိုးဘိုးကြီး နတ်နန်း၊ သိမ်တောင် Sun Set ၊နမ့်ဟူးနွဲ့ရေတံခွန်၊ချောင်းဆုံ သဘာဝရှုခင်း(နမ္မတူမြစ်နှင့်နမ္မချောင်း ဆုံပြီး ဒုဌဝတီမြစ် ဖြစ်ပေါ်လာသောနေရာ)၊နမ့်တုတ်ရေတံခွန်၊ ဖာဖိတ်သဘာဝချောင်းရေထွက်၊သဘာဝရေပူ၊ သမိုင်းဝင်ဘော်ကြိုမုဌောစေတီတော်၊Little Bagan ၊လွယ်မုဒ်တောင်၊ စော်ဘွားသင်္ချိုင်း၊ (ရိုးရာ) အိမ်တွင်း မှု (ယပ်တောင်/ဆေးလိပ်လုပ်ငန်း)စသည့် နေရာများသို့ သွားလာလည်ပတ်နိုင်ရန်တင်ပြထားပြီးဖြစ်ကြောင်းသိရသည်။ယင်းတောင်းဆို ထားသည့် နေရာများမှာ သီပေါမြို့မှ အကွာအဝေး ၆ မိုင်ခန့်အတွင်းရှိ နေရာများ ဖြစ်ကြောင်း သိရသည် ။

သီပေါမြို့နယ်အတွင်း နိုင်ငံခြားသားဧည့်သည်များလာရောက်လည်ပတ်ရာတွင် နေထိုင်သည့် ရက် ပိုမိုကြာလာစေရန်နှင့် နယ်မြေဒေသကောင်းမွန်သည့် မြို့နှင့်အနီး တစ်ဝိုက်ရှိ တိုင်းရင်းသားကျေးရွာများသို့ လည်ပတ်ခွင့်ရရှိစေရန် ကန့်သတ်ဧရိယာအဖြစ်မှ ဖြေလျော့ ပေးနိုင်ရန် နှင့် ယင်းကဲ့သို့ ဖြေလျော့ပေးနိုင်ပါက ခရီးသွား ကုမ္ပဏီများကလည်း Package Tour များကို တရားဝင် ရောင်းချနိုင်စေရန် ရည်ရွယ်ခြင်းဖြစ်ကြောင်းသိရသည်။

” ကျွန်မတို့ဆီမှာ လာတည်းတဲ့ နိုင်ငံခြားသားအများစုဆိုရင် လာရင် သီပေါသွားချင်လို့ အဲဒီလို အရင်မေးကြတယ်။သွားလို့ရပြီလား မေးကြလေ့ရှိတယ်”ဟု ရန်ကုန်အခြေစိုက် ဖွင့်လှစ်ထားသည့် ဟိုတယ် တစ်ခု ၏ မန်နေဂျာ တစ်ဦးက Travelling journal သို့ ပြောသည်။

လက်ရှိတွင် သီပေါမြိုသို့ အများစု လာရောက်လည်ပတ်ကြသည့် နေရာများမှာ ဘော်ကြိုဘုရား၊ စောမွန်လှဘုရား၊ရှေးဟောင်းစေတီပုထိုးများ၊ရှေးဟောင်းဘုန်းတော်ကြီးကျောင်းနှင့်နှီးဘုရား(ဒေသအခေါ် Little Bagan)၊ဒုဌဝတီမြစ်အတွင်းလှေစီးခြင်း ၊ချောင်းဆုံအနီးတစ်ဝိုက် လည်ပတ်ခြင်း၊ ဒုဌဝတီမြစ်ကမ်းဘေးရှိ စွန်လုံကျေးရွာအတွင်း လည်ပတ်ခြင်း၊ သီပေါဟော်နန်း၊ သီပေါမြို့မဈေး၊တိမ်တောင်ဘုရား စသည့်နေရာများကိုသွားလာ လည်ပတ်နေကြောင်း ဟိုတယ်နှင့် ခရီးသွားညွှန်ကြားမှု ဦးစီးဌာန (လားရှိုးရုံးခွဲ)၏ စာရင်းအရ သိရသည်။

မကြာမီတွင် သီပေါမြို့၌ အများပြည်သူသန့်စင်ခန်း (Public Toilet) နှင့် သတင်းအချက်အလက်စင်တာ ရုံးကို ပြည်နယ်အစိုးရဘတ်ဂျတ်ဖြင့် တည်ဆောက်သွားမည်ဖြစ်ကြောင်း သိရသည်။

လက်ရှိတွင် သီပေါမြို့သို့ နှစ်စဥ် နိုင်ငံခြားသားဧည့်သည် ဝင်ရောက်မှုမှာ တစ်နှစ်လျှင် လူဦးရေ ၁၅၀၀၀ ဝန်းကျင် လာရောက်လည်ပတ်နေပြီး Tourism City ဖော်ဆောင်မည့်မြို့လည်း ဖြစ်ကြောင်း သိရသည်။

Photo He& She /ရှမ်းမြောက်(ဟိုတယ်/ခရီး)

Travelling journal

ရှမ်းပြည်နယ်အတွင်းရှိ မြို့ကြီး ငါးမြို့ ကို Tourism City အဖြစ် မ​ကြာခင် ပုံဖော် ဆောင် ရွက် သွားမည်ဖြစ် ကြောင်း ရှမ်းပြည်နယ် ဒေသဆိုင်ရာ ခရီးသွားကော်မတီ ဒုဥက္ကဋ္ဌ ဦးစိုးညွန့်လွင် က Travelling journal သို့ ပြောသည်။

အဆိုပါ မြို့ငါးမြို့မှာ ကလော၊ညောင်ရွှေ၊ကျိုင်းတုံ၊သီပေါ၊လားရှိုး စသည့် ငါးမြို့ကို လျာထားကြောင်း
သိရသည်။ ကိုဗစ်ကာလအလွန် ရှမ်းပြည်နယ်အတွင်းခရီးသွား လုပ်ငန်း စနစ်တကျ ပြန်လည်ဖွံ့ဖြိုးလာစေရန်အတွက် ပြည်ထောင်စုဝန်ကြီးဌာနနှင့် ညှိနှိုင်းပြီး ရှမ်းပြည်နယ်နှင့် ကိုက်ညီမည့် Tourism Master Plan ကို ရေးဆွဲထားပြီး ဖြစ်ကြောင်း သိရသည်။

ထို့​​ပြင် အာဆီယံအဆင့် Clean Tourist City Award ဆုများအဖြစ် ကလောမြို့နှင့် တောင်ကြီး မြို့မှ ဆုရရှိခဲ့သလို တောင်ကြီးမြို့မှာ အာဆီယံ နိုင်ငံများထဲတွင် နေထိုင်သင့်သည့် အောင်စီဂျင် ပါဝင်မှု ရာခိုင်နှုန်း အများဆုံးဆု ကို ရရှိခဲ့ ပြီးဖြစ်ကြောင်းသိရ သည်။

” သီပေါမြို့က ကမ္ဘာ့ လှည့်ခရီးသွားတွေကြားမှာ စိတ်ဝင် စားစရာ လည်ပတ်စရာမြို့အဖြစ်နဲ့ဖော်ပြ ထားတာရှိပါတယ်။ သီပေါခရီးစဥ် ကို အနောက်နိုင်ငံသား အထူးသ​ဖြင့် ဥရောပ သားတွေ အကြိုက်တွေ့ကြတဲ့မြို့ပါ”ဟု
ရှမ်းမြောက်ဟိုတယ်ခရီးတာဝန်ခံ ဦးသက်လင်းက Travelling journal သို့ ပြောသည်။

ရှမ်းပြည်နယ်သည် ဧရိယာအကျယ်ဝန်းဆုံးပြည်နယ်တစ်ခုဖြစ်ပြီး မတူကွဲပြား သည့်တိုင်းရင်းသားလူမျိုးစု ၃၃ မျိုး နေထိုင်ကြပြီး ရိုးရာယဉ်ကျေးမှု ၊ဝတ်စားဆင်ယင်မှု၊ ရိုးရာအစားအစာ၊ ရိုးရာပွဲတော်များနှင့် သဘာ၀ တောတောင် ရေမြေရှုခင်းများကြောင့်ပြည်တွင်း ပြည်ပများ၏ စိတ်ဝင်တစား လာရောက် လည်ပတ် နေကြသည့် ပြည်နယ်တစ်ခုဖြစ်ကြောင်း သိရသည်။

” Tourism City တစ်ခု ဖြစ်ဖို့ လိုအပ်မယ်ဆိုရင် ဒေသရဲ့သဘာဝ တရား ယဥ်ကျေးမှု ရိုးရာယဥ်ကျေးမှု အပန်းဖြေစရာတွေ လူနေမှူဘဝတွေ ကိုဖော်ထုတ်တတ်ရမယ် ။ထိမ်းသိမ်းတတ်ရမယ်။ ဒါ့ပြင်လုံခြုံစိတ်ချစွာ သက်​တောင့်သက်သာ အလွယ်တကူသွား​ရောက်နိုင်​စေရမယ်။ နေထိုင်တည်းခို စား​သောက်​ရေး၊ ဆက်သွယ်​ရေး၊ ကျန်းမာ​ရေး၊ ဘဏ်ကိစ္စကစ အဆင်​ပြေ​ချော​မွေ့​စေရမယ်။ပိုပြီးအရေးကြီးတာက အဲဒီဒေသက သူတွေ အားလုံးက friendliness, hospitality စတဲ့အမူအကျင့်​ကောင်း​တွေဖွံ့ဖြိုးရှင်သန်​နေရပါမယ်” ဟု Nature Lovers International မှ Chairman & CEO ဦးအောင်ဒင် က Travelling Journal သို့ ပြောသည်။

လက်ရှိ ရှမ်းပြည်နယ် အစိုးရ ငါးနှစ်သက်တမ်းအတွင်း Clean & Green Citiesမြို့ကြီး (၁၂ )မြို့ကိုလည်း
ဖော်ဆောင်နိုင်ခဲ့ပြီးဖြစ်ကြောင်း သိရသည်။

Photo ko yea aye

Travelling journal

ဧရာဝတီ တိုင်းဒေသကြီးအတွင်း ခရီးသွားစက်ဝန်းကြီး အဖြစ် သွားလာလည်ပတ်နိုင်ရန်အတွက် ထင်ရှားကျော် ကြား သည့် ခရီးစဥ် နေရာဒေသအသစ်( ၁၉၆ )ခုကို တိုင်းအစိုးရ က ဖော်ထုတ် မှတ်တမ်းတင်ထားပြီးဖြစ်ကြောင်း တိုင်းအစိုးရ အဖွဲ့မှ အတွင်းရေးမှူး ဦးသန်းဆွေဝင်းက Travelling journal သို့ ပြောသည်။

အဆိုပါခရီးစဥ်နေရာများရရှိရန်အတွက် တိုင်းအစိုးရ မှ မြို့နယ်အလိုက်ရှိ အုပ်ချုပ်ရေးအဖွဲ့များအား စာရင်းပြုစုကောက်ခံပေးရန် ညွန်ကြားထားခြင်းဖြစ်ကြောင်း သိရသည်။

“ပုဂံလိုတော့ Attraction မဖြစ်သေးဘူး ပေါ့။ အဲဒီလို ဖြစ်ဖို့ကလည်း လူထုကိုဆွဲဆောင်ဖို့ မလွယ်ကူဘူးလေ။ အားသာချက်က ကမ်းခြေအများအပြားရှိတာမို့ အခွင့်အလမ်း အများကြီး ကောင်းမွန်ပါတယ်။ ကျွန်တော် တို့ပြုစုထားတဲ့မှတ်တမ်းစာအုပ်က မကြာခင်ထုတ်ဝေတော့မှာပါ။ဘယ်အစိုးရတက်လာလာ ဒီပြုစုထားတဲ့
ဒါတွေရှိတယ်။ ဆက်ပြီးလုပ်လို့ရနိုင်အောင် မှတ်တမ်းတွေ လုပ်ထားပေးထားပါတယ်”ဟု ဦးသန်းဆွေဝင်း က ပြောသည်။

ပြုစုထားသည့် အဆိုပါနေရာ(၁၉၆ )နေရာအား နှစ်ည အိပ်မှ ငါးညအိပ်အထိ ခရီးသွား များ၏ စိတ်ဝင်စား မှုပေါ် သွားရောက်လည်ပတ်နိုင်စေရန် အလုပ်ရုံဆွေးနွေးပွဲတစ်ခုလုပ်ကာ Package ခရီးစဥ် များ အဖြစ် ဖော်ဆောင်သွားရန် စီစဥ်ထားရှိကြောင်းသိရသည်။

ဧရာဝတီ တိုင်း​ဒေသကြီးအတွင်းရှိ ထင်ရှားကျော်ကြားသည့် လူပုဂ္ဂိုလ်များ ၊ ရဟန်းပုဂ္ဂိုလ်များ၊ထူးခြားသည့်စေတီပုထိုးများ၊ ကမ်းခြေများ နှင့်လှပသည့်ပြကွင်းပြကွက်ကောင်းလှသည့် ဒေသများကို ပြုစုထားခြင်းဖြစ်ကြောင်း သိရသည်။

Travelling journal

ဆေးရုံကြီးများနှင့် ဆေးရုံများတွင် အရေးတကြီး လိုအပ်နေသည့် Oxgyen Concentrator စက် ငါးလုံးကို ပုဂံအခြေစိုက် Crown Prince Hotel ပိုင်ရှင် ဦးသန်းရွှေကNine COVID Team အဖွဲ့သို့ လှူဒါန်းပေးခဲ့ကြောင်း
သိရသည်။

လက်ရှိတွင် ဆေးရုံကြီးများ နှင့် ဆေးရုံများတွင် အရေးတကြီး လိုအပ်နေသည့် Oxgyen Concentrator များ အတွက် အလှူရှင် များကလည်း တတ်နိုင်သည့်ဘက်များမှ ပံ့ပိုးကူညီပေးနေခြင်းဖြစ်သည်။

အောက်တိုဘာ ၅ ရက် မနက်ပိုင်း တွင် ပုဂံအခြေစိုက် Crown Prince Hotel ပုဂံ မှ Oxgyen Concentrator (၅) လုံး အား လှူဒါန်းပေးခဲ့သလို မိဘနှစ်ပါးအား အမှုးထားပြီး အလှူရှင် ဒေါ်လှမြင့် မိသားစုကလည်း Oxgyen Concentrator (၆) လုံး ကို လည်း လှူဒါန်း ပေးခဲ့ကြောင်း သိရသည်။

“ကျွန်တော် တို့ Nine Covid Team အဖွဲ့ကို လာရောက်လှူဒါန်းပေးခဲ့တဲ့အလှူရှင်တွေက ပထမလှိုင်းတုန်းက အလှူရှင် ၃၀၀ ကျော်ရှိခဲ့တယ်။ အခု ဒုတိယလှိူင်းမှာကျတော့ အလှူရှင် ၂၀၀ ကျော်သွားပြီ”ဟု Nine Covid Team အဖွဲ့မှ ဦးဆောင်သူ တစ်ဦးဖြစ်သူ ဦးခင်အောင်ထွန်း က Travelling journal သို့ ပြောသည်။

အဆိုပါ Nine Covid Team အဖွဲ့သည် Tourism ၊Hotels & Restaurants လုပ်ငန်းရှင်များ နှင့် မိတ်ဆွေသူငယ်ချင်းများမှ မြန်မာပြည်တွင် COVID-19 ပထမလှိုင်း စတင်ဖြစ်ပေါ်ခဲ့သည့် ၂၀၂၀ ခုနှစ် မတ်လ (၂၃) ရက် မတိုင်မှီ မတ်လ (၂၀) ရက်နေ့တွင် ရင်ဘတ်ချင်းတူသူများ အချို့နှင့်စတင်ဖွဲ့စည်းခဲ့သည့် အဖွဲ့တစ်ခုဖြစ်ကြောင်းသိရသည်။

Travelling journal

ချောင်းသာ အ​ခြေစိုက် ဖွင့်လှစ်ထားသည့် ရွှေဟင်္သာ ဟိုတယ်တွင် တာဝန်ထမ်းဆောင်ခဲ့ကြသည့် ဟိုတယ်ဝန်ထမ်းဟောင်း ဦးရေ(၁၀၀ )ကို At The Sea ဟိုတယ် ပိုင်ရှင် က ပစ္စည်းငါးမျိုး ထောက်ပံ့ လှူဒါန်းပေးခဲ့ကြောင်း သိရသည်။

အဆိုပါ ဟိုတယ် ဝန်ထမ်းဦးရေ ၁၀၀ အတွက်ငွေဆောင် ကမ်းခြေ အခြေစိုက် At The Sea ဟိုတယ် ပိုင်ရှင် မိသားစု မှ ဆန် ဆီ ငရုတ် ကြက်သွန် ဆား အစ ရှိသည့်​ ​ထောက်ပံ့ကူညီ ပစ္စည်း ၅ မျိုးကို ပေးအပ်ခဲ့သည်။

” ဦး တို့ အနေနဲ့ ကိုယ်တတ်နိုင်တဲ့ဘက်ကနေ ထောက်ပံ့ကူညီတာပါ။ အရင်က အဲဒီဟိုတယ်မှာ ဦး လည်း အလုပ်လုပ်ခဲ့ဖူးပါတယ်။ နယ်ဝေးမှာ ရောက်နေတဲ့ ဝန်ထမ်းဟောင်းတွေကိုလည်း ထောက်ပံ့ပေးသွားမှာပါ”ဟု At The Sea ဟိုတယ် ပိုင်ရှင် ဦးလှိုင်မွန် က Travelling journal သို့ ပြောသည်။

ချောင်းသာကမ်း​ခြေ စတင် ဖွင့်လှစ်ခဲ့ပြီး ပထမ ဦးဆုံး စတင်ဖွင့်လှစ်ခဲ့သည့် ဟိုတယ်တစ်ခုဖြစ်ကာ ယင်းဟိုတယ်၌ ၁၉၉၇ ခုနှစ်မှ ၂၀၁၇ အထိ ​နှစ်၂၀ အတွင်း ရွှေဟင်္သာ ဟိုတယ်တွင် တာဝန်ထမ်းဆောင်ခဲ့ကြသည့် ဟိုတယ်ဝန်ထမ်းများအား အောက်တိုဘာ ၄ ရက် မနက်၉ နာရီတွင် ချောင်းသာကမ်း​ခြေ Sea Greate ၌ တစ်ဦးချင်း စီ ပေးအပ်လှူဒါန်းပေးခဲ့ခြင်းဖြစ်သည်။

Travelling journal

တနသ်ာရီတိုင်းဒေသကြီး ကော့သောင်း မြို့အခြေစိုက် သူဌေးကျွန်းအပန်းဖြေဟိုတယ် မိသားစုမှ COVID 19 ကာကွယ်ထိန်းချုပ်ကုသရေးစင်တာ( ၁၀ )နေရာ သို့ ကျန်းမာရေးသုံးပစ္စည်းများကို သွား​ရောက် လှူဒါန်းပေးသွားမည်ဖြစ်ကြောင်း Grand Andaman Group of Companies ၏ မန်နေဂျင်းဒါရိုက်တာ ဦးမျိုးဝင်းသန်း က Travelling journal သို့ ပြောသည်။

စက်တင်ဘာ ၃၀ ရက်တွင် တပ်မတော်ဆေးတက္ကသိုလ်​နှင့် အင်းစိန်ပြည်သူ့ဆေးရုံ သို့ ကျန်းမာရေးသုံး ပစ္စည်းများကို သွားရောက်လှူဒါန်းပေးခဲ့ကြောင်း ၄င်းက ပြောသည်။

“တကယ်လိုအပ်နေကြတာ ၊ ကိုယ်နိုင်သရွေ့ဝိုင်းလှူပေးတာပါ၊ အစိုးရ တစ်ခုတည်းနဲ့လည်း မနိုင်ဘူးလေ၊COVID 19 ရောဂါရှိသူများကို တာဝန်ယူကုသပေးနေကြတဲ့ စင်တာတွေကို ကျွန်တော်တို့ နိုင်သရွေ့ဝိုင်းကူညီပံ့ပိုးပေးတာပါ၊ အရင်ရက်က လှူတဲ့ အရေအတွက်အတိုင်း ပဲ လှူသွားမှာပါ။ နောက်ထပ်(၃)ရက်ကို နေရာ (၆)နေရာ ဆီ သွားပြီး ဆက်လှူပေးသွားပါမယ်”ဟု ဦးမျိုးဝင်းသန်းက Travelling journal သို့ ပြောသည်။

ပထမအကြိမ်နှင့် ဒုတိယအကြိမ်လှူဒါန်းခြင်း ကို စက်တင်ဘာ ၂၉ ရက်က ဧရာဝတီဖောင်ဒေးရှင်းနှင့်
ဗဟိုအမျိုးသမီးဆေးရုံကြီး (ရန်ကုန်) သို့ COVID 19 ကာကွယ် ထိန်းချုပ်ကုသရေးလုပ်ငန်းများတွင် အသုံးပြုရန်အတွက် PPE-200, KN 95 -400, Alcohol Soluction 50 L, Hand Sanitizer များ ကို သွားရောက် လှူဒါန်းခဲ့ပြီးဖြစ်ကြောင်း သိရသည်။