ပြည်တွင်းပြည်ပခရီးစဥ်များကို သုံးလအရစ်ကျစနစ်ဖြင့် ခရီးသွားနိုင်ရန် Tour ကုမ္ပဏီတစ်ခုစီစဥ်

Travelling Journal ပြည်တွင်းပြည်ပ ခရီးစဥ်များကို သုံးလ အရစ်ကျစနစ်ဖြင့် ခရီးသွားရောက်လည်ပတ်နိုင်ရန် ခရီးသွားကုမ္ပဏီတစ်ခုမှစီစဥ်နေကြောင်း ယင်း ကုမ္ပဏီ ၏ တာဝန်ရှိသူ က Travelling သို့ ပြောသည်။ ...

တင်ဆက်သူ - Admin / 21-06-2024

Travelling Journal

ပြည်တွင်းပြည်ပ ခရီးစဥ်များကို သုံးလ အရစ်ကျစနစ်ဖြင့် ခရီးသွားရောက်လည်ပတ်နိုင်ရန် ခရီးသွားကုမ္ပဏီတစ်ခုမှစီစဥ်နေကြောင်း ယင်း ကုမ္ပဏီ ၏ တာဝန်ရှိသူ က Travelling သို့ ပြောသည်။

ကနဦးအနေဖြင့် ရှမ်းပြည်နယ် ကလောခရီးစဥ်နှင့်ပုဂံခရီးစဥ် နှစ်ခုကို စတင်အကောင်အထည် ဖော်နေပြီဖြစ်ကြောင်း သိရသည်။

ပထမဦးဆုံး ပြည်တွင်းခရီးစဥ်ကို ဇူလိုင်လ (၁၈) ရက်တွင်စတင်မည်ဖြစ်ပြီး ဇူလိုင်လမှ စတင်ကာ စက်တင်ဘာကာလအတွင်း မိုးရာသီ ကာလအတွင်း အရစ်ကျစနစ်ဖြင့် သွားရောက်လည်ပတ်ရန် စီစဥ်ပေးထားကြောင်း သိရသည်။

“အခုကတော့ ပုဂံ-ညောင်ဦး-ပြည့် (၉) ပြည့် ခရီးစဥ်ရယ် ။ ကလော -အင်းလေး ခရီးစဥ်ကို ခရီးသွားချင်သူတွေအတွက် အရစ်ကျ စနစ်နဲ့ပေးလို့ရအောင်အကောင်အထည်ဖော်ပေးခဲ့ပါတယ်။ ပြည်ပ ခရီးစဥ်ကိုတော့ အောက်တိုဘာ လမှစတင်ပါမယ်။ ဒီလိုကာလမှာခရီးသွားချင်တဲ့သူတွေအတွက်ဝန်ထုတ်ဝန်ပိုးလည်းမဖြစ်အောင် ခရီးလည်း လည်ပတ်နိုင်စေဖို့ ရည်ရွယ်ပြီး စီစဥ်ပေးဖြစ်ခဲ့တာပါ။ အရစ်ကျ ခွဲပေးရတော့ သူတို့အတွက်လည်း အဆင်ပြေ စေပါတယ် “ဟု Let´sTravelEasilyTour ခရီးသွား ကုမ္ပဏီ မှ တာဝန် ရှိသူက Travelling ကို ပြောသည်။

ပုဂံ – ညောင်ဦးခရီးစဥ် သုံးညအိပ်လေးရက်အတွက် စားရိတ်ငြိမ်းအပြီးအစီးကို လူတစ်ဦးလျှင် ကျပ်နှစ်သိန်း ကျသင့်မည် ဖြစ်ကာ ပထမဆုံးလကို ကျပ်တစ်သိန်း ပေးသွင်းရမည်ဖြစ်ပြီး ကျန်ငွေအား ဒုတိယအရစ်တွင် ကျပ် (၅၅၀၀၀) ကျပ် နှင့် တတိယအရစ် တွင် ကျပ် (၅၅၀၀၀) ကို ပေးသွင်းရမည်ဖြစ်ကြောင်း သိရသည်။

အရစ်ကျ စနစ်ဖြင့် ခရီးသွားချင်သူများအတွက် လိုအပ်ချက်အနေဖြင့် မှတ်ပုံတင် မိတ္တူ၊သန်းခေါင်စာရင်းမိတ္တူ ၊ ရပ်ကွက် (သို့) မြို့နယ်နေထိုင်ကြောင်း မူရင်း၊ HR ၏ အလုပ်လုပ်ကြောင်းထောက်ခံစာမူရင်း နှင့် LTE Tour က သတ်မှတ်ထားသည့် Form တွင် ဖြည့်ပေးရမည်ဖြစ်ကြောင်း သိရသည်။

ထို့ပြင် ကလော -အင်းလေး သုံးညအိပ် လေးရက် ခရီးစဥ်ကိုအရစ်ကျ စနစ် ဖြင့် ခရီးသွားချင်သူများအတွက် ပထမအရစ် တွင် ကျပ် ၁၂၅၀၀၀ ကို ကနဦးပေးသွင်းရမည်ဖြစ်ပြီး ကျန်ငွေအား ဒုတိယအရစ် တွင် ကျပ် ၆၅၀၀၀ နှင့် တတိယ အရစ်တွင် ကျပ် ၆၅၀၀၀ ကို ပေးသွင်းရမည်ဖြစ်ကြောင်းသိရသည်။

ထို့ပြင်လက်ရှိတွင် မြန်မာ့ခရီးသွားဘဏ်မှဝိုင်းကြီးချုပ်စနစ်ဖြင့် အာမခံပြီး Travel Loan များကို ဆောင်ရွက် ပေးနေသည့် အပြင်
Corporate travel loan များနှင့် Travel Agent များ၏ Packge ခရီးစဥ်အလိုက် ခရီးသွားရောက်မည့်သူများအတွက် Travel Loan များကို ဆောင်ရွက်ပေးနေကြောင်း မြန်မာ့ခရီးသွားဘဏ်မှ တာဝန်ရှိသူက Travelling သို့ပြောသည်။