ငလျင်ဒဏ်ထိဟိုတယ်များကို ချေးငွေပေးရန် စာရင်းကောက်ယူနေ

#Travelling Journal ပြီးခဲ့သည့် မတ်လ(၂၈) ရက်က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင်လှုပ်ခတ်ခဲ့ခြင်းကြောင့်ထိခိုက်ပျက်စီးခဲ့ရသည့် ဟိုတယ်များကို ချေးင ...

တင်ဆက်သူ - Admin / 08-06-2025

#Travelling Journal

ပြီးခဲ့သည့် မတ်လ(၂၈) ရက်က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင်လှုပ်ခတ်ခဲ့ခြင်းကြောင့်
ထိခိုက်ပျက်စီးခဲ့ရသည့် ဟိုတယ်များကို ချေးငွေပေးရန် စာရင်းများကောက်ယူနေပြီဖြစ်ကြောင်း မြန်မာနိုင်ငံ ဟိုတယ်ဆိုင်ရာ လုပ်ငန်းရှင်များအသင်း(MHA ) မှ တာဝန်ရှိသူက Travelling သို့ပြောသည်။

” အခုတော့ ငလျင်ထိတဲ့ ဟိုတယ်တွေကို ချေးငွေပေးဖို့ စာရင်းတွေ ကောက်ယူနေပါပြီ။ တိုင်းဒေသကြီးအလိုက် ချေးငွေပေးမှာဖြစ်ပါတယ်။ ဒါ့ပြင်
ကျွန်တော်တို့ အသင်းကိုလည်းသက်ဆိုင်ရာဇုန်အလိုက်က လာတင်ပြရင်လည်း ထောက်ခံပေးပြီး
ဝန်ကြီးဌာနကို ဆက်လက်တင်ပြပေးသွားပါမယ်။ ဝန် ကြီးဌာနကလည်း သက်ဆိုင်ရာတိုင်းဒေသကြီးဆီ ပို့ပေးသွားမှာပါ”ဟု မြန်မာနိုင်ငံဟိုတယ်ဆိုင်ရာလုပ်ငန်းရှင်များအသင်း(MHA ) မှအထွေထွေအတွင်းရေးမှူး ဦးနေအောင်ကိုက Travelling သို့ ပြောသည်။

အဆိုပါ ငလျင်ဒဏ်ထိသွားခဲ့သည့် နေပြည်တော်
မန္တလေးနှင် စစ်ကိုင်းမြို့များရှိ ဟိုတယ်ပိုင်ရှင်များမှ မိမိတို့၏ဟိုတယ်များကို ဆောက်လုပ်ပေးထားသည့် အင်ဂျင်နီယာများမှ စစ်ဆေးပေးမှုအပေါ် အရောင်အဆင့်ခွဲခြားပြီး ချေးငွေများကို တိုင်းဒေသကြီးအလိုက် ထုတ်ပေးသွားရန် စီစဥ်ထားကြောင်းသိရသည်။

“တစ်ချို့က ပြန်ဆောက်ဖို့ဘိလပ်မြေ လိုရင်လည်းဘိလပ်မြေအိတ်ရရှိအောင် ဆောင်ရွက်ပေးရင်
ပိုကောင်းမယ်။ ချေးငွေဆိုလည်း ချေးငွေရအောင် နိုင်ငံ တော်က ထိထိမိမိလေးကူညီပံ့ပိုးပေးရင်ပိုကောင်းတာပေါ့ “ဟု ဟိုတယ်လုပ်ငန်းရှင်တစ်ဦးက Travelling သို့ပြောသည်။

အဆိုပါချေးငွေ၏ အတိုးနှုန်းကို ကိုဗစ်ကာလကထုတ်ချေးပေးခဲ့သည့်အတိုးနှုန်းထက် သိပ်မများလှသည့် အတိုးနှုန်းဖြင့်ချေးပေးသွားမည်ဖြစ်ကြောင်းသိရသည်။

မတ် ၂၈ ရက် က စစ်ကိုင်းမြို့အနီးကို ဗဟိုပြုပြီး အင်အား ၇ ဒသမ ၇ ရစ်ချ်တာစကေးရှိ အင်အားပြင်းငလျင် လှုပ်ခတ်ခဲ့သောကြောင့် မန္တလေးတိုင်းဒေသကြီး၊ စစ်ကိုင်းတိုင်းဒေသကြီး၊ ပဲခူးတိုင်းဒေသကြီး၊ ရှမ်းပြည်နယ်နှင့် နေပြည်တော်တို့တွင် ထိခိုက်မှုများ ဖြစ်ပေါ်ခဲ့ခြင်းဖြစ်သည်။